ಕಳೆದ ಹತ್ತು ವರ್ಷಗಳ ಅವಧಿಯಲ್ಲಿ ಮಾಜಿ ಶಾಸಕರು ಎಲ್ಲ ಅಭಿವೃದ್ದಿ ಕಾಮಗಾರಿಗಳನ್ನು ತುಂಡು ಗುತ್ತಿಗೆ ನೀಡಿದ ಪರಿಣಾಮ ಯಾವುದೇ ಕಾಮಗಾರಿಗಳು ಪೂರ್ಣಗೊಂಡಿಲ್ಲ. ಹಾಗೂ ನಗರದ ರಸ್ತೆಗಳಿಗೆ ಬಳಸಬೇಕಾದ ನಗರೋತ್ಥಾನ ಯೋಜನೆ ಹಣವನ್ನು ಅವಶ್ಯಕತೆಯಿಲ್ಲದ ಯೋಜನೆಗೆ ಹೆಚ್ಚು ಬಳಸಿ ಅಭಿವೃದ್ದಿ ತಿಲಾಂಜಲಿ ಹಾಡಿದ್ದಾರೆ ಎಂದರು.ಅಮೃತ್ ನಗರೋತ್ಥಾನ ಯೋಜನೆಯಲ್ಲಿ ನಗರಕ್ಕೆ ಕುಡಿಯುವ ನೀರು ಸರಬರಾಜು ಮಾಡಲು ಉದ್ದೇಶಿಸಿರುವ ನೆಕ್ಕುಂದಿ ಕೆರೆ ಯೋಜನೆ ವೆಚ್ಚ ಈಗ 30 ಕೋಟಿಯಿಂದ 80 ಕೋಟಿ ರೂ.ಗಳಿಗೆ ಏರಿದ್ದು, ಅದನ್ನು ಮಂಜೂರು ಮಾಡಿಸುವುದಾಗಿ ಭರವಸೆ ನೀಡಿದ ಸಚಿವರು, ಕನ್ನಂಪಲ್ಲಿ ಕೆರೆ ಅಭಿವೃದ್ದಿಗೂ ಹೆಚ್ಚುವರಿ ಹಣ ಒದಗಿಸುವುದಾಗಿ ಹೇಳಿದರು.ನಗರದಲ್ಲಿ ಝಾನ್ಸಿ ರಾಣಿ ಮೈದಾನ, ಮಾಳಪಲ್ಲಿಯಿಂದ ಕೋಲಾರ ಮುಖ್ಯರಸ್ತೆಗೆ ಸಂಪರ್ಕ ಕಲ್ಪಿಸುವ ರಸ್ತೆಯಲ್ಲಿ ಕ್ರಿಕೆಟ್ ಕ್ರೀಡಾಂಗಣ, ರಾಮಕುಂಟೆ ಪ್ರದೇಶದಲ್ಲಿ ಟ್ರಕ್ ಟರ್ಮಿನಲ್, ಬಸ್ ನಿಲ್ದಾಣ, ಬ್ಯಾಡ್ಮಿಂಟನ್ ಒಳಾಂಗಣ ಕ್ರೀಡಾಂಗಣ, ಐಡಿಎಸ್ಎಂಟಿ ಮಾರುಕಟ್ಟೆಯ ಮೇಲೆ ಬೀದಿಬದಿ ವ್ಯಾಪಾರಸ್ಥರಿಗೆ ಅಂಗಡಿಗಳ ವ್ಯವಸ್ಥೆ, ನಗರದಲ್ಲಿ ಅಂಬೇಡ್ಕರ್, ವಾಲ್ಮೀಕಿ ಭವನಕ್ಕೆ ಹೆಚ್ಚುವರಿ ಹಣ ಮಂಜೂರಾಗಿರುವ ಬಗ್ಗೆ ವಿವರವಾಗಿ ತಿಳಿಸಿದರು. ಅಂಗವಿಕಲರಿಗೆ 2 ಕೋಟಿ ರೂ. ವೆಚ್ಚದಲ್ಲಿ 200ಕ್ಕೂ ಹೆಚ್ಚು ತ್ರಿಚಕ್ರವಾಹನ ವಿತರಣೆ ಮಾಡಲಾಗಿದೆ. ಟೈಡ್ ಮತ್ತು ಬೋರ್ಡಾ ಸಂಸ್ಥೆ ನೀಡಿರುವ 30 ಲಕ್ಷ ರೂ. ಮವಲ್ಯದ ಯಂತ್ರೋಪಕರಣಗಳು, ಡಿಸ್ಪೋಸಬಲ್ ವಾಟರ್ಬಾಟಲ್ ಸಂಗ್ರಹಣೆಗೆ ನಾಲ್ಕು ಬೃಹತ್ ಗಾತ್ರದ ಸ್ಟ್ಯಾಂಡ್ಗಳು, 50 ಬಡ ವಿದ್ಯಾರ್ಥಿಗಳಿಗೆ ಲ್ಯಾಪ್ಟಾಪ್, 250 ಬೀದಿಬದಿ ವ್ಯಾಪಾರಿಗಳಿಗೆ ಗುರುತಿನಚೀಟಿ ವಿತರಿಸಲಾಯಿತು ಎಂದು ತಿಳಿಸಿದರು.ವಿಧಾನ ಪರಿಷತ್ ಸದಸ್ಯ ಎಂ.ಎಲ್.ಅನಿಲ್ ಕುಮಾರ್, ತಹಸೀಲ್ದಾರ್ ಸುದರ್ಶನ್ ಯಾದವ್, ಜಿಲ್ಲಾ ನಗರಾಭಿವೃದ್ಧಿ ಕೋಶ ಯೋಜನಾ ನಿರ್ದೇಶಕಿ ಕೆ.ಮಾಧವಿ, ನಗರಸಭೆ ಸದಸ್ಯರಾದ ಹರೀಶ್, ಜಗದೀಶ್, ಅಕ್ಷಯ ಮಾತನಾಡಿದರು. ನಗರಸಭೆ ಅಧ್ಯಕ್ಷ ಅರ್.ಜಗನ್ನಾಥ, ಉಪಾಧ್ಯಕ್ಷೆ ರಾಣಿಯಮ್ಮ, ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಶ್ರೀನಾಥ್, ಪೌರಾಯುಕ್ತ ಜಿ.ಎನ್.ಚಲಪತಿ, ಟೈಡ್ ಮತ್ತು ಬೋರ್ಡಾ ಸಂಸ್ಥೆಯ ಅರ್ಜುನ್ ಮತ್ತು ಪ್ರಿಯಾ ಮುಂತಾದವರು ಹಾಜರಿದ್ದರು.
