ಠೇವಣಿ ಹೊರೆ ಅಂಗಡಿ-ಮಳಿಗೆ ಖಾಲಿಖಾಲಿ

ಗುಡಿಬಂಡೆ ಪಟ್ಟಣ ಪಂಚಾಯಿತಿ ಬಾಡಿಗೆ ಕಟ್ಟಡಕ್ಕೆ ₹ 1 ಲಕ್ಷ! ಹರಾಜಿನಿಂದ ದೂರವೇ ಉಳಿದ ವರ್ತಕರು

ಗುಡಿಬಂಡೆ: ಪಟ್ಟಣ ಪಂಚಾಯಿತಿ ವಾಣಿಜ್ಯ ಅಂಗಡಿ ಮಳಿಗೆಗಳಿಗೆ ಅವೈಜ್ಞಾನಿಕವಾಗಿ ಠೇವಣಿ ನಿಗದಿ ಮಾಡಿರುವುದರಿಂದ ಅಂಗಡಿ -ಮಳಿಗೆಗಳು ಖಾಲಿಖಾಲಿಯಾಗಿಯೇ ಉಳಿಯುವಂತಾಗಿದೆ.
ಹೌದು. ಹೆಚ್ಚಿನ ಠೇವಣಿ ನಿಗದಿ ಮಾಡಿರುವುದರಿಂದ ಹರಾಜು ಪ್ರಕ್ರಿಯೆಯಲ್ಲಿ ವರ್ತಕರು ಭಾಗವಹಿಸಿಲ್ಲ. ಆದ್ದರಿಂದ ಹಲವು ವರ್ಷಗಳಿಂದ ಅಂಗಡಿ- ಮಳಿಗೆಗಳು ಖಾಲಿಯಾಗಿಯೇ ಉಳಿದಿವೆ. ಇದರಿಂದ ಪಟ್ಟಣ ಆಡಳಿತದ ಆದಾಯಕ್ಕೆ ಹೊಡೆತ ಬಿದ್ದಿದೆ.
ಪಟ್ಟಣ ದಲ್ಲಿರುವ ಸುಮಾರು 22 ಅಂಗಡಿ ಮಳಿಗೆಗಳಲ್ಲಿ 13 ಅಂಗಡಿ ಮಳಿಗೆಗಳು ಹರಾಜು ಆಗಿದ್ದು, 9 ಅಂಗಡಿ ಮಳಿಗೆಗಳು ಹಲವು ವರ್ಷಗಳಿಂದ ಖಾಲಿಯಿವೆ. ಪಟ್ಟಣ ಪಂಚಾಯಿತಿ ಕಾರ್ಯಾಲಯದ ಆದಾಯದ ಮೂಲವಾಗಿರುವ ಈ ಅಂಗಡಿ-ಮಳಿಗೆಗಳು ಹಲವು ವರ್ಷಗಳಿಂದ ಹರಾಜು ಆಗಿಲ್ಲ. ಇದರಿಂದ ಪಟ್ಟಣ ಪಂಚಾಯಿತಿ ಆದಾಯ ಕುಂಠಿತವಾಗಿದೆ. ಇದರಿಂದ ಪೌರಕಾರ್ಮಿಕರಿಗೆ ಸೇರಿ ಹೊರಗುತ್ತಿಗೆ ನೌಕರರಿಗೆ ವೇತನ ನೀಡಲೂ ಪರದಾಡುವ ದುಸ್ಥಿತಿ ಪಟ್ಟಣ ಪಂಚಾಯಿತಿಗೆ ಎದುರಾಗಿದೆ.

ಆಡಳಿತಾಂಗದ ವೈಲ್ಯ?
ಪಟ್ಟಣದಲ್ಲಿರುವ ಖಾಲಿ ಅಂಗಡಿ ಮಳಿಗೆಗಳ ಬಿಡ್‌ಗೆ ಎರಡು ಬಾರಿ ಹರಾಜು ಪ್ರಕ್ರಿಯೆ ಮಾಡಿದ್ದು, 9 ಅಂಗಡಿಗಳಿಗೆ ಯಾರೂ ಹರಾಜು ಪಡೆಯಲು ಮುಂದೆ ಬಂದಿಲ್ಲ. ಈ ಸಮಸ್ಯೆಗೆ ಏನು ಕಾರಣ ಎಂದು ಅರಿಯಲು ಇದುವರೆಗೂ ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿಗಳು ಮುಂದಾಗಿಲ್ಲ. ಇನ್ನಾದರೂ ಜಿಲ್ಲಾಧಿಕಾರಿಗಳು ಮಧ್ಯೆ ಪ್ರವೇಶಿಸಿ ಕಡಿಮೆ ಠೇವಣಿ ನಿಗದಿ ಪಡಿಸಬೇಕೆಂಬ ಕೂಗು ಜೋರಾಗಿದೆ.

ಖಾಸಗಿ ಅಂಗಡಿಗಳಿಗೆ ₹30-40 ಸಾವಿರ
ಪಟ್ಟಣದ ಮುಖ್ಯ ರಸ್ತೆಯಲ್ಲಿರುವ ಖಾಸಗಿ ಅಂಗಡಿ ಮಳಿಗೆಗಳಿಗೆ ₹30 ಸಾವಿರದಿಂದ 40 ಸಾವಿರ ಮಾತ್ರ ಠೇವಣಿ ನಿಗದಿ ಮಾಡಿದ್ದಾರೆ. ಆದರೆ ಪಂಪಂ ಮಾತ್ರ ಎಲ್ಲೋ ವಾರ್ಡ್‌ಗಳಲ್ಲಿರುವ ಅಂಗಡಿ ಮಳಿಗೆಗಳಿಗೂ ₹ 1 ಲಕ್ಷ ಠೇವಣಿ ನಿಗದಿ ಮಾಡಿದರೆ ಹೇಗೆ?, ಕೂಡಲೇ ಅಧಿಕಾರಿಗಳು ಠೇವಣಿಗೆ ಹಣ ಕಡಿಮೆ ಮಾಡಿ, ಹರಾಜು ಕರೆದರೆ ಪಪಂ ಅಂಗಡಿ ಕಟ್ಟಡಗಳನ್ನು ಬಾಡಿಗೆಗೆ ಪಡೆಯುವುದಾಗಿ ಬಹುತೇಕ ವರ್ತಕರು ಹೇಳುತ್ತಿದ್ದಾರೆ.

ಅವೈಜ್ಞಾನಿಕ ನಿಗದಿಯೇ ಕಾರಣ?
ಸರ್ಕಾರದ ಆದೇಶದಂತೆ ಪ್ರತಿ ಅಂಗಡಿ ಮಳಿಗೆಗೆ 1 ಲಕ್ಷ ರೂ. ಠೇವಣಿ ನಿಗದಿ ಮಾಡಲಾಗಿದೆ. ಆದರೆ, ಬಹುತೇಕ ಮಳಿಗೆಗಳು ಮುಖ್ಯರಸ್ತೆಯಲ್ಲಿಲ್ಲ. ಇರುವುದರಿಂದ ಹೆಚ್ಚು ಠೇವಣಿ ಇಟ್ಟು ಹರಾಜಿನಲ್ಲಿ ಕಟ್ಟಡವನ್ನು ಬಾಡಿಗೆ ಪಡೆದರೂ ವ್ಯಾಪಾರ ಆಗುವುದಿಲ್ಲ. ಆದರೂ ಹೆಚ್ಚಿನ ಬಾಡಿಗೆ ನೀಡಬೇಕೆಂದು ವಾರ್ತಕರು ಅಂಗಡಿ-ಮಳಿಗೆಗಳ ಹರಾಜಿನಲ್ಲಿ ಭಾಗವಹಿಸುತ್ತಿಲ್ಲ ಎನ್ನಲಾಗಿದೆ.