ಕಟ್ಟಡದಿಂದ ಬಿದ್ದು ಸಾವು

ಮಾಗಡಿ: ನಿರ್ಮಾಣ ಹಂತದ ಎರಡು ಅಂತಸ್ತಿನ ಕಟ್ಟಡದಿಂದ ಬಿದ್ದು ಖಾಸಗಿ ಸಂಸ್ಥೆಯ ಉದ್ಯೋಗಿ ಮೃತಪಟ್ಟಿದ್ದಾರೆ.

ಪಟ್ಟಣದ ಕೋಟಪ್ಪನ ಪಾಳ್ಯದ ನಿವಾಸಿ, ಇಂಜಿನಿಯರ್​ ಕೆ.ಸಿ.ಚಂದ್ರಪ್ಪ (33) ಮೃತ.

ಸೋಮವಾರ ರಾತ್ರಿ ಸುರಿದ ಭಾರಿ ಮಳೆಯಿಂದಾಗಿ ಮನೆಯ ಎರಡನೇ ಮಹಡಿಯ ಛಾವಣಿ ಮೇಲೆ ನಿಂತಿದ್ದ ನೀರನ್ನು ತೆರವುಗೊಳಿಸಿ ಕೆಳಗೆ ಇಳಿಯುವ ವೇಳೆ ಏಣಿಯಲ್ಲಿ ಆಯ ತಪ್ಪಿ ಬಿದ್ದಿದ್ದಾರೆ. ಈ ವೇಳೆ ತಲೆ ಭಾಗದಲ್ಲಿ ತೀವ್ರ ರಕ್ತಸ್ರಾವ ಉಂಟಾಗಿದೆ. ಕೂಡಲೇ ಮಾಗಡಿ ಸಾರ್ವಜನಿಕ ಸರ್ಕಾರಿ ಆಸ್ಪತ್ರೆಯಲ್ಲಿ ಪ್ರಥಮ ಚಿಕಿತ್ಸೆ ಕೊಡಿಸಿ ಹೆಚ್ಚಿನ ಚಿಕಿತ್ಸೆಗಾಗಿ ಬೆಂಗಳೂರಿನ ಆಸ್ಪತ್ರೆಗೆ ತೆರಳಲು ಆಂಬುಲೆನ್ಸ್​ಗೆ ರವಾನಿಸುತ್ತಿರುವಾಗಲೇ ಮೃತಪಟ್ಟಿದ್ದಾರೆ.

ಮನೆ ಕಟ್ಟಿದ ಮೇಲೆ ಮದುವೆಯಾಗಲು ನಿಶ್ಚಯಿಸಿದ್ದ ಚಂದ್ರಪ್ಪ, ಬಣ್ಣ ಬಳಿಯುವ ಕೆಲಸ ಉಳಿಸಿದ್ದರು. ಸ್ವಗ್ರಾಮ ಹುಲಿದುರ್ಗದ ಕೀಲಾರ ಗ್ರಾಮದ ಜಮೀನಿನಲ್ಲಿ ಅಂತ್ಯಕ್ರಿಯೆ ನೆರವೇರಿಸಲಾಯಿತು. ಮೃತರಿಗೆ ತಾಯಿ, ತಂದೆ ಸಹೋದರಿ ಇದ್ದಾರೆ. ಮಾಗಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.