ಒಕ್ಕೂಟದ ಅಧ್ಯಕ್ಷ ಕಾಳೇಗೌಡರು ಮಾತನಾಡಿ, 60 ವರ್ಷದ ನಂತರ ಪ್ರತಿಯೊಬ್ಬರಿಗೂ ನಿವೃತ್ತಿ ವೇತನ ನೀಡುವುದು ಸರ್ಕಾರದ ಕರ್ತವ್ಯ. ಸೇವೆಯಲ್ಲಿದ್ದಾಗ ಬ್ಯಾಂಕಿನ ಅಭಿವೃದ್ಧಿಗಾಗಿ ಶ್ರಮಿಸಿರುತ್ತೇವೆ. 60ರ ನಂತರ ಬಹುಪಾಲು ಜನರಿಗೆ ಬಿಪಿ, ಶುಗರ್ ಮತ್ತಿತರ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿರುತ್ತಾರೆ. ಇಂತಹ ಸಂದರ್ಭದಲ್ಲಿ ಗೌರವದಿಂದ ಜೀವನ ನಡೆಸಲು, ಚಿಕಿತ್ಸೆ, ಔಷಧಿ ಖರೀದಿಸಲು ಕೂಡ ಎಷ್ಟೋ ಜನ ಕಷ್ಟಪಡುತ್ತಿದ್ದಾರೆ. ಅಂತಹವರ ಕಷ್ಟಕ್ಕೆ ನಾವು ಕೆಲಸ ಮಾಡಿದ ಸಂಸ್ಥೆ ನಮ್ಮ ಜೊತೆ ನಿಲ್ಲಬೇಕು. ನಾವು ಸರ್ಕಾರವನ್ನಾಗಲೀ, ಬ್ಯಾಂಕಿನಿಂದಾಗಲಿ ಒಂದು ರೂಪಾಯಿಯನ್ನು ಕೇಳುತ್ತಿಲ್ಲ. ಬ್ಯಾಂಕಿನ ವಾರ್ಷಿಕ ನಿವ್ವಳ ಲಾಭಾಂಶದ ಶೇ.25ನ್ನು ನಿಧಿಯ ರೂಪದಲ್ಲಿರಿಸಿ ಅದರ ಬಡ್ಡಿಯ ಹಣದಲ್ಲಿ ನಿವೃತ್ತ ನೌಕರರಿಗೆ ಪಿಂಚಣಿ ನೀಡಬೇಕು. ರಾಜ್ಯದ 21 ಡಿಸಿಸಿ ಬ್ಯಾಂಕ್ಗಳಲ್ಲಿ ಕೆಲವು ಬ್ಯಾಂಕ್ಗಳು ಈಗಾಗಲೇ ಈ ಯೋಜನೆಗಳನ್ನು ಜಾರಿಗೆ ತಂದಿವೆ. ಈ ಬಗ್ಗೆ 1959-60ರ ಸಹಕಾರಿ ಕಾಯ್ದೆಗೆ ತಿದ್ದುಪಡಿ ತಂದು ಈ ಸಮಸ್ಯೆಗೆ ಸರ್ಕಾರ ಶಾಶ್ವತ ಪರಿಹಾರ ಒದಗಿಸಬೇಕೆಂದು ಒತ್ತಾಯಿಸಿದರು.
