ವಿಶ್ವ ತಾಯಿ ದಿನದ ಅಂಗವಾಗಿ ತಾಯಿಯ ಪ್ರತಿಮೆಗೆ ಅಭಿಷೇಕ ಹಾಗೂ ವಿಶೇಷ ಪೂಜೆ.. ಈಗ ಪಟ್ಟಣದ ರಸ್ತೆ ವಿಭಜಕದ (ಡಿವೈಡರ್) ಮಧ್ಯೆ 150ಕ್ಕೂ ಹೆಚ್ಚು ಗಿಡಗಳನ್ನು ಸ್ವಂತ ಮಕ್ಕಳಂತೆ ಸಲಹುವ ಮೂಲಕ ಸಸ್ಯಪ್ರೇಮ... merchant

ಪಟ್ಟಣದ 62 ವರ್ಷದ ಬೀಡಾ ಅಂಗಡಿ ಮಾಲೀಕರಾದ ಚಂದ್ರಪ್ಪ ಎಂ.ಸಿ. ಅವರೇ ಈ ಹಸಿರು ಕಾಯಕದ ರೂವಾರಿ. ಇವರು ಪ್ರತಿದಿನ ಬೆಳಗ್ಗೆ ತಮ್ಮ ಅಂಗಡಿಯ ಬಾಗಿಲು ತೆರೆಯುವ ಮುನ್ನ, ರಸ್ತೆ ವಿಭಜಕದಲ್ಲಿರುವ ಗಿಡಗಳಿಗೆ ತಪ್ಪದೇ ನೀರುಣಿಸುವ ಕಾಯಕವನ್ನು ನಿಯಮಿತವಾಗಿ ಮಾಡಿಕೊಂಡು ಬಂದಿದ್ದಾರೆ.

ಕಳೆದ ಮೂರ್ನಾಲ್ಕು ವರ್ಷಗಳ ಹಿಂದೆ ಪುರಸಭೆ ಹಾಗೂ ಅರಣ್ಯ ಇಲಾಖೆಯ ಅಧಿಕಾರಿಗಳು ಜಂಟಿಯಾಗಿ ವಿಶ್ವ ಪರಿಸರ ದಿನದ ಅಂಗವಾಗಿ ರಸ್ತೆ ವಿಭಜಕದ ಮಧ್ಯೆ ಸಾಲು ಸಾಲಾಗಿ ಗಿಡಗಳನ್ನು ನೆಟ್ಟು ಹೋಗಿದ್ದರು. ನಂತರ ಅವುಗಳನ್ನು ಪೋಷಿಸುವ ಗೋಜಿಗೆ ಮಾತ್ರ ಹೋಗಲಿಲ್ಲ. ಇದರಿಂದಾಗಿ ನೀರಿಲ್ಲದೆ ಸಸಿಗಳು ಒಣಗಲಾರಂಭಿಸಿದವು.

ತಮ್ಮ ಕಣ್ಣೆದುರೇ ಹಸಿರು ಸಸಿಗಳು ಒಣಗಿ ಹೋಗುತ್ತಿರುವುದನ್ನು ಕಂಡು ಮರುಗಿದ ಚಂದ್ರಪ್ಪ, ತಾವೇ ಸ್ವತಃ ವಿವಿಧ ಜಾತಿಯ ಬೀಜಗಳನ್ನು ಬಿತ್ತಿ ಹೊಸ ಸಸಿಗಳನ್ನು ಸಿದ್ಧಪಡಿಸಿಕೊಂಡರು. ಪಟ್ಟಣದ ಕೆಎಸ್‌ಆರ್‌ಟಿಸಿ (KSRTC) ಬಸ್ ನಿಲ್ದಾಣದಿಂದ ಹಿಡಿದು ವಡ್ಡಿನಕೆರೆ ಹಳ್ಳದವರೆಗಿನ ರಸ್ತೆ ವಿಭಜಕದ ಮಧ್ಯೆ ಖಾಲಿ ಇದ್ದ ಜಾಗದಲ್ಲೆಲ್ಲಾ ಆ ಸಸಿಗಳನ್ನು ನೆಟ್ಟರು.

ಚಂದ್ರಪ್ಪ ಅವರು ನೆಟ್ಟ ಸಸಿಗಳಲ್ಲಿ ಹೊಂಗೆ, ಕಣಗಿಲ ಸೇರಿದಂತೆ ವಿವಿಧ ಜಾತಿಯ ಆಕರ್ಷಕ ಹೂವಿನ ಗಿಡಗಳು ಹಾಗೂ ಹತ್ತಾರು ಔಷಧೀಯ ಗುಣಗಳುಳ್ಳ ಸಸ್ಯಗಳು ಸೇರಿವೆ. ನಿತ್ಯವೂ ಇವರು ಪ್ರೀತಿಯಿಂದ ನೀರುಣಿಸುತ್ತಿರುವುದರಿಂದ ಈಗಾಗಲೇ ಸುಮಾರು 50ಕ್ಕೂ ಹೆಚ್ಚು ಗಿಡಗಳು ದೊಡ್ಡದಾಗಿ ಬೆಳೆದು ನಿಂತಿವೆ. ಇನ್ನುಳಿದ ಸಸಿಗಳು ಮುಂದಿನ ಆರು ತಿಂಗಳಲ್ಲಿ ಮರಗಳಾಗಿ ಮಾರ್ಪಟ್ಟು, ಇಡೀ ನಗರದ ಸೌಂದರ್ಯ ಹಾಗೂ ಪರಿಸರದ ಸ್ವಚ್ಛತೆಯನ್ನು ಹೆಚ್ಚಿಸಲಿವೆ.

ನನಗೆ ಜನ್ಮ ನೀಡಿದ ದೇವತೆ ನನ್ನ ತಾಯಿ. ಆಕೆಯನ್ನು ದೇವರ ಸ್ಥಾನದಲ್ಲಿಟ್ಟು ಪೂಜೆ ಮಾಡಿ ಆಕೆಯ ಋಣ ತೀರಿಸುವುದು ನನ್ನ ಮೊದಲ ಕರ್ತವ್ಯ. ಇದರೊಟ್ಟಿಗೆ ನಾವು ನಮಗೆ ಆಶ್ರಯ ನೀಡಿರುವ ಭೂಮಿಯ ಋಣವನ್ನೂ ತೀರಿಸಬೇಕಾಗಿದೆ. ಅದಕ್ಕಾಗಿಯೇ ಈ ಸಸಿಗಳನ್ನು ನೆಟ್ಟು ಪೋಷಿಸುತ್ತಿದ್ದೇನೆ. ಅವು ದೊಡ್ಡ ಮರಗಳಾಗಿ ಬೆಳೆಯುವವರೆಗೂ ನನ್ನ ಸ್ವಂತ ಮಕ್ಕಳಂತೆ ನೋಡಿಕೊಳ್ಳುತ್ತೇನೆ. ಇದು ನನ್ನ ಸಾಮಾಜಿಕ ಜವಾಬ್ದಾರಿಯೂ ಹೌದು.

— ಚಂದ್ರಪ್ಪ ಎಂ.ಸಿ., ಪರಿಸರ ಪ್ರೇಮಿ, ಹೊನ್ನಾಳಿ