ಬೆಂಗಳೂರು: ಬಿಬಿಎಂಪಿ, ಜಿಲ್ಲಾ ಮತ್ತು ತಾಲೂಕು ಪಂಚಾಯಿತಿ ‘ಚುನಾವಣೆ ಜ್ವರ’ವನ್ನು ‘ನಮ್ಮ ಕ್ಲಿನಿಕ್’ಗಳ ಮೂಲಕ ಉಪಶಮನ ಮಾಡಿಕೊಳ್ಳಲು ರಾಜ್ಯ ಸರ್ಕಾರ ಮುಂದಾಗಿದೆ. ಬೆಂಗಳೂರು ಸೇರಿ ರಾಜ್ಯದ ಎಲ್ಲ ನಗರ-ಪಟ್ಟಣಗಳಲ್ಲಿ ‘ನಮ್ಮ ಕ್ಲಿನಿಕ್’ ತೆರೆಯಲು ಹಾಗೂ ಪೌರ ಕಾರ್ವಿುಕರಿಗೆ ಮಾಸಿಕ 2,000 ರೂ. ಸಂಕಷ್ಟ ಭತ್ಯೆ ಮಂಜೂರು ಮಾಡಲು ಶುಕ್ರವಾರ ನಡೆದ ಸಚಿವ ಸಂಪುಟ ಸಭೆ ಅಸ್ತು ಎಂದಿದೆ. ಬೆಂಗಳೂರಿನ 243 ವಾರ್ಡ್ಗಳಿಗೆ ತಲಾ ಒಂದು, ರಾಜ್ಯದ ಇನ್ನುಳಿದ ನಗರ-ಪಟ್ಟಣಗಳಲ್ಲಿ 195 ಸೇರಿ 438 ನಮ್ಮ ಕ್ಲಿನಿಕ್ಗಳು ಸ್ಥಾಪನೆಯಾಗಲಿವೆ. ಅಷ್ಟೇ ಅಲ್ಲ, ಪ್ರಾಥಮಿಕ, ತಾಲೂಕು ಮತ್ತು ಜಿಲ್ಲಾಸ್ಪತ್ರೆಗಳ ಮೇಲಿನ ಒತ್ತಡ ಕಡಿಮೆ ಮಾಡಲು ಆಸರೆಯಾಗಲಿವೆ. ಒಟ್ಟಾರೆ ಬಸವರಾಜ ಬೊಮ್ಮಾಯಿ ನೇತೃತ್ವದ ಬಿಜೆಪಿ ಸರ್ಕಾರ ನೇರವಾಗಿ ಜನರಿಗೆ ತಲುಪುವ ಆರೋಗ್ಯ ಮತ್ತು ನೈರ್ಮಲ್ಯಕ್ಕೆ ಸಂಬಂಧಿಸಿದ ಮತ್ತೆರಡು ‘ಜನಪ್ರಿಯ’ ಭಕ್ಷೀಸು ನೀಡಿದೆ.
