ಸ್ಮಾಟ್ ಸಿಟಿ ಬೈತುರ್ಲಿಯಲ್ಲಿ ಅಪಾಯಕಾರಿ ಬಸ್ ತಂಗುದಾಣ

ಗುರುಪುರ: ಮಂಗಳೂರು - ಸೋಲಾಪುರ ರಾಷ್ಟ್ರೀಯ ಹೆದ್ದಾರಿ 169ರ ಕುಡುಪುವಿಗೆ ಹತ್ತಿರದ ಬೈತುರ್ಲಿಯಲ್ಲಿ ಸಂಪೂರ್ಣ ಕುಸಿದಿರುವ ತಂಗುದಾಣ (ಬಸ್-ಸ್ಟ್ಯೇಂಡ್) ಪ್ರಯಾಣಿಕರ ಬಲಿ ಪಡೆಯುವ ಖೆಡ್ಡಾದಂತೆ ಮಾರ್ಪಾಡಾಗಿದೆ.

ನೇತಾಡುತ್ತಿರುವ ಶೀಟುಗಳಿಂದ ಅಪಾಯ

2001ರ ವರೆಗೆ ಕುಡುಪು ಗ್ರಾ.ಪಂ. ವ್ಯಾಪ್ತಿಯಲ್ಲಿದ್ದ ಈ ತಂಗುದಾಣ ಈಗ ಮಂಗಳೂರು ನಗರ ಪಾಲಿಕೆ ವ್ಯಾಪ್ತಿಯಲ್ಲಿದೆ. ಇದರ ಮೇಲ್ಛಾವಣಿ, ಪಕ್ಕಾಸು, ರೀಪುಗಳು ತುಂಡಾಗಿ ಬಿದ್ದಿವೆ. ತಂಗುದಾಣ ಕಟ್ಟಡದ ಹಿಂಭಾಗದ ಒಂದೆರಡು ಶೀಟುಗಳು ಬಿದ್ದಿದ್ದರೆ, ಇನ್ನು ಕೆಲವು ಶೀಟುಗಳು ನೇತಾಡುತ್ತಿವೆ. ಇವು ಯಾವುದೇ ಸಂದರ್ಭದಲ್ಲಿ ಬೀಳುವ ಸ್ಥಿತಿಯಲ್ಲಿದೆ. ಶಿಥಿಲ ತಂಗುದಾಣದಲ್ಲಿ ನೇತಾಡುತ್ತಿರುವ ಶೀಟುಗಳಿಂದ ಪ್ರಯಾಣಿಕರಿಗೆ ಅಪಾಯ ತಪ್ಪಿದ್ದಲ್ಲ.

ರಸ್ತೆಯಲ್ಲೇ ಬಸ್‌ಗಾಗಿ ಕಾಯುವ ಅನಿವಾರ್ಯತೆ

ಮಂಗಳೂರು - ಮೂಡುಬಿದಿರೆ, ನೀರುಮಾರ್ಗ - ಮಲ್ಲೂರು - ಬಿ.ಸಿ.ರೋಡ್ ಸಂಪರ್ಕದ ಬೈತುರ್ಲಿ ಕೇಂದ್ರ ಪ್ರದೇಶದಿಂದ ಅನೇಕ ಶಾಲಾ ಕಾಲೇಜುಗಳಿಗೆ ತೆರಳುವ ವಿದ್ಯಾರ್ಥಿಗಳಿಗೆ ಹಾಗೂ ಕೈಕಂಬ - ಮೂಡುಬಿದಿರೆ - ಕಾರ್ಕಳದತ್ತ ಸಾಗುವ ಪ್ರಯಾಣಿಕರು, ವಯೋವೃದ್ಧರಿಗೆ ಇದು ಪ್ರಮುಖ ತಂಗುದಾಣವಾಗಿದೆ. ಬಸ್ ಪ್ರಯಾಣಿಕರು ಇಲ್ಲಿ ಬಿಸಿಲು - ಮಳೆಗೆ ಆಶ್ರಯ ಪಡೆದುಕೊಳ್ಳುವುದು ವಾಡಿಕೆ. ಇದೀಗ ಪ್ರಯಾಣಿಕರು ಇದರಿಂದ ವಂಚಿತರಾಗಿ ರಸ್ತೆಯಲ್ಲೇ ಬಸ್ ಕಾಯುವಂತಾಗಿದೆ.

https://www.vijayavani.net/broken-electricity-poles

https://www.vijayavani.net/iswaramangala-police-station

https://www.vijayavani.net/inundation-of-kindi-dam