ಯಶವಂತಪುರ - ಕಾರವಾರ ಎಕ್ಸ್‌ಪ್ರೆಸ್ ರೈಲು ಸಂಚಾರ ರದ್ದು!

ಮಂಗಳೂರು: ಶಿರಿಬಾಗಿಲು ಮತ್ತು ಎಡಕುಮಾರಿ ವಿಭಾಗದ ನಡುವೆ ರೈಲ್ವೆ ಟ್ರ್ಯಾಕ್ ಟ್ಯಾಂಪಿಂಗ್ ಹಾಗೂ ಮೆಟೀರಿಯಲ್ ರೈಲು ಕಾಮಗಾರಿ (ಲೈನ್ ಬ್ಲಾಕ್) ಕೈಗೆತ್ತಿಕೊಳ್ಳುತ್ತಿರುವುದರಿಂದ, ನೈಋತ್ಯ ರೈಲ್ವೆಯು ಯಶವಂತಪುರ - ಕಾರವಾರ - ಯಶವಂತಪುರ (ರೈಲು ಸಂಖ್ಯೆ 16515/16516) ವಾರಾಂತ್ಯದ ಎಕ್ಸ್‌ಪ್ರೆಸ್ ರೈಲು ಸೇವೆಗಳನ್ನು ಮುಂದಿನ ಅಕ್ಟೋಬರ್ ಮತ್ತು ನವೆಂಬರ್ ತಿಂಗಳ ನಿರ್ದಿಷ್ಟ ದಿನಗಳಲ್ಲಿ ಸಂಪೂರ್ಣವಾಗಿ ರದ್ದುಗೊಳಿಸಿದೆ.

ಆನ್‌ಲೈನ್ ಟಿಕೆಟ್, ಇ-ಟಿಕೆಟ್ ಬುಕ್ ಮಾಡಿದ ಪ್ರಯಾಣಿಕರಿಗೆ ಯಾವುದೇ ಟಿಡಿಆರ್ ಸಲ್ಲಿಕೆಯ ಅಗತ್ಯವಿಲ್ಲದೆ ಟಿಕೆಟ್ ಮೊತ್ತವನ್ನು ಆಟೋಮ್ಯಾಟಿಕ್ ಆಗಿ ಬ್ಯಾಂಕ್ ಖಾತೆಗೆ ರೀಫಂಡ್ ಮಾಡಲಾಗುತ್ತದೆ. ರೈಲ್ವೆ ರಿಸರ್ವೇಶನ್ ಕೌಂಟರ್‌ನಲ್ಲಿ ಟಿಕೆಟ್ ಪಡೆದ ಪ್ರಯಾಣಿಕರು ನಿಗದಿತ ಸಮಯದೊಳಗೆ ಮೂಲ ಟಿಕೆಟ್ ನೀಡಿ ಸಂಪೂರ್ಣ ಹಣವನ್ನು ಹಿಂಪಡೆಯಬಹುದು. ಕರಾವಳಿ ಮತ್ತು ಮಲೆನಾಡು ಭಾಗಗಳಿಗೆ ಪ್ರಯಾಣಿಸುವ ಪ್ರಯಾಣಿಕರು ಈ ಬದಲಾವಣೆಯನ್ನು ಗಮನಿಸಿ ತಮ್ಮ ಪ್ರಯಾಣದ ಯೋಜನೆಯನ್ನು ರೂಪಿಸಿಕೊಳ್ಳಲು ಕೋರಲಾಗಿದೆ. ಪ್ರಯಾಣಿಕರಿಗೆ ಉಂಟಾದ ಅನಾನುಕೂಲಕ್ಕೆ ರೈಲ್ವೆ ಇಲಾಖೆ ವಿಷಾದಿಸಿದೆ. ಕಾಮಗಾರಿಯ ಹಿನ್ನೆಲೆಯಲ್ಲಿ ಈ ಮಾರ್ಗದಲ್ಲಿ ಪ್ರಯಾಣಿಸುವ ಸಾರ್ವಜನಿಕರಿಗೆ ತೊಂದರೆಯಾಗದಂತೆ ನೈಋತ್ಯ ರೈಲ್ವೆಯ ಮುಖ್ಯ ಸಾರ್ವಜನಿಕ ಸಂಪರ್ಕಾಧಿಕಾರಿ ಸುನಿಲ್ ಬಿ. ನಾರ್ಕರ್ ಮಾಹಿತಿ ನೀಡಿದ್ದಾರೆ.