ಭಾರತೀಯ ಜ್ಞಾನ ಪರಂಪರೆ ಅಧ್ಯಯನ ಅಗತ್ಯ

ಭಾರತದ ಸಮೃದ್ಧ ಪರಂಪರೆ, ಆಚಾರ-ವಿಚಾರ ಮತ್ತು ಸಂಸ್ಕೃತಿಯ ವೈವಿಧ್ಯತೆಯನ್ನು ಆಚರಿಸುವ ನಿಟ್ಟಿನಲ್ಲಿ ಮಂಗಳೂರಿನ ಸೈಂಟ್ ಆಗ್ನೆಸ್ ಕಾಲೇಜು ( ಸ್ವಾಯತ್ತ) ಇದರ ಆಂತರಿಕ ಗುಣಮಟ್ಟ ಭರವಸೆ ಘಟಕ ವತಿಯಿಂದ ಇಂಡಿಯನ್ ನಾಲೆಜ್ ಸಿಸ್ಟಮ್ಸ್(ಐಕೆಎಸ್)ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಇತಿಹಾಸವನ್ನು ಧರ್ಮದ ದೃಷ್ಟಿಕೋಣದಿಂದ ನೋಡದೇ ಸಮಗ್ರವಾಗಿ ಅರ್ಥಮಾಡಿಕೊಳ್ಳಬೇಕು. ಟಿಪ್ಪು ಸುಲ್ತಾನ್ ಮತ್ತು ಶಿವಾಜಿ ಕುರಿತ ಚರ್ಚೆಗಳಿಗಿಂತ ದೇಶದ ಏಕತೆ ಹಾಗೂ ಇತಿಹಾಸದ ಸಂಪೂರ್ಣತೆಯನ್ನು ಅರಿಯುವುದು ಮುಖ್ಯ. ದೇಶದ ವೈವಿಧ್ಯತೆಯನ್ನು ಗೌರವಿಸುವ ಮನೋಭಾವ ಬೆಳೆಸಿಕೊಳ್ಳಬೇಕು ಎಂದರು.

ನಿಟ್ಟೆ ವಿಶ್ವವಿದ್ಯಾಲಯದ ಸಂಶೋಧನ ಮತ್ತು ಅಭಿವೃದ್ಧಿ ಕೇಂದ್ರದ ನಿರ್ದೇಶಕರಾದ ಡಾ. ಇಂದ್ರಾಣಿ ಕಾರುಣಸಾಗರ್ ಮಾತನಾಡಿ, ನಮ್ಮ ದೇಶದ ಮಹತ್ವವನ್ನು ವಿದೇಶಿಗಳು ಗುರುತಿಸಿದಾಗ ಮಾತ್ರ ಅರಿಯುವ ಸ್ಥಿತಿಯನ್ನು ಬಿಟ್ಟು, ಭಾರತದ ವೈಜ್ಞಾನಿಕ ಹಾಗೂ ಸಾಂಸ್ಕೃತಿಕ ಪರಂಪರೆಯ ಮೇಲೆ ಗೌರವ ಮತ್ತು ನಂಬಿಕೆ ಬೆಳೆಸಿಕೊಳ್ಳಬೇಕು. ಮೊಬೈಲ್ ಮತ್ತು ಸಾಮಾಜಿಕ ಜಾಲತಾಣಗಳ ದುರುಪಯೋಗದ ಬಗ್ಗೆ ಎಚ್ಚರಿಕೆ ನೀಡಿದ ಅವರು, ಮೊಬೈಲ್‌ಗಳಿಗೆ ದಾಸರಾಗಬಾರದು, ಅವನ್ನು ಜ್ಞಾನಾರ್ಜನೆಗೆ ಉಪಕರಣಗಳಾಗಿ ಜಾಣ್ಮೆಯಿಂದ ಬಳಸಬೇಕು ಎಂದು ವಿದ್ಯಾರ್ಥಿಗಳಿಗೆ ಸಲಹೆ ನೀಡಿದರು.

ಪ್ರಾಂಶುಪಾಲರಾದ ಸಿಸ್ಟರ್ ಡಾ. ವೆನಿಸ್ಸ ಎ.ಸಿ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು.

ಜೆದ್ದು ಆಯುರ್ವೇದ ವಿಶೇಷ ಆಸ್ಪತ್ರೆಯ ಡಾ. ಗಣಪತಿ ಭಟ್, ಉಪ ಪ್ರಾಂಶುಪಾಲರು ಸಿಸ್ಟರ್ ಡಾ. ರೂಪ ರೋಡ್ರಿಗಸ್, ಐಕ್ಯೂಎಸಿ ಸಂಯೋಜಕರಾದ ಡಾ. ಸಬೀನಾ ಡಿಸೋಜ , ಕಾರ್ಯಕ್ರಮದ ಆಯೋಜಕರು ಡಾ. ವಿಶಾಲ ಬಿ.ಕೆ, ಸ್ನಾತಕೋತ್ತರ ಪದವಿ ಸಂಯೋಜಕರಾದ ಸಿಸ್ಟರ್ ಡಾ ವಿನೋರಾ ಎ.ಸಿ ಮತ್ತಿತರು ಉಪಸ್ಥಿತರಿದ್ದರು.

ಈ ಸಂದರ್ಭದಲ್ಲಿ ಜ್ಞಾನದ ಬೇರುಗಳು: ಭಾರತದ ಜೀವಂತ ಪರಂಪರೆ ಎಂಬ ಪ್ರದರ್ಶನವನ್ನು ಏರ್ಪಡಿಸಲಾಯಿತು. ವಿದ್ಯಾರ್ಥಿಗಳು ವಿವಿಧ ರಾಜ್ಯಗಳ ಸಾಂಸ್ಕೃತಿಕ ವೈಭವವನ್ನು ಜಾನಪದ ಹಾಡು, ಭರತನಾಟ್ಯ ಹಾಗೂ ಜಾನಪದ ನೃತ್ಯಗಳ ಮೂಲಕ ಪ್ರದರ್ಶಿಸಿದರು. ಡಾ. ಹಿತಾಕ್ಷಿ ಕಾರ್ಯಕ್ರಮ ನಿರೂಪಿಸಿದರು.

"