ಪಿಲಿಕುಳದ ಜೈವಿಕ ಉದ್ಯಾನವನ, ಲೇಕ್ ಗಾರ್ಡನ್ ಮತ್ತು ಪ್ಲಾನೆಟೋರಿಯಂಗೆ ಭೇಟಿ ನೀಡುವ ಪ್ರವಾಸಿಗರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ದಾಖಲೆ ಮಟ್ಟದಲ್ಲಿ ಏರಿಕೆಯಾಗುತ್ತಿದೆ. 2022-23ನೇ ಸಾಲಿನಲ್ಲಿ ದಾಖಲೆಯ 5,91,219, 2023-24ರಲ್ಲಿ 5,49,228, 2024-25ರಲ್ಲಿ 4,73,617 ಮಂದಿ ಭೇಟಿ ನೀಡಿದ್ದಾರೆ. 2025-26 ಜನವರಿವರೆಗೆ 3.72 ಲಕ್ಷ ಮಂದಿ ಪಿಲಿಕುಳಕ್ಕೆ ಭೇಟಿ ನೀಡಿದ್ದಾರೆ. 2025-26 ಜನವರಿಯ ತನಕದ ಲೆಕ್ಕಾಚಾರ ಪ್ರಕಾರ 2,19,910 ಹಿರಿಯರು, 1,48,682 ಮಕ್ಕಳು ಪ್ರವಾಸಿಗರಾಗಿ ಪಿಲಿಕುಳಕ್ಕೆ ಬಂದಿದ್ದಾರೆ. ಆದರೆ, ಈ ಆದಾಯ ಪಿಲಿಕುಳದ ಬೊಕ್ಕಸಕ್ಕೆ ಸರಿಯಾಗಿ ಸೇರುತ್ತಿಲ್ಲ. ಟಿಕೆಟ್ ಕೌಂಟರ್ ಸಿಬ್ಬಂದಿ ಮತ್ತು ಭದ್ರತಾ ಅಧಿಕಾರಿಗಳು ಶಾಮೀಲಾಗಿ ಕರಾಮತ್ತು ಪ್ರದರ್ಶಿಸಿದ್ದಾರೆ. ಉದಾಹರಣೆಗೆ 50 ಜನರಿಗೆ ಮಾತ್ರ ಟಿಕೆಟ್ ನೀಡಿ 100 ಮಂದಿಯನ್ನು ಒಳಗೆ ಬಿಡುತ್ತಿದ್ದಾರೆ. ಈ ಮೂಲಕ ಸಂಗ್ರಹವಾಗುವ ಅರ್ಧದಷ್ಟು ಹಣವು ಇಬ್ಬರು ಟಿಕೆಟ್ ಕೌಂಟರ್ ಸಿಬ್ಬಂದಿ ಮತ್ತು ಭದ್ರತಾ ಅಧಿಕಾರಿಯ ಕಿಸೆ ಸೇರುತ್ತಿದೆ. ಈ ಬಗ್ಗೆ ಪ್ರಶ್ನಿಸಿದಾಗ ಪಿಲಿಕುಳದ ಆಯಕ್ತರಿಗೆ, ಎಡಿಸಿ, ಜಿಲ್ಲಾಧಿಕಾರಿಗಳಂತಹ ಉನ್ನತ ಅಧಿಕಾರಿಗಳಿಗೆ ಇದರಲ್ಲಿ ಪಾಲು ನೀಡಬೇಕು ಎಂಬ ‘ದಯಾ’ನೀಯ ಸಬೂಬು ತಂತ್ರವನ್ನೂ ಬಳಸಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ.
