ಮಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಯಾವುದೇ ಅಧಿಕೃತ ವ್ಯಾಪಾರ ಪರವಾನಗಿ ಇಲ್ಲದೆ ನೂರಾರು ಪಿಜಿಗಳು ವಸತಿ ಪ್ರದೇಶಗಳಲ್ಲಿ ಎಗ್ಗಿಲ್ಲದೆ ಕಾರ್ಯನಿರ್ವಹಿಸುತ್ತಿವೆ. ನಿಯಮಗಳ ಪ್ರಕಾರ ಪಿಜಿ ನಡೆಸಲು ಪ್ರತ್ಯೇಕ ಸ್ವತಂತ್ರ ಮನೆ ಹಾಗೂ ವಾಣಿಜ್ಯ ಪರವಾನಗಿ ಕಡ್ಡಾಯವಾಗಿದ್ದರೂ, ಬಹುತೇಕ ಪಿಜಿಗಳು ವಸತಿ ಸಮುಚ್ಚಯಗಳಲ್ಲೇ (ಫ್ಲಾಟ್ಸ್) ರಾಜಾರೋಷವಾಗಿ ನಡೆಯುತ್ತಿರುವುದು ನಾಗರಿಕರ ಆಕ್ರೋಶಕ್ಕೆ ಕಾರಣವಾಗಿದೆ. ಮಂಗಳೂರು ನಗರದ ಸೌಂದರ್ಯ ಮತ್ತು ಸುರಕ್ಷತೆಯ ಹಿತದೃಷ್ಟಿಯಿಂದ, ಜಿಲ್ಲಾಡಳಿತ, ಮಹಾನಗರ ಪಾಲಿಕೆ ಮತ್ತು ಪೊಲೀಸ್ ಇಲಾಖೆ ಜಂಟಿ ಕಾರ್ಯಾಚರಣೆ ನಡೆಸಿ ಈ ಅನಧಿಕೃತ ಪಿಜಿ ಜಾಲಕ್ಕೆ ಮುಕ್ತಿ ನೀಡುವ ಕಾರ್ಯಕ್ಕೂ ಮುಂದಾಗುತ್ತಿಲ್ಲ. ವಿಜಯವಾಣಿಗೆ ಲಭ್ಯ ಮಾಹಿತಿಯಂತೆ ಮಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ 48 ಹಾಸ್ಟೇಲ್, 417 ಪಿಜಿ ನಡೆಸಲು ಪರವಾಣಗಿ ನೀಡಲಾಗಿದೆ. 2026 ನೇ ಸಾಲಿನಲ್ಲಿ ಬಹುತೇಕ ಪಿಜಿ ಗಳು ತಮ್ಮ ಪರವಾಣಗಿಗಳನ್ನು ನವೀಕರಿಸಿಲ್ಲ, ಆದರೆ ಈ ನವೀಕರಿಸದ ಪಿಜಿಗಳು ಎಂದಿನಂತೆ ಕಾರ್ಯನಿರ್ವಹಿಸುತ್ತಿದೆ.
