ಡ್ರೋನ್ ಮ್ಯಾಪಿಂಗ್ ಕೈಬಿಟ್ಟ ಪಾಲಿಕೆ

ಕರ್ನಾಟಕದಲ್ಲೇ ಪ್ರಥಮ ಪ್ರಯೋಗ ಮಂಗಳೂರು ನಗರದ 60 ವಾರ್ಡ್‌ಗಳ ಸಂಪೂರ್ಣ ವಿವರವನ್ನು ಪಡೆಯುವ, ಖಾಸಗಿ-ಸರ್ಕಾರಿ ಆಸ್ತಿಗಳ ಲೆಕ್ಕಾಚಾರ ನಡೆಸುವ ಬಹು ಮಹತ್ವದ 3ಡಿ ಡಿಜಿಟಲ್ ಡ್ರೋನ್ ಸರ್ವೆಗೆ ನಿರ್ಧರಿಸಲಾಗಿತ್ತಾದರೂ ಇದು ಸದ್ಯಕ್ಕೆ ನಡೆಯುವ ಸಾಧ್ಯತೆ ಇಲ್ಲ. ಪಾಲಿಕೆಯು ತೆರಿಗೆ ಸಂಗ್ರಹದಲ್ಲಿ ಇನ್ನಷ್ಟು ಪರಿಣಾಮಕಾರಿಯಾಗುವುದು ಹಾಗೂ ಮಂಗಳೂರಿನ ಸಮಗ್ರ ಮಾಹಿತಿಯುಕ್ತ ದಾಖಲೆ ಸಿದ್ಧಪಡಿಸುವ ಉದ್ದೇಶದಿಂದ ಸರ್ವೆ ನಡೆಸಲು ಚಿಂತನೆ ಆಗಿತ್ತು. ಕ್ಯಾಮೆರಾದಲ್ಲೇ ನಗರದ ಇಂಚಿಂಚೂ ಸಮೀಕ್ಷೆ, ನಗರದ ಸಂಪೂರ್ಣ ಆಸ್ತಿಗಳ ದಾಖಲೀಕರಣ, ಕಟ್ಟಡಗಳ ಸೆಟ್‌ಬ್ಯಾಕ್ ನಿಯಮ ಉಲ್ಲಂಘನೆ ಮೇಲೆ ಕಣ್ಣು,ರಾಜ ಕಾಲುವೆಗಳ ಒತ್ತುವರಿ ಮೇಲೆ ನಿಗಾ ಈ ಸಮೀಕ್ಷೆಯ ಪ್ರಮುಖ ಉದ್ದೇಶವಾಗಿತ್ತು. ಆದರೆ ಪಾಲಿಕೆ ಮಾತ್ರ ಅನುದಾನದ ಕೊರತೆ ನೆಪವೊಡ್ಡಿ ಯೋಜನೆಯನ್ನೇ ಕೈಬಿಟ್ಟಿದೆ.

"

ಆರಂಭದಲ್ಲಿ ಮಂಗಳೂರು ನಗರದ ಮಧ್ಯದ 3 ಚದರ ಕಿ.ಮೀ. ವ್ಯಾಪ್ತಿಯಲ್ಲಿ ಸಮೀಕ್ಷೆ ನಡೆಸಿ ನಂತರ ಇಡೀ ನಗರಕ್ಕೆ ವಿಸ್ತರಿಸುವ ಯೋಜನೆ ಇದು. ಮಂಗಳೂರು ಮಹಾನಗರ ಪಾಲಿಕೆಯು ಹೈದರಾಬಾದ್‌ನ ಎಕ್ಸ್‌ವೈಝೆಡ್ ಇನ್ನೊವೇಶನ್ ಟೆಕ್ನಾಲಜೀಸ್ ಸಂಸ್ಥೆ ಮೂಲಕ ಹಂಪನಕಟ್ಟೆ ಕ್ಲಾಕ್ ಟವರ್‌ನಿಂದ ಆರಂಭಿಸಿ, ರೈಲ್ವೆ ನಿಲ್ದಾಣ, ಜಿಲ್ಲಾಧಿಕಾರಿ ಕಚೇರಿ, ಬಂದರಿನ ಸ್ವಲ್ಪ ಭಾಗ, ಕಾರ್ ಸ್ಟ್ರೀಟ್ ಮೂಲಕ ಕೆನರಾ ಕಾಲೇಜು ತನಕದ ಸುಮಾರು 4.5 ಕಿ.ಮೀ. ವ್ಯಾಪ್ತಿಯಲ್ಲಿ ಆರಂಭಿಕ ಸರ್ವೆ ನಡೆಸಿದೆ. ಈ ಸಮೀಕ್ಷೆ ನಡೆಸಿದ ಪ್ರದೇಶದ ಒಳ್ಳೆಯ ಮತ್ತು ಕೆಟ್ಟ ರಸ್ತೆಗಳು, ಒಳಚರಂಡಿ, ರಸ್ತೆಗಳು, ಬೀದಿದೀಪ, ಫುಟ್‌ಪಾತ್, ಕಸದ ತೊಟ್ಟಿಗಳು, ಸರಕಾರಿ ಕಟ್ಟಡಗಳು, ನಿರ್ಮಾಣ ಹಂತದ ಕಟ್ಟಡಗಳು, ಪಾರ್ಕ್‌ಗಳು, ಆಟದ ಮೈದಾನ, ನೀರಿನ ಟ್ಯಾಂಕಿ, ರಸ್ತೆಯ ಬದಿಯ ಹೋಡಿರ್ಂಗ್‌ಗಳು ಸೇರಿದಂತೆ ಸಮಗ್ರ ಮಾಹಿತಿ ಸ್ಪಷ್ಟವಾಗಿ ವೀಕಿಕ್ಷಿಸಲು ಸಾಧ್ಯವಾಗಿದೆ.

ಖಾಸಗಿ ಮತ್ತು ಸರ್ಕಾರಿ ಆಸ್ತಿಗಳನ್ನು (ಮನೆ, ನಿವೇಶನ, ವಾಣಿಜ್ಯ ಕಟ್ಟಡ, ಕೈಗಾರಿಕೆ ಕಟ್ಟಡ ಇತ್ಯಾದಿ) ಆಸ್ತಿ ತೆರಿಗೆ ವ್ಯಾಪ್ತಿಗೆ ಒಳಪಡಿಸುವ ಸಂಬಂಧ ಜಿಪಿಎಸ್ ಆಧಾರಿತವಾಗಿ 3 ಡಿ ಸ್ವರೂಪದಲ್ಲಿ ಸರ್ವೇ ಇದಾಗಿತ್ತು. ಟೆಂಡರ್ ಪಡೆದ ಖಾಸಗಿ ಸಂಸ್ಥೆಯು ಡಾಟಾ ನಮೂದು ಮಾಡಿ ಪಾಲಿಕೆಗೆ ಹಸ್ತಾಂತರಿಸಬೇಕಿತ್ತು. ಮಹಾನಗರ ಪಾಲಿಕೆ ಅಧಿಕಾರಿಗಳು ಹೈದರಾಬಾದ್‌ಗೆ ತರಬೇತಿಗೆ ಹೋಗಿದ್ದಾಗ, ಡ್ರೋನ್ ಸರ್ವೆ ಮಾಹಿತಿ ಪಡೆದು ಅವರಿಂದ ಪ್ರಾಯೋಗಿಕ ಸಮೀಕ್ಷೆ ನಡೆಸಲಾಗಿದೆ. 3 ಚದರ ಕಿ.ಮೀ. ಸರ್ವೆಗೆ ಸುಮಾರು ಒಂದು ಲಕ್ಷ ರೂ. ಖರ್ಚಾಗಿದೆ. ಸಂಪೂರ್ಣ ಸರ್ವೆ ಮಾಡಲು ಸುಮಾರು 35 ಲಕ್ಷ ರೂ. ಖರ್ಚು ಬರಲಿದೆ. ಇದಕ್ಕೆ ಹೆಚ್ಚುವರಿ ಹಣವೂ ಬೇಕು. ಹೀಗಾಗಿ ಸದ್ಯಕ್ಕೆ ಈ ಸರ್ವೆ ಯೋಜನೆಯನ್ನೇ ಪಾಲಿಕೆ ಕೈಬಿಟ್ಟಿದೆ.