ಜೈಲು ಹಕ್ಕಿಗಳಿಂದ ಹೊಸತನದ ಕ್ರಾಂತಿ : ಚೀಮೇನಿ ತೆರೆದ ಜೈಲಿನಲ್ಲಿ ಕೋಟಿ ರೂ. ಆದಾಯ

ಕುಕೃತ್ಯಗಳಲ್ಲಿ ಶಿಕ್ಷೆಗೊಳಗಾಗಿ ಜೈಲು ಪಾಲಾಗಿರುವ ಕೈದಿಗಳು ಮತ್ತು ಅವರ ಬದುಕಿನ ಬಗ್ಗೆ ವಿಭಿನ್ನ ಗ್ರಹಿಕೆ ಎಲ್ಲರಲ್ಲಿರುತ್ತವೆ. ಆದರೆ ಇದಕ್ಕೆಲ್ಲ ಅಪವಾದವೆಂಬಂತೆ ಕಾಸರಗೋಡಿನ ಚೀಮೇನಿಯಲ್ಲಿರುವ ತೆರೆದ ಜೈಲಲ್ಲಿ ಹೊಸ ಪ್ರಪಂಚ ಸೃಷ್ಟಿಯಾಗಿದ್ದು, ಕೈದಿಗಳಿಂದ ಆಹಾರ ತಯಾರಿ, ಕೃಷಿ ಮೊದಲಾದ ಚಟುವಟಿಕೆಗಳಿಂದ ಚೀಮೇನಿ ತೆರೆದ ಜೈಲಿಗೆ ಕೋಟ್ಯಂತರ ರೂ. ಆದಾಯ ಬರುತ್ತಿದೆ.

ಚಪಾತಿ, ಬಿರಿಯಾನಿಗಳನ್ನು ಈ ಜೈಲಿನಲ್ಲಿ ತಯಾರಿಸುತ್ತಿದ್ದು, ಜೈಲಿನ ದ್ವಾರದ ಸಮೀಪ ಕ್ಯಾಂಟೀನ್ ತೆರೆಯಲಾಗಿದೆ. ಕೃಷಿ ಕೂಡ ಇಲ್ಲಿನ ಪ್ರಧಾನ ಆದಾಯ ಮೂಲವಾಗಿದೆ. 2013ರಲ್ಲಿ ತೆರೆದ ಜೈಲಿನಲ್ಲಿ ಆಹಾರ ಘಟಕ ಆರಂಭಿಸಲಾಗಿತ್ತು. ಆರಂಭದಲ್ಲಿ ಚಪಾತಿ ಹಾಗೂ ಬಿರಿಯಾನಿ ವಿತರಿಸಲಾಗುತ್ತಿತ್ತು. 2017ರಲ್ಲಿ ಕೆಫೆ ಆರಂಭಿಸಿದ್ದು, ಬಳಿಕ ಆದಾಯ ಹೆಚ್ಚಿತು. ಇದುವರೆಗೆ ಆಹಾರ ಘಟಕದಿಂದ 22 ಕೋಟಿ ರೂ. ಆದಾಯ ಲಭಿಸಿದೆ. ಈ ಬಾರಿ 3 ಕೋಟಿ ರೂ. ಲಾಭ ಬಂದಿದ್ದು, ಅದರಲ್ಲಿ 2 ಕೋಟಿ ರೂ. ಸರ್ಕಾರಕ್ಕೆ ಪಾವತಿಸಲಾಗಿದೆ.

ಜೈಲಿನ ಕೆಫೆಯಲ್ಲಿ ಗ್ರಾಹಕರ ದಟ್ಟಣೆ ಇದ್ದು, ಉತ್ತಮ ವ್ಯಾಪಾರ ನಡೆಯುತ್ತಿದೆ. ಇಲ್ಲಿ ಚಿಕನ್ ಬಿರಿಯಾನಿ, ಚಪಾತಿ, ಚಹಾ, ವಿವಿಧ ತಿಂಡಿಗಳು ಲಭ್ಯವಿವೆ. ಹತ್ತು ರೂ.ಗೆ ಇಲ್ಲಿ ಎಣ್ಣೆ ತಿಂಡಿ ಹಾಗೂ ಚಹಾ ಲಭಿಸುತ್ತದೆ. 70 ರೂ.ಗೆ ಬಿರಿಯಾನಿ, 3 ರೂ.ಗೆ ಚಪಾತಿ ನೀಡಲಾಗುತ್ತದೆ. ಜೈಲಿನಲ್ಲಿರುವ ಫಾರಂನ ಕೋಳಿಗಳನ್ನು ಮಾಂಸಕ್ಕಾಗಿ ಉಪಯೋಗಿಸಲಾಗುತ್ತಿದೆ. ಅವಶ್ಯಕತೆಗಿಂತ ಹೆಚ್ಚಿರುವ ಕೋಳಿಗಳನ್ನು ಕಣ್ಣೂರು ಸೆಂಟ್ರಲ್ ಜೈಲಿಗೆ ನೀಡಲಾಗುತ್ತದೆ.

ಜೈಲಿನ 30 ಎಕರೆಗಳಷ್ಟು ಪ್ರದೇಶ ಬಳಸಿ ಕೃಷಿ, ಪಶುಸಂಗೋಪನೆ, ಕೋಳಿ ಸಾಕಣೆ, ಮೀನು ಸಾಕಣೆ ನಡೆಸಲಾಗುತ್ತಿದ್ದು, ಜೈಲು ಪ್ರವಾಸಿ ಕೇಂದ್ರವಾಗುವ ದಿನ ದೂರವಿಲ್ಲ ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ. ಜೈಲಿನ ಆವರಣದ ವಿಶಾಲವಾದ ಪ್ರದೇಶದಲ್ಲಿ ಕೈದಿಗಳು ಕೃಷಿ ಮಾಡುತ್ತಿದ್ದು, ಇದುವರೆಗೆ ತರಕಾರಿಯಿಂದಲೇ 1.25 ಕೋಟಿ ರೂ. ಆದಾಯ ಪಡೆಯಲಾಗಿದೆ. ಜೈಲಿನ ಅವಶ್ಯಕತೆ ಬಳಿಕ ಉಳಿದ ತರಕಾರಿಗಳನ್ನು ಕೆಫೆ ಮೂಲಕ ಮಾರಾಟ ಮಾಡಲಾಗುತ್ತದೆ. ಈ ತರಕಾರಿಗಳನ್ನು ರಾಸಾಯನಿಕ ಗೊಬ್ಬರಗಳು, ಕೀಟನಾಶಕಗಳನ್ನು ಉಪಯೋಗಿಸದೆ ಬೆಳೆಸಲಾಗುತ್ತಿದೆ. ತರಕಾರಿಗಳು ಮಾತ್ರವಲ್ಲದೆ ಬಾಳೆ ಹಾಗೂ ಗೆಣಸು ಕೃಷಿ ಮಾಡಲಾಗುತ್ತಿದೆ. ಹಸು, ಕೋಳಿ, ಆಡುಗಳ ಫಾರ್ಮ್ ಇದ್ದು, ಇವುಗಳ ಗೊಬ್ಬರವನ್ನೇ ಕೃಷಿಗೆ ಉಪಯೋಗಿಸಲಾಗುತ್ತದೆ. ಪ್ರಸ್ತುತ ಇಲ್ಲಿ 200 ಮಂದಿ ಕೈದಿಗಳಿದ್ದಾರೆ.

ಚಿಮೇನಿ ಜೈಲಿನ ಕ್ಯಾಂಟೀನ್.