ಜಿಲ್ಲೆಯಲ್ಲಿ ವರ್ಷಕ್ಕೆ 800 ಸೈಬರ್​ ಕ್ರೈಂ

ತುಮಕೂರು: ಜಿಲ್ಲೆಯಲ್ಲಿ ಪ್ರತಿ ವರ್ಷ ಸರಾಸರಿ 8000 ಅಪರಾಧ ಪ್ರಕರಣಗಳು ದಾಖಲಾಗುತ್ತಿದ್ದರೆ, ಅದರಲ್ಲಿ 800 ಸೈಬರ್​ ಅಪರಾಧಗಳು ನಡೆಯುತ್ತಿವೆ ಎಂದು ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಕೆ.ವಿ.ಅಶೋಕ್​ ಹೇಳಿದರು.

ನಗರ ಕೇಂದ್ರ ಗ್ರಂಥಾಲಯ ಸಭಾಂಗಣದಲ್ಲಿ ಜಿಲ್ಲಾ ಪೊಲೀಸ್​ ಮತ್ತು ತುಮಕೂರು ಸ್ಮಾರ್ಟ್​ಸಿಟಿ ಲಿಮಿಟೆಡ್​ ಸಹಯೋಗದಲ್ಲಿ ಬುಧವಾರ ಪೊಲೀಸರಿಗೆ ಹಮ್ಮಿಕೊಂಡಿದ್ದ ಜಿಲ್ಲಾಮಟ್ಟದ ಸೈಬರ್​ ಸುರಕ್ಷತಾ ಕಾರ್ಯಗಾರ ಉದ್ಘಾಟಿಸಿ ಮಾತನಾಡಿದ ಅವರು, ಮುಂದಿನ ದಿನಗಳಲ್ಲಿ ನಡೆಯಲಿರುವ ಅಪರಾಧಗಳಲ್ಲಿ ಶೇ.50ಕ್ಕು ಹೆಚ್ಚು ಸೈಬರ್​ ಅಪರಾಧಗಳಿಗೆ ಸಂಬಂಧಿಸಿದ ಪ್ರಕರಣಗಳೇ ದಾಖಲಾಗಲಿವೆ ಎಂದರು.

ಸೈಬರ್​ ಕೃತ್ಯಗಳಿಗೆ ನಗರ, ಹಳ್ಳಿ ಎಂಬ ಗಡಿಯಿಲ್ಲ. ಗ್ರಾಮೀಣ ಭಾಗದಲ್ಲೂ ಸೈಬರ್​ ಕ್ರೈಂಗಳೇ ಹೆಚ್ಚು ದಾಖಲಾಗುತ್ತಿವೆ. ಹಾಗಾಗಿ, ಪ್ರತಿಯೊಬ್ಬ ಪೊಲೀಸರು ಇಲಾಖೆಗೆ ಸವಾಲೆನಿಸಿರುವ ಸೈಬರ್​ ಕ್ರೈಂ ಬಗ್ಗೆ ಅರಿವು ಹೊಂದಿರಬೇಕು. ಕಾರ್ಯಗಾರದಲ್ಲಿ ಕಲಿಯುವುದರ ಜತೆಗೆ ಈ ಬಗ್ಗೆ ಕುತೂಹಲ ಹೊಂದುವ ಮೂಲಕ ಖುದ್ದು ಆಸಕ್ತಿಯಿಂದ, ಕಂಪ್ಯೂಟರ್​ ಬಗ್ಗೆ ಜ್ಞಾನವುಳ್ಳವರಿಂದ ತಿಳಿದು ಕೇಳಿ ಕಲಿಯಬೇಕು. ಆಗ ಉತ್ತಮ ಸೇವೆ ಸಲ್ಲಿಸಲು, ಸೈಬರ್​ ಅಪರಾಧಗಳನ್ನು ಬೇಧಿಸಲು ಸಾಧ್ಯವಾಗಲಿದೆ ಎಂದು ತಿಳಿಸಿದರು.

ಸಾಫ್ಟ್​ವೇರ್​ ಮಾತ್ರವಲ್ಲದೆ ಹಾರ್ಡ್​ವೇರ್​ ಮೂಲಕ ಕೂಡ ವಂಚನೆ ನಡೆಯುತ್ತಿದ್ದು ಸೈಬರ್​ ಸುರಕ್ಷತೆ ಹೊಸ ಭಾಷೆಯನ್ನು ಕಲಿಯಬೇಕು. ಎಟಿಎಂ ಸ್ಕಿಮ್ಮಿಂಗ್​ ಪ್ರಕರಣಗಳು ದಾಖಲಾಗುತ್ತಿದ್ದು ಸೈಬರ್​ ಸುರಕ್ಷತೆಗೆ ಸಂಬಂಧಿಸಿದಂತೆ ಸಾಫ್ಟ್​ವೇರ್​ ಮತ್ತು ಹಾರ್ಡ್​ವೇರ್​ ಭಾಷೆಗಳನ್ನು ಎಲ್ಲರು ಕಲಿಯಬೇಕಿದೆ. ಈ ನಿಟ್ಟಿನಲ್ಲಿ ಸೈಬರ್​ ಸುರಕ್ಷತಾ ಕ್ರಮಗಳು ಹಾಗೂ ಬೇಧಿಸುವ ರೀತಿ ಬಗ್ಗೆ ಪ್ರತಿಯೊಬ್ಬ ಪೊಲೀಸರು ಅರಿತಿರುವಂತೆ ಸಲಹೆ ನೀಡಿದರು.

ಸೈಬರ್​ ಜಗತ್ತಿನ ಪರಿಧಿಯೇ ಬೇರೆ. ಅದು ಭೂಮಿಯಲ್ಲಿಲ್ಲ. ಸೈಬರ್​ ವಂಚಕರು ಚಾಪೆ ಕೆಳಗೆ ನುಸುಳಿದರೆ ಪೊಲೀಸರು ರಂಗೋಲಿ ಕೆಳಗೆ ನುಸುಳುವ ತಂತ್ರಜ್ಞಾನ ಹೊಂದಿರಬೇಕು. ಅಪರಾಧ ಕೃತ್ಯಗಳ ಪತ್ತೆಗೆ ಹೊರರಾಜ್ಯಗಳಿಗೆ ತೆರಳಿ ಆರೋಪಿಗಳನ್ನು ಪತ್ತೆ ಮಾಡುವ ವೇಳೆ ನಮ್ಮ ಪೊಲೀಸರು ಅಲ್ಲಿನ ಭಾಷೆ, ವಾತಾವರಣಕ್ಕೆ ಹೊಂದಿಕೊಳ್ಳುವಂತೆ ಸೈಬರ್​ ಅಪರಾಧಗಳನ್ನೂ ಬೇಧಿಸಲು ಅತ್ಯಗತ್ಯ ಜ್ಞಾನ ಹೊಂದಿರಬೇಕು ಎಂದರು.

ಕಾರ್ಯಾಗಾರದಲ್ಲಿ ಎಎಸ್​ಪಿ ವಿ.ಮರಿಯಪ್ಪ, ಸೈಬರ್​ ಸುರಕ್ಷತಾ ಪರಿಣಿತ ಕಾರ್ತಿಕ್​ ರಾವ್​ಬೊಪ್ಪನಾಡು ಉಪಸ್ಥಿತರಿದ್ದರು.