ಮುದ್ದಾದ ಕಂದನನ್ನೇ ಕೊಂದ ನಿರ್ದಯಿ ತಾಯಿ

ಚನ್ನಪಟ್ಟಣ

ಸಂತಾನಭಾಗ್ಯ ಇಲ್ಲ ಎಂದು ಕೊರಗುವ ಸಾವಿರಾರು ತಾಯಂದಿರ ಮಧ್ಯೆ, ಇಲ್ಲೋರ್ವ ನಿರ್ದಯಿ ತಾಯಿಯೊಬ್ಬಳು ತನ್ನ ಮುದ್ದಾದ ಗಂಡುಮಗುವನ್ನು ನದಿಗೆ ಎಸೆದು ಸಾಯಿಸಿರುವ ಅಮಾನವೀಯ ಘಟನೆ ತಾಲೂಕಿನ ಕಾಲಿಕೆರೆ ಗ್ರಾಮದಲ್ಲಿ ನಡೆದಿದೆ.

ಗ್ರಾಮದ ಭಾಗ್ಯ ಎಂಬಾಕೆಯೇ ಈ ನಿರ್ದಯಿ ತಾಯಿ. ಈಕೆ ತನ್ನ ಒಂದೂವರೆ ವರ್ಷದ ಗಂಡುಮಗುವನ್ನು ಬಾಣಗಳ್ಳಿ ಹಾಗೂ ಕೊಂಡಾಪುರ ಗ್ರಾಮದ ಮದ್ಯೆ ಇರುವ ಕಣ್ವ ಹೊಳೆಗೆ ಎಸೆದು ಸಾಯಿಸಿದ್ದಾಳೆ. ಮಂಗಳವಾರ ಸಂಜೆ ಈಕೆ ಈ ಪೈಶಾಚಿಕ ಕೃತ್ಯ ಎಸಗಿದ್ದು, ಬುಧವಾರ ಬೆಳಿಗ್ಗೆ ಮಗುವಿನ ಮೃತದೇಹ ಪತ್ತೆಯಾಗಿದೆ.

ಕಾಲಿಕೆರೆ ಗ್ರಾಮದ ಭಾಗ್ಯ ಎಂಬಾಕೆಯನ್ನು ಮದುವೆ ಮಾಡಿಕೊಡಲಾಗಿತ್ತು. ಆದರೆ, ಈಕೆ ಗಂಡನನ್ನು ತೊರೆದು ತಾಯಿಯ ಜೊತೆ ವಾಸವಿದ್ದಳು.

ಮಂಗಳವಾರ ಸಂಜೆ ತಾಯಿಯೊಂದಿಗೆ ಕ್ಷುಲ್ಲಕ ವಿಚಾರಕ್ಕೆ ಜಗಳವಾಡಿಕೊಂಡಿದ್ದ, ಈ ಭಾಗ್ಯ, ಮುದ್ದಾದ ಮಗುವಿನ ಬದುಕುವ ಭಾಗ್ಯ ಕಸಿದುಕೊಂಡಿದ್ದಾಳೆ. ಈ ನಿರ್ದಯಿ ತಾಯಿಯ ಕೃತ್ಯ ಆಕ್ರೋಶಕ್ಕೆ ಕಾರಣವಾಗಿದೆ.