ಘಟನೆ ವಿವರ: ಶಿಂಷಾ ಗ್ರಾಮದ ಎಸ್.ಮೇರಿ ಅವರು ಶ್ಯಾಮೋಲ್ ಎಜುಕೇಷನ್ ಚಾರಿಟಬಲ್ ಟ್ರಸ್ಟ್ ಎಂಬ ಹೆಸರಿನಲ್ಲಿ ನೋಂದಣಿ ಮಾಡಿಸಿಕೊಂಡಿದ್ದು, ಶಂಭುಲಿಂಗ ಸ್ವಾಮೀಜಿ ಕಳೆದ ಮೂರು ತಿಂಗಳ ಹಿಂದೆ ಎಸ್.ಮೇರಿ ಅವರ ಬಳಿಗೆ ಸೂರ್ಯ ಎಂಬ ವ್ಯಕ್ತಿಯನ್ನು ಕರೆದೊಯ್ದು ಇವರು ದೊಡ್ಡ ಉದ್ಯಮಿಯಾಗಿದ್ದು, ನಿಮ್ಮ ಟ್ರಸ್ಟ್ ಅಭಿವೃದ್ಧಿಗೆ ದೇಣಿಗೆ ಕೊಡುತ್ತಾರೆ ಎಂದು ಪರಿಚಯಿಸಿದ್ದಾರೆ. ಅವರ ಭರವಸೆಯ ಮಾತುಗಳನ್ನು ನಂಬಿದ್ದ ಮಹಿಳೆ ತಮ್ಮ ಕಚೇರಿಗೆ ಶಂಭುಲಿಂಗ ಸ್ವಾಮೀಜಿ ಮತ್ತು ಸೂರ್ಯ ಅವರನ್ನು ಆಹ್ವಾನಿಸಿ ಟ್ರಸ್ಟ್ ಅಧ್ಯಕ್ಷ ಮೇರಿನ್ ಪಿಂಟೋ ಅವರ ಜತೆಗೂಡಿ ಅಭಿನಂದಿಸಿದ್ದರು. ಇದೇ ವೇಳೆ ಸೂರ್ಯ ಎಂಬ ನಕಲಿ ಉದ್ಯಮಿ ನಿಮ್ಮ ಟ್ರಸ್ಟ್ಗೆ 25 ಕೋಟಿ ರೂ. ದೇಣಿಗೆ ನೀಡುತ್ತೇನೆ. ಬದಲಿಗೆ 1 ಕೋಟಿ 10 ಲಕ್ಷ ರೂ.ಗಳನ್ನು ನಮಗೆ ತೆರಿಗೆ ಕಟ್ಟಲು ನಗದು ರೂಪದಲ್ಲಿ ಹಣ ಕೊಡಬೇಕೆಂದು ನಂಬಿಸಿದ್ದಾರೆ. ಇದನ್ನು ನಂಬಿದ ಮಹಿಳೆ ಹಣವನ್ನು ಹೊಂದಿಸಿಕೊಂಡು ಜ.19ರಂದು ಇಬ್ಬರು ಆರೋಪಿಗಳಿಗೆ ವಿಷಯ ತಿಳಿಸಿದ್ದಾರೆ. ಅದರದಂತೆ ಸೂರ್ಯ ಚೀಲದಲ್ಲಿ ನಕಲಿ ನೋಟುಗಳನ್ನು ತುಂಬಿಸಿಕೊಂಡು ಜ.20 ರಂದು ಕಾರಿನಲ್ಲಿ ಶಿಂಷಾಪುರದ ಮೇರಿ ಅವರ ಮನೆಗೆ ಆಗಮಿಸಿದ್ದು, ಅವರ ಬಳಿ ಇದ್ದ 1.10 ಕೋಟಿ ರೂ.ಗಳನ್ನು ಪಡೆದುಕೊಂಡು ತಾವು ತಂದಿದ್ದ ನಕಲಿ ನೋಟುಗಳಿದ್ದ ಚೀಲವನ್ನು ನೀಡಿದ್ದಾನೆ. ನಂತರ ಔಪಚಾರಿಕ ವಿಚಾರಗಳ ಬಗ್ಗೆ ಮಾತನಾಡುತ್ತ ತಾವೇ ತಂದಿದ್ದ ಜ್ಯೂಸ್ ಅನ್ನು ಟ್ರಸ್ಟ್ ಅಧ್ಯಕ್ಷ ಮೇರಿನ್ ಪಿಂಟೋ ಮತ್ತು ಎಸ್.ಮೇರಿ ಅವರಿಗೆ ಕುಡಿಸಿದ್ದು, ಸ್ವಲ್ಪ ಸಮಯದಲ್ಲಿ ಇಬ್ಬರೂ ಪ್ರಜ್ಞೆ ಕಳೆದುಕೊಂಡ ನಂತರ ಹಣದೊಡನೆ ಆರೋಪಿ ಸೂರ್ಯ ಪರಾರಿಯಾಗಿದ್ದನು.
ಎಚ್ಚರವಾದಾಗ ಕೂಡಲೇ ಮಳವಳ್ಳಿ ಪೊಲೀಸ್ ಠಾಣೆಯ ಡಿವೈಎಸ್ಪಿ ಕೃಷ್ಣಪ್ಪ ಅವರಿಗೆ ಮಾಹಿತಿ ನೀಡಿದ್ದರು. ಅವರ ಸಲಹೆಯಂತೆ ಬೆಳಕವಾಡಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.
