ಕಾಡಾನೆಗಳಿಂದ ಬೆಳೆ ಹಾನಿ

ಶಿಗ್ಗಾಂವಿ: ಪಟ್ಟಣದ ಹೊರ ವಲಯದ ಜೇಕಿನಕಟ್ಟಿ ಮುರಾರ್ಜಿ ವಸತಿ ಶಾಲೆ ಪಕ್ಕದ ಅರಣ್ಯದಲ್ಲಿ ಶನಿವಾರ ಪ್ರತ್ಯಕ್ಷವಾಗಿದ್ದ ಕಾಡಾನೆಗಳು, ರೈತರ ಕಬ್ಬು, ಗೋವಿನಜೋಳ ಸೇರಿ ಇತರೆ ಬೆಳೆಗಳನ್ನು ತುಳಿದು ಹಾನಿಗೊಳಿಸಿವೆ. ಭಾನುವಾರ ಶಿಗ್ಗಾಂವಿ ಬಿಟ್ಟು ದುಂಡಸಿ ಅರಣ್ಯದ ಕಡೆ ತೆರಳಿವೆ ಎಂದು ಅರಣ್ಯ ಅಧಿಕಾರಿಗಳು ತಿಳಿಸಿದ್ದಾರೆ.

ಯಲ್ಲಾಪುರ ಕಾಡಿನಿಂದ ಶಿಗ್ಗಾಂವಿಗೆ ಬಂದು ಭಾರಿ ಸದ್ದು ಮಾಡಿದ್ದ 6 ಕಾಡಾನೆಗಳನ್ನು ಓಡಿಸಲು ಶನಿವಾರ ಅರಣ್ಯ ಇಲಾಖೆ ಅಧಿಕಾರಿಗಳು, ಸಿಬ್ಬಂದಿ, ದಿನವಿಡಿ ಹರ ಸಹಾಸಪಟ್ಟರೂ ಸ್ಥಳ ಬಿಟ್ಟು ಕದಲಿರಲಿಲ್ಲ. ಭಾನುವಾರ ಬೆಳಗ್ಗೆ ಜೇಕಿನಕಟ್ಟಿ, ರಾಜೀವನಗರ, ಶಿವಪುರ, ಮಡ್ಲಿ ನರ್ಸರಿ, ಅಡವಿ ಸೋಮಾಪುರದ ಮೂಲಕ ದುಂಡಸಿ ಅರಣ್ಯ ಪ್ರವೇಶಿಸಿವೆ ಎಂದು ಅರಣ್ಯಾಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಈ ಮಧ್ಯೆ ದಾರಿಯುದ್ದಕ್ಕೂ ರೈತರ ಸುಮಾರು 50 ಎಕರೆಗೂ ಹೆಚ್ಚು ಜಮೀನಿನಲ್ಲಿದ್ದ ಕಬ್ಬು, ಗೋವಿನಜೋಳ ಸೇರಿ ವಿವಿಧ ಬೆಳೆಗಳನ್ನು ಹಾನಿಗೊಳಿಸಿವೆ ಎಂದು ಅರಣ್ಯ ಅಧಿಕಾರಿ ರಮೇಶ ಶೇತಸನದಿ ತಿಳಿಸಿದ್ದಾರೆ. ಬೆಳೆ ಹಾನಿಗೊಳಗಾದ ರೈತರಿಗೆ ಅರ್ಜಿ ಸಲ್ಲಿಸಲು ತಿಳಿಸಲಾಗಿದೆ. ಇಲಾಖೆಯಿಂದ ಪರಿಹಾರ ವಿತರಣೆಗೂ ಕ್ರಮ ವಹಿಸಲಾಗಿದೆ ಎಂದು ತಿಳಿಸಿದರು.

ದುಂಡಸಿ, ಕುನ್ನೂರು, ಹೆಳವ, ತರ್ಲಘಟ್ಟ, ಅರಟಾಳ, ಜೋಂಡಲಗಟ್ಟಿ, ಹೊಸೂರು ಸೇರಿ ವಿವಿಧ ಕಾಯ್ದಿಟ್ಟ ಅರಣ್ಯ ಪರಿಶೀಲಿಸಲಾಗಿದೆ. ಮೂರು ತಂಡಗಳಲ್ಲಿ 10 ಜನ ಅರಣ್ಯ ರಕ್ಷಕರನ್ನು ನಿಯೋಜಿಸಲಾಗಿದೆ ಎಂದು ತಿಳಿಸಿದ್ದಾರೆ.