ಸಾಲ ಕೊಡಿಸಿದ ‘ತಪ್ಪಿಗೆ’ ತಾಯಿ-ಮಗಳ ಆತ್ಯಹತ್ಯೆ! ಫಿಲೇಚರ್ ಮಾಲೀಕನ ಬಂಧನ

ಕನಕಪುರ: ಕೊಡಿಸಿದ ಸಾಲದ ಹಣ ಹಿಂತಿರುಗಿಸಲು ಸತಾಯಿಸುತ್ತಿದ್ದ ಫಿಲೇಚರ್ ಮಾಲೀಕನ ವರ್ತನೆ ಹಾಗೂ ಹಣ ನೀಡುವಂತೆ ಸಾಲ ಕೊಟ್ಟವರು ನೀಡುತ್ತಿದ್ದ ಕಿರುಕುಳದಿಂದ ರೋಸಿ ಹೋದ ತಾಯಿ-ಮಗಳು ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ನಗರದ ಕುರುಪೇಟೆಯ ಮಾಧವನಗರ ನಿವಾಸಿಗಳಾದ ಚಾಮಮ್ಮ (48) ಹಾಗೂ ಮಗಳು ಉಮಾ (32) ಮೃತರು. ಸಾಯುವ ಮುನ್ನ ಡೆತ್ ನೋಟ್ ಬರೆದಿಟ್ಟು, ಮನೆಯ ಜಂತಿಗೆಗೆ ನೇಣು ಬಿಗಿದುಕೊಂಡಿದ್ದಾರೆ.

ಇದನ್ನೂ ಓದಿ: ಗಂಡ-ಹೆಂಡ್ತಿ ಜಗಳ ವಿಮಾನದಲ್ಲಿ ಬಾಂಬ್​ ಇಡುವ ತನಕ…

ಚಾಮಮ್ಮ ಹಾಗೂ ಉಮಾ ಖಾಲಕ್ ನಗರದ ರೇಷ್ಮೆ ಫಿಲೇಚರ್ ಫ್ಯಾಕ್ಟರಿಯಲ್ಲಿ ಹಲವು ವರ್ಷಗಳಿಂದ ಕಾರ್ಮಿಕರಾಗಿದ್ದರು. ಈ ನಡುವೆ ಹಣದ ಅಗತ್ಯ ಇದ್ದ ಫಿಲೇಚರ್ ಮಾಲೀಕ ಶಬ್ಬಿರ್‌ಗೆ ಮೂರನೇ ವ್ಯಕ್ತಿಯಿಂದ 3 ಲಕ್ಷ ರೂ. ಸಾಲ ಕೊಡಿಸಿದ್ದರು. ಈ ನಡುವೆ ಹಣ ವಾಪಸ್ ಕೊಡಿಸುವಂತೆ ಸಾಲ ಕೊಟ್ಟವರು ಒತ್ತಡ ಹೇರುತ್ತಿದ್ದರು.

ಇದನ್ನೂ ಓದಿ: ಬಿಪಿಎಲ್ ಕಾರ್ಡುದಾರರ ಗಮನಕ್ಕೆ: ನಕಲಿ ಮತ್ತು ಅನರ್ಹರ ವಿರುದ್ಧ ಕ್ರಮ ತೆಗೆದುಕೊಳ್ತೇವೆ ಎಂದು ಎಚ್ಚರಿಕೆ ನೀಡಿದ ಸಿಎಂ

ಆದರೆ, ಹಣ ಹಿಂತಿರುಗಿಸಲು ಶಬ್ಬೀರ್ ಸತಾಯಿಸುತ್ತಿದ್ದುದಲ್ಲದೆ, ಕಿರುಕುಳ ನೀಡುತ್ತಿದ್ದ. ಸಾಲ ಕೊಟ್ಟವರ ಒತ್ತಡ ಹಾಗೂ ಶಬ್ಬೀರ್‌ನ ಹಿಂಸೆಯಿಂದ ಮನ ನೊಂದ ತಾಯಿ-ಮಗಳು ಮಂಗಳವಾರ ಸಂಜೆ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಪೊಲೀಸರಿಗೆ ಡೆತ್‌ನೋಟ್ ಸಿಕ್ಕಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಆರೋಪಿ ಶಬ್ಬೀರ್‌ನನ್ನು ಬುಧವಾರ ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.

https://www.vijayavani.net/sexual-harassment-by-driver/