ಮತಾಂತರ ನಿಷೇಧ ಹಾಗೂ ಲವ್ ಜಿಹಾದ್ ತಡೆಗೆ ಪ್ರತ್ಯೇಕ ಕಾಯ್ದೆ ಜಾರಿಗೆ ತರುವ ಬದಲು ಒಂದೇ ಕಾಯ್ದೆಯೊಳಗೆ ಎರಡನ್ನೂ ಸೇರಿಸುವ ಗಂಭೀರ ಚಿಂತನೆ ರಾಜ್ಯ ಸರ್ಕಾರದ ಮುಂದಿದೆ. ಎರಡೂ ವಿಚಾರದಲ್ಲಿ ಪ್ರತ್ಯೇಕ ಮಸೂದೆ ಮಂಡಿಸುವ ಬಗ್ಗೆ ಗೃಹ ಸಚಿವ ಆರಗ ಜ್ಞಾನೇಂದ್ರ, ಇಂಧನ ಸಚಿವ ವಿ.ಸುನೀಲ್ಕುಮಾರ್ ಇಂಗಿತ ವ್ಯಕ್ತಪಡಿಸಿದ್ದರು. ಬಹಳಷ್ಟು ಸಚಿವರು ಇದಕ್ಕೆ ಸಹಮತ ಸೂಚಿಸಿದ್ದರು. ಆದರೆ, ಕಾನೂನು ತಜ್ಞರು, ಸಾಮಾಜಿಕ ಚಿಂತಕರು, ಹಲವು ವಿಭಾಗಗಳ ತಜ್ಞರು, ಹಿರಿಯ ಸಚಿವರ ನೇತೃತ್ವದಲ್ಲಿ ರಾಜ್ಯ ಸರ್ಕಾರ ಈ ಕುರಿತು ರ್ಚಚಿಸಲು ಸಭೆ ನಡೆಸಿತ್ತು. ಎರಡನ್ನೂ ಪ್ರತ್ಯೇಕಿಸುವ ಬದಲು ಒಂದೇ ಕಾಯ್ದೆಯೊಳಗೆ ಸೇರಿಸಿ ಜಾರಿಗೆ ತರುವ ಕುರಿತು ಮಾಹಿತಿ ವಿನಿಮಯವಾಗಿದೆ ಎಂದು ಹೇಳಲಾಗಿದೆ. ಹಣ, ಆಮಿಷವೊಡ್ಡುವುದು, ಬಡತನ ಪರಿಸ್ಥಿತಿ ದುರ್ಲಾಭ ಪಡೆಯುವುದು ಮತಾಂತರದ ತಂತ್ರವಾಗಿದೆ. ಯುವತಿಯರನ್ನು ಪ್ರೀತಿ-ಪ್ರೇಮದ ಹೆಸರಿನಲ್ಲಿ ಮೋಹದ ಬಲೆಗೆ ಕೆಡವಿ ಮತಾಂತರ ಮಾಡುವುದು ಲವ್ ಜಿಹಾದ್ನ ಸಂಚು ಎನ್ನುವ ಆರೋಪ ಸಾರ್ವಜನಿಕ ವಲಯದಲ್ಲಿದೆ.ಮತಾಂತರ ಮತ್ತು ಲವ್ ಜಿಹಾದ್ ಎರಡೂ ಯಾವುದೇ ಸ್ವರೂಪದಲ್ಲಿದ್ದರೂ ಸಾಮಾಜಿಕ ಸ್ವಾಸ್ಥ್ಯ, ಜಾತಿ ಸಮೀಕರಣದ ಚೌಕಟ್ಟು, ಕೌಟುಂಬಿಕ ಸಂಬಂಧ ಹಾಳು ಮಾಡಬಾರದು ಎಂಬುದು ರಾಜ್ಯ ಸರ್ಕಾರದ ನಿಲುವು. ಇದೇ ವಿಷಯವನ್ನು ಮುಂದಿಟ್ಟುಕೊಂಡು ಮತಾಂತರ ತಡೆ ಮಸೂದೆ ಕರಡು ತಯಾರಿಸಿದ್ದು, ಕೆಲ ಸಂವಿಧಾನಾತ್ಮಕ ಅಡೆತಡೆ ನಿವಾರಣೆ ಸಂದರ್ಭದಲ್ಲಿ ಲವ್ ಜಿಹಾದ್ ತಡೆ ಹಾಕುವಂತಹ ಅಂಶಗಳನ್ನು ಈ ಮಸೂದೆಯೊಳಗೆ ಅಡಗಿಸಲು ಚಿಂತನೆ ನಡೆಸಿದೆ. ಈ ನಿಟ್ಟಿನಲ್ಲಿ ಮತ್ತಷ್ಟು ಚರ್ಚೆ, ಅಭಿಪ್ರಾಯ ಸಂಗ್ರಹ, ಕಾನೂನು ತಜ್ಞರೊಂದಿಗೆ ವಿಚಾರ ವಿನಿಯಮ ನಡೆಸಲಾಗುತ್ತಿದೆ ಎಂದು ಉನ್ನತ ಮೂಲಗಳು ತಿಳಿಸಿವೆ.
