ವೈಜ್ಞಾನಿಕ ವಿಕಾಸಕ್ಕೆ ವಿಶ್ವ ಒಲಂಪಿಯಾಡ್ ಸಹಕಾರಿ

ಸಮೀಪದ ಕುದಾಪುರ ಐಐಎಸ್ಸಿ ಕ್ಯಾಂಪಸ್‌ನ ಕೌಶಲಾಭಿವೃದ್ಧಿ ಮತ್ತು ಪ್ರತಿಭಾನ್ವೇಷಣೆ ಕೇಂದ್ರದಲ್ಲಿ ಗುರುವಾರ ವಿಶ್ವ ಜೂನಿಯರ್ ವಿಜ್ಞಾನ ಒಲಿಂಪಿಯಾಡ್ ಸ್ಪರ್ಧೆಯ ಕಾರ್ಯಾಗಾರದಲ್ಲಿ ಮಾತನಾಡಿದರು.

ವಿಶ್ವ ಜೂನಿಯರ್ ವಿಜ್ಞಾನ ಒಲಿಂಪಿಯಾಡ್‌ಗೆ ಭಾರತ ಪ್ರತಿನಿಧಿಸುವ ವಿದ್ಯಾರ್ಥಿಗಳನ್ನು ಆಯ್ಕೆ ಮಾಡುವ ಕಾರ್ಯಾಗಾರ ಇಂದಿನಿಂದ ಆರಂಭವಾಗಿದೆ. ಪದವಿಪೂರ್ವ ವಿದ್ಯಾರ್ಥಿಗಳಿಗೆ ಹೊಸ ಆವಿಷ್ಕಾರದಲ್ಲಿ ಆಸಕ್ತಿ ಬೆಳೆಸಲು ಮತ್ತು ಅವರನ್ನು ಪ್ರೋತ್ಸಾಹಿಸಲು ಪ್ರತಿವರ್ಷ ವಿಶ್ವ ಜೂನಿಯರ್ ವಿಜ್ಞಾನ ಒಲಿಂಪಿಯಾಡ್ ಸ್ಪರ್ಧೆಯನ್ನು ವಿಶ್ವದ ನಾನಾ ಭಾಗದಲ್ಲಿ ಹಮ್ಮಿಕೊಳ್ಳಾಗುತ್ತದೆ ಎಂದರು.

ಇಲ್ಲಿ ವಿಶ್ವದ 60ಕ್ಕೂಹೆಚ್ಚು ರಾಷ್ಟ್ರಗಳ ವಿದ್ಯಾರ್ಥಿಗಳು ಭಾಗವಹಿಸಿ ವಿಜ್ಞಾನಕ್ಕೆ ಸಂಬಂಧಿಸಿದ ನೂತನ ಆವಿಷ್ಕಾರಗಳನ್ನು ಮಂಡಿಸುತ್ತಾರೆ. ಇದೊಂದು ಪ್ರತಿಷ್ಠಿತ ವಿಜ್ಞಾನ ಸಮಾವೇಶವಾಗಿದ್ದು, ಜಾಗತಿಕ ಮಟ್ಟದಲ್ಲಿ ದೇಶದ ಘನತೆ ಎತ್ತಿಹಿಡಿಯುವ ಅವಕಾಶ ವಿದ್ಯಾರ್ಥಿಗಳಿಗೆ ಬರಲಿದೆ ಎಂದರು.

ಮುಂಬೈನ ಹೋಮಿಬಾಬಾ ವಿಜ್ಞಾನ ಕೇಂದ್ರ, ಭಾರತೀಯ ಭೌತವಿಜ್ಞಾನ ಪ್ರಾಧ್ಯಾಪಕರ ವೇದಿಕೆ ಮತ್ತು ಐಐಎಸ್ಸಿ ಸಹಯೋಗದಲ್ಲಿ ಆನ್‌ಲೈನ್ ಮೂಲಕ ರಾಷ್ಟ್ರಮಟ್ಟದ ಅರ್ಹತಾ ಪರೀಕ್ಷೆಯನ್ನು ಜನವರಿ ಮತ್ತು ಫೆಬ್ರವರಿಯಲ್ಲಿ ನಡೆಸಲಾಗುತ್ತದೆ. ಪ್ರಸಕ್ತ ವರ್ಷ ದೇಶದಾದ್ಯಂತ 50 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಈ ಅರ್ಹತಾ ಪರೀಕ್ಷೆಯಲ್ಲಿ ಭಾಗವಹಿಸಿದ್ದು, ಇದರಲ್ಲಿ ಉತ್ತಮ ಅಂಕಗಳಿಸಿದ 36ವಿದ್ಯಾರ್ಥಿಗಳನ್ನು ಮಾತ್ರ ಮುಂದಿನ ಹಂತಕ್ಕೆ ಆಯ್ಕೆ ಮಾಡಲಾಗುತ್ತದೆ ಎಂದು ತಿಳಿಸಿದರು.

36 ವಿದ್ಯಾರ್ಥಿಗಳಿಗೆ ಇಲ್ಲಿನ ಐಐಎಸ್ಸಿ ಕ್ಯಾಂಪಸ್‌ನಲ್ಲಿ 12 ದಿನಗಳವರೆಗೆ ಕಠಿಣ ತರಬೇತಿ ನೀಡಿ ಅಂತಿಮವಾಗಿ ವಿಶ್ವ ಒಲಿಂಪಿಯಾಡ್‌ಗೆ ಕೇವಲ 6 ವಿದ್ಯಾರ್ಥಿಗಳನ್ನು ಮಾತ್ರ ಆಯ್ಕೆ ಮಾಡಲಾಗುತ್ತದೆ. ಹಾಗಾಗಿ ಪ್ರತಿಯೊಬ್ಬರೂ ತರಬೇತಿ ಪಡೆದು ವಿಶ್ವಮಟ್ಟದಲ್ಲಿ ದೇಶ ಪ್ರತಿನಿಧಿಸುವ ಸುವರ್ಣಾವಕಾಶ ಬಳಸಿಕೊಳ್ಳಬೇಕು ಎಂದರು.

ಭಾರತೀಯ ಭೌತವಿಜ್ಞಾನ ಪ್ರಾಧ್ಯಾಪಕರ ವೇದಿಕೆ ಸದಸ್ಯ ಪ್ರೊ. ವಿನಾಯಕ ಕಟ್ದಾರೆ, ಎರಡನೇ ಹಂತದಲ್ಲಿ ಆಯ್ಕೆಯಾಗಿರುವ 36 ವಿದ್ಯಾರ್ಥಿಗಳು ಈ ತರಬೇತಿ ಕಾರ್ಯಾಗಾರವನ್ನು ಸ್ಪರ್ಧೆ ಎಂದು ನೋಡದೆ ಜೀವನದ ಉತ್ತಮವಾದ ಅವಕಾಶ ಮತ್ತು ಅನುಭವ ನೀಡುವ ತಾಣ ಎಂದು ಭಾವಿಸಿ ಇಷ್ಟಪಟ್ಟು ತರಬೇತಿ ಪಡೆದುಕೊಳ್ಳಬೇಕು ಎಂದು ಕಿವಿಮಾತು ಹೇಳಿದರು.

ಐಐಎಸ್ಸಿ ಕುದಾಪುರ ಕ್ಯಾಂಪಸ್ ಮುಖ್ಯಸ್ಥ ಪ್ರೊ.ಬಿ. ಸುಬ್ಬಾರೆಡ್ಡಿ, ಪ್ರೊ. ಅಚ್ಯುತ್‌ಕುಮಾರ್, ಪ್ರೊ. ರಾಘವೇಂದ್ರ, ಹೇಮಂತ್‌ಕುಮಾರ್ ಇದ್ದರು.