ಚಿತ್ರದುರ್ಗ

ಬಾಡಿದ ತೊಗರಿ, ಶೇಂಗಾ ಬೆಳೆ Crop

ಕೊಂಡ್ಲಹಳ್ಳಿ ಹೊರವಲಯದಲ್ಲಿ ತೊಗರಿ ಬೆಳೆ ಬಾಡುತ್ತಿರುವುದು. Crop
ಕೊಂಡ್ಲಹಳ್ಳಿ ಹೊರವಲಯದಲ್ಲಿ ತೊಗರಿ ಬೆಳೆ ಬಾಡುತ್ತಿರುವುದು. Crop
ಚಂದನ ವಿ ಎಂ
Published on: 

ಪ್ರಮುಖ ಮುಖ್ಯಾಂಶಗಳು

  • ಬಾರದ ಮುಂಗಾರು ಮಳೆ
  • ಕುಡಿಯುವ ನೀರು, ಮೇವಿಗೂ ಕೊರತೆ
ಟಿ. ರಾಮಚಂದ್ರಪ್ಪ ಕೊಂಡ್ಲಹಳ್ಳಿ
ಮುಂಗಾರು ರೈತರೊಂದಿಗೆ ಜೂಜಾಟವಾಡುತ್ತದೆ ಎಂಬ ಮಾತು ಬರದ ನಾಡಿನ ರೈತರ ವಿಷಯದಲ್ಲಿ ಈ ಬಾರಿಯೂ ನಿಜವಾಗುತ್ತಿದೆ. ಮೊಳಕಾಲ್ಮೂರು ತಾಲೂಕಿನ ಕಸಬಾ ಹೋಬಳಿಯಲ್ಲಿ ಈ ಬಾರಿ ಮುಂಗಾರು ಮಳೆಯಾಗದೆ ರೈತರು ತಲೆ ಮೇಲೆ ಕೈ ಹೊತ್ತು ಕುಳಿತುಕೊಳ್ಳುವಂತಾಗಿದೆ. Crop
ಕಳೆದ ವರ್ಷ ಮೇ ತಿಂಗಳಲ್ಲೇ ಪೂರ್ವ ಮುಂಗಾರು ಚುರುಕುಗೊಂಡು ಜೂನ್ ತಿಂಗಳಲ್ಲಿ ಮುಂಗಾರು ಆರಂಭವಾಗಿತ್ತು. ಆದರೆ, ಈ ವರ್ಷ ಜೂನ್ ತಿಂಗಳು ಮುಗಿದರೂ ಮಳೆ ಬಾರದೆ ರೈತರು ಆಕಾಶ ನೋಡುವಂತಾಗಿದೆ. ಮಳೆ ಬರುತ್ತದೆ ಎನ್ನುವ ನಂಬಿಕೆಯವಿಂದ ರೈತರು ಅಲ್ಲಲ್ಲಿ ತೊಗರಿ, ಶೇಂಗಾ ಬಿತ್ತನೆ ಮಾಡಿದ್ದಾರೆ.
ಬಿತ್ತನೆಯಾಗಿ 3-4 ವಾರಗಳು ಕಳೆಯುತ್ತಿದ್ದರೂ ಮಳೆರಾಯನ ದರ್ಶನವಿಲ್ಲ. ತೊಗರಿ, ಶೇಂಗಾ ಮೊಳಕೆಯೊಡೆದು ಚಿಗುರುತ್ತಿದ್ದರೂ ಮಳೆ ಇಲ್ಲದೆ ಬಾಡಲಾರಂಭಿಸಿವೆ. ಕೊಂಡ್ಲಹಳ್ಳಿ, ಮೊಗಲಹಳ್ಳಿ, ಕೋನಸಾಗರ ಇತರೆಡೆಗಳಲ್ಲಿ ರೈತರು ತೊಗರಿ ಬಿತ್ತನೆ ಮಾಡಿದ್ದಾರೆ. ಮೊಳಕೆಯಾಗುತ್ತಿರುವ ಬೆಳೆಗೆ ತೇವಾಂಶದ ಕೊರತೆ, ಕೀಟಬಾಧೆ ಹಾಗೂ ಬೆಳೆ ಹಾನಿ ಸಂಭವಿಸುವ ಭೀತಿ ಎದುರಾಗಿದೆ. ಮಳೆ ಅಭಾವ ನೀರಾವರಿ ಬೆಳೆಗಳ ಮೇಲೂ ಪರಿಣಾಮ ಬೀರಲಾರಂಭಿಸಿದೆ.
ಕೆಲ ರೈತರು ಬೇರೆಯವರ ಭೂಮಿ ಗುತ್ತಿಗೆ ಪಡೆದು ತೊಗರಿ ಹಾಕಿದ್ದಾರೆ. ಆದರೆ ಮಳೆಯ ಸುಳಿವಿಲ್ಲದೆ ಬೆಳೆ ಹಾಳಾಗುವ ಹಂತದಲ್ಲಿದೆ. ಮುಂಗಾರು ಪೂರ್ವದಲ್ಲಿ ಮಳೆಯಾಗಿದ್ದರಿಂದ ಭೂಮಿ ಹದಗೊಳಿಸಿ ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಮುಂದಿನ ದಿನಗಳಲ್ಲಿ ಉತ್ತಮ ಮಳೆಯಾದರೆ ಕೃಷಿಗೆ ಅನುಕೂಲವಾಗಲಿದೆ.
ಸಮಯಕ್ಕೆ ಸರಿಯಾಗಿ ಮಳೆಬಾರದ ಕಾರಣ ಬಿತ್ತನೆ ಪೂರ್ಣಗೊಂಡಿಲ್ಲ. ಮಳೆಯಿಲ್ಲದೆ ಬೆಳೆಗಳು ಒಣಗುತ್ತಿರುವುದು ರೈತರಿಗೆ ಆರ್ಥಿಕ ಹೊಡೆತ ಈ ಸಲವೂ ಗ್ಯಾರಂಟಿ ಎಂಬಂತಾಗಿದೆ. ಜನ, ಜಾನುವಾರುಗಳಿಗೆ ಕುಡಿಯುವ ನೀರು, ಮೇವಿನ ಕೊರತೆ ಎದುರಾಗುವ ಸಾಧ್ಯತೆ ಇದೆ.

ತೊಗರಿಯನ್ನು 32 ಎಕರೆಯಲ್ಲಿ ಬಿತ್ತನೆ ಮಾಡಿದ್ದೇನೆ. ಬೀಜ, ಗೊಬ್ಬರ ಸೇರಿ ಸುಮಾರು 80 ಸಾವಿರ ರೂ. ಖರ್ಚಾಗಿದೆ. ಮಳೆ ಇಲ್ಲದ ಕಾರಣ ಬೆಳೆ ಬಾಡುತ್ತಿದೆ. ಸರ್ಕಾರವು ರೈತರ ಪರವಾಗಿ ನಿಲ್ಲಬೇಕು.

— ಜೆ.ಬಿ. ನಾಗರಾಜ್ ರೈತ ಕೊಂಡ್ಲಹಳ್ಳಿ.

ಜುಲೈ 15ರವರೆಗೆ ಬಿತ್ತನೆಗೆ ಅವಕಾಶವಿದೆ. ಈಗ ಮಳೆ ಬಂದರೂ ಬಿತ್ತನೆ ಮಾಡಬಹುದು. ಶೇಂಗಾ ಬಿತ್ತನೆಗೂ ಸಮಯಾವಕಾಶವಿದೆ. ಮೊಳಕಾಲ್ಮೂರು ತಾಲೂಕಿನಲ್ಲಿ ಉತ್ತಮ ರೀತಿಯಲ್ಲಿ ಪೂರ್ವ ಮುಂಗಾರು ಮಳೆಯಾಗಿದೆ. ಕೃಷಿಗೆ ಜಮೀನು ಸಿದ್ದಮಾಡಿಕೊಳ್ಳಲಾಗಿದೆ. ಉತ್ತಮ ಮಳೆಯಾದರೆ ಕೃಷಿ ಚಟುವಟಿಕೆಗಳಿಗೆ ಅನುಕೂಲ.

— ಎಂ.ವಿ. ಮಂಜುನಾಥ್ ಕೃಷಿ ಸಹಾಯಕ ನಿರ್ದೇಶಕ

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net