Silk Saree: ನೇಕಾರಿಕೆಯಲ್ಲಿ ಹೊಸ ವಿನ್ಯಾಸ ಬಳಸಿದರೆ ವ್ಯಾಪಾರ ವೃದ್ಧಿ

ಪಟ್ಟಣದ ಪಾಂಚಜನ್ಯ ಕಾಂಪ್ಲೆಕ್ಸ್‌ನಲ್ಲಿ ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆ, ಟೆಕ್ಸಾಕ್, ಕೆಸಿಟಿಯು ಹಾಗೂ ಜಿಲ್ಲಾ ಕೈಗಾರಿಕಾ ಕೇಂದ್ರದ ಸಹಯೋಗದಲ್ಲಿ ಮೊಳಕಾಲ್ಮೂರು ಅಪ್ಪಟ ರೇಷ್ಮೆ ಸೀರೆ ತಾಂತ್ರಿಕತೆ ಮತ್ತು ನೈಪುಣ್ಯದ ವಿಧಾನಗಳ ಕುರಿತು ಶುಕ್ರವಾರ ಹಮ್ಮಿಕೊಂಡಿದ್ದ ಕಾರ್ಯಾಗಾರದಲ್ಲಿ ಮಾತನಾಡಿದರು.

ಜನಾಕರ್ಷಣೆಯ ರೀತಿ ನೇಕಾರಿಕೆಯಲ್ಲಿ ಹೊಸ ವಿನ್ಯಾಸ ಬಳಸಿಕೊಳ್ಳಬೇಕು. ಇದರಿಂದ ವ್ಯಾಪಾರ ವಹಿವಾಟು ವೃದ್ಧಿಯಾಗಲಿದೆ. ಮೊಳಕಾಲ್ಮೂರು ರೇಷ್ಮೆ ಸೀರೆ ಎಂದರೆ ಗುಣಮಟ್ಟ ಹಾಗೂ ನೈಪುಣ್ಯದ ನೇಕಾರಿಕೆಯಲ್ಲಿ ಮೈಸೂರು ಅರಸರ ಕಾಲದಿಂದಲೂ ನಂಬಿಕೆ ಉಳಿಸಿಕೊಂಡು ಬಂದಿದೆ. ರಾಜರಿಂದ ಪ್ರೋತ್ಸಾಹ ಪಡೆದ ಸೀರೆ ಕೈಗಾರಿಕೋದ್ಯಮ ಕಾಲ ಕ್ರಮೇಣ ದೊಡ್ಡಮಟ್ಟದಲ್ಲಿ ಬೆಳೆದಿದೆ. ಈಗಲೂ ಸಾಂಪ್ರದಾಯಿಕ ಕೈಮಗ್ಗ ತಂತ್ರಗಾರಿಕೆ ಬಳಸಿ ಪ್ರಕೃತಿ ಪ್ರೇರಿತ ವಿನ್ಯಾಸದ ಸೀರೆಗಳ ತಯಾರಿಸಲಾಗುತ್ತಿದೆ. ಇದರ ಆಧಾರದಲ್ಲಿ 2006ರಲ್ಲಿ ಭೌಗೋಳಿಕ ಹೆಗ್ಗುರುತು ದೊರೆತಿರುವುದು ವಿಶೇಷ ಎಂದರು.

ಶುದ್ಧ ರೇಷ್ಮೆ ಬಹುಕಾಲ ಬಾಳಿಕೆ ಬರಲಿದೆ. ವಿಶಿಷ್ಟ ವಿನ್ಯಾಸಗಳು ಹಾಗೂ ಮನಮೋಹಕ ಅಂಚುಗಳ ಆಕರ್ಷಣೆಯಲ್ಲಿ ಸಿನಿ ತಾರೆಯರು, ಎಲ್ಲ ಕ್ಷೇತ್ರದ ಸೆಲಿಬ್ರಿಟಿ ಹೆಣ್ಣು ಮಕ್ಕಳು ಇಷ್ಟಪಡುತ್ತಾರೆ. ಇಡೀ ದೇಶದ ಉದ್ದಗಲಕ್ಕೂ ಅಪ್ಪಟ ರೇಷ್ಮೆ ಸೀರೆ ಎಂಬ ಖ್ಯಾತಿಯಿದೆ. ಅಲ್ಲದೆ ಹೊರ ಪ್ರಪಂಚದಲ್ಲೂ ಜನಾಕರ್ಷಣೆ ಪಡೆದಿರುವುದು ಹೆಮ್ಮೆಯ ಸಂಗತಿ ಎಂದು ಹೇಳಿದರು.

ಮೊಳಕಾಲ್ಮೂರು ಸಿಲ್ಕ್‌ಸಿಟಿ ಎಂಟರ್‌ಪ್ರೈಸಸ್ ವ್ಯವಸ್ಥಾಪಕ ಡಾ. ಪಿ.ಎಂ. ಮಂಜುನಾಥ ಮಾತನಾಡಿ, ನೆರೆಯ ಆಂಧ್ರ ಮತ್ತು ತಮಿಳುನಾಡಿನ ವಿದ್ಯುತ್ ಮಗ್ಗಗಳ ಮೂಲಕ ತಯಾರಾಗುವ ಬನಾರಸ್, ಕಾಂಚೀಪುರಂ, ಧರ್ಮಾವರಂ ಸೀರೆಗಳಿಗೆ ಪ್ರಬಲ ಸ್ಪರ್ಧೆ ನೀಡುತ್ತ ಜನಮನ್ನಣೆ ಪಡೆದುಕೊಂಡಿದೆ. ಪಾರಂಪರಿಕವಾಗಿ ಬಂದಿರುವ ಮೊಳಕಾಲ್ಮೂರು ರೇಷ್ಮೆ ಸೀರೆ ನೈಪುಣ್ಯದಲ್ಲಿ ರಾಷ್ಟ್ರೀಯ ಪ್ರಶಸ್ತಿಗೂ ಭಾಜನವಾಗಿದೆ ಎಂದರು

ಸಾವಿರಾರು ಕಾರ್ಮಿಕ ಕುಟುಂಬಗಳಿಗೆ ಆರ್ಥಿಕ ಭದ್ರತೆಯಲ್ಲಿ ಅನ್ನ ಕೊಡುವ ಅತ್ಯಂತ ಮಹತ್ವಪೂರ್ಣ ಸ್ವಯಂ ಉದ್ಯೋಗ ಮಾರ್ಗದ ಸಮಗ್ರ ಏಳಿಗೆಗೆ ಇಲಾಖೆ ಅಧಿಕಾರಿಗಳು ಪ್ರೇರಣೆಯಾಗಿ ನಿಲ್ಲಬೇಕು. ವಿಶೇಷವಾಗಿ ಮೂಲ ಕಸಬುದಾರ ನೇಕಾರರಿಗೆ ಸರ್ಕಾರದಿಂದ ಲಭ್ಯವಿರುವ ಎಲ್ಲ ರೀತಿಯ ನೆರವು ನೀಡಿದರೆ ಕೈಮಗ್ಗ ಕಸುಬು ಉಳಿಯಲು ಸಾಧ್ಯ ಎಂದು ಹೇಳಿದರು.