ರಸ್ತೆಯಲ್ಲಿ ಪರೀಕ್ಷೆ ಬರೆದ ಸಾರ್ವಜನಿಕರು road

ಸಾರ್ವಜನಿಕ ರಸ್ತೆಯ ನಡುವೆ ಹಾಕಿದ ಶಾಮಿಯಾನದ ಅಡಿಯಲ್ಲಿ ಪಾಠ ಹಾಗೂ ಪರೀಕ್ಷೆ ನಡೆಯುತ್ತಿತ್ತು. ಪೊಲೀಸರು, ಶಿಕ್ಷಕರು ಹಾಗೂ ಪರೀಕ್ಷಾ ಮೇಲ್ವಿಚಾರಕರಾಗಿದ್ದರು. ದ್ವಿಚಕ್ರ ವಾಹನ ಸವಾರರು ಹಾಗೂ ಸಾರ್ವಜನಿಕರು ಪರೀಕ್ಷಾರ್ಥಿಗಳಾಗಿದ್ದರು. ಪರೀಕ್ಷೆಯಲ್ಲಿ ಅತಿ ಹೆಚ್ಚು ಅಂಕಗಳಿಸಿದವರಿಗೆ ಸ್ಥಳದಲ್ಲಿಯೇ ಬಹುಮಾನ ಸಿಗುತ್ತಿತ್ತು. ದಾರಿಯ ಸಂಚಾರಿಗಳು ಕುತೂಹಲದಿಂದ ವೀಕ್ಷಿಸುತ್ತಿದ್ದರು.

ಮೇಲಿನ ಸನ್ನಿವೇಶ ಕಂಡು ಬಂದದ್ದು ಪಟ್ಟಣದ ಬಸವೇಶ್ವರ ವೃತ್ತದಲ್ಲಿ ಶನಿವಾರ ಹೊಸದುರ್ಗ ಪೊಲೀಸರು ನಡೆಸುತ್ತಿದ್ದ ರಸ್ತೆ ಸುರಕ್ಷತಾ ಸಪ್ತಾಹದಲ್ಲಿ. ಚಿತ್ರದುರ್ಗ ಜಿಲ್ಲಾ ಪೊಲೀಸ್ ವತಿಯಿಂದ ಜಿಲ್ಲೆಯಲ್ಲಿ ವಾಹನ ಸವಾರರು ಹಾಗೂ ಸಾರ್ವಜನಿಕರಲ್ಲಿ ರಸ್ತೆ ಸುರಕ್ಷತೆಯ ಕುರಿತು ಜಾಗೃತಿ ಮೂಡಿಸುವ ಕೆಲಸ ನಡೆಸಲಾಯಿತು.

ಹೊಸದುರ್ಗ ಠಾಣೆಯ ಪೊಲೀಸ್ ನಿರೀಕ್ಷಕ ರಮೇಶ್ ಗೌಡ ನೇತೃತ್ವದಲ್ಲಿ ರಸ್ತೆ ಸುರಕ್ಷತಾ ಸಪ್ತಾಹವನ್ನು ವಿನೂತನವಾಗಿ ಆಯೋಜಿಸುವ ಮೂಲಕ ಜನರಲ್ಲಿ ರಸ್ತೆ ಸುರಕ್ಷತಾ ಕ್ರಮಗಳ ಕುರಿತು ಜಾಗೃತಿ ಮೂಡಿಸಲಾಯಿತು. ಇದರ ಭಾಗವಾಗಿ ಜನರಿಗೆ ವಾಹನ ಚಲಾವಣೆಯ ವೇಳೆ ಪಾಲಿಸಬೇಕಾದ ರಸ್ತೆ ನಿಯಮಗಳು, ಸೂಚನಾ ಫಲಕಗಳ ಕುರಿತು ತಿಳಿಸುವ ಕಾರ್ಯ ನಡೆಯಿತು. 

ಮುಖ್ಯವಾಗಿ ದ್ವಿಚಕ್ರ ವಾಹನ ಸವಾರರನ್ನು ಕೇಂದ್ರೀಕರಿಸಿ ಬಸವೇಶ್ವರ ವೃತ್ತದಲ್ಲಿ ಶಾಮಿಯಾನ ಹಾಕಿ ಪೆಂಡಾಲ್ ನಿರ್ಮಿಸಿ ಶನಿವಾರ ಬೆಳಗ್ಗೆಯಿಂದ ಸಂಜೆಯವರೆಗೆ ಉಚಿತವಾಗಿ ಹೆಲ್ಮೆಟ್ ನೀಡುವ ವಿನೂತನ ಕಾರ್ಯಕ್ರಮ ನಡೆಸಿಕೊಡಲಾಯಿತು. ಹೆಲ್ಮೆಟ್ ಪಡೆಯಲು ಪರೀಕ್ಷೆಯನ್ನು ನಿಗದಿಪಡಿಸಲಾಗಿತ್ತು. ರಸ್ತೆ ನಿಯಮಗಳ ಕುರಿತು ಪ್ರಶ್ನೆಗಳನ್ನು ನೀಡಿ ಅವರಿಂದ ಉತ್ತರ ಬರೆಸಿ ಮೌಲ್ಯಮಾಪನ ಮಾಡಿ ಸರಿ ಉತ್ತರ ಬರೆದ ಪರೀಕ್ಷಾರ್ಥಿಗಳಿಗೆ ಉಚಿತವಾಗಿ ಹೆಲ್ಮೆಟ್ ವಿತರಿಸಲಾಯಿತು. 

ಪ್ರತಿ ತಂಡದಲ್ಲಿ 15 ರಿಂದ 20 ಜನರಿಗೆ ಅವಕಾಶ ನೀಡಿ ಪರೀಕ್ಷೆ ಬರೆಸಲಾಯಿತು. ಸರಿ ಉತ್ತರ ಬರೆದ ಸುಮಾರು ನೂರಕ್ಕೂ ಹೆಚ್ಚು ಜನರಿಗೆ ಉಚಿತವಾಗಿ ಹೆಲ್ಮೆಟ್ ನೀಡುವ ಮೂಲಕ ವಾಹನ ಚಲಾಯಿಸುವಾಗ ಜೀವ ರಕ್ಷಿಸಿಕೊಳ್ಳಲು ಹೆಲ್ಮೆಟ್ ಧರಿಸುವಂತೆ ಜಾಗೃತಿ ಮೂಡಿಸಲಾಯಿತು. ಸುಮಾರು ಒಂದು ಸಾವಿರಕ್ಕೂ ಹೆಚ್ಚು ಜನ ಪರೀಕ್ಷೆಯಲ್ಲಿ ಪಾಲ್ಗೊಂಡು ರಸ್ತೆ ಸಂಚಾರಿ ನಿಯಮಗಳ ಕುರಿತು ಅಗತ್ಯ ಮಾಹಿತಿ ಪಡೆದರು. 

ಇನ್‌ಸ್ಪೆಕ್ಟರ್ ರಮೇಶ್ ಗೌಡ, ಪಿಎಸ್‌ಐ ಶ್ರೀಶೈಲ, ಪೊಲೀಸ್ ಸಿಬ್ಬಂದಿ ರಾಜು, ಪ್ರಸನ್ನ ಕುಮಾರ್ ಕಾರ್ಯಕ್ರಮದಲ್ಲಿ ವಾಹನ ಸವಾರರಿಗೆ ರಸ್ತೆ ಸುರಕ್ಷತಾ ನಿಯಮಗಳನ್ನು ಪಾಲಿಸುವ ಕುರಿತು ಅರಿವು ಮೂಡಿಸಲಾಯಿತು.