ಅಂದನೂರು ಕೆರೆಗೆ ನೀರು ಗಂಗಾಪೂಜೆ lake

ಬಿ. ದುರ್ಗ ಹೋಬಳಿಯ ದೊಡ್ಡ ಕೆರೆಗಳೆಲ್ಲಿ ಅಂದನೂರು ಕೆರೆಗೆ ಹೊಂದಿಕೊಂಡಂತಿವೆ. ಕೆರೆ ಸುಮಾರು 210 ಎಕರೆ ವಿಸ್ತೀರ್ಣವಿದ್ದು, ಕಳೆದ 2 ವಷರ್ಗಳಿಂದ ಕೆರೆ ಮಣ್ಣನ್ನು ರೈತರು ತೋಟ, ಜಮೀನುಗಳಿಗೆ ಹೊಡೆದುಕೊಂಡಿದ್ದರಿಂದ ಕೆರೆಯ ಆಳ ಹೆಚ್ಚಾಗಿದೆ.

ಉತ್ತಮ ಮಳೆಯಾಗಿ ಹಳ್ಳಗಳು ತುಂಬಿ ನೀರು ಬಂದಲ್ಲಿ ಮಾತ್ರ ಈ ಕೆರೆಯಲ್ಲಿ ನೀರು ಕಾಣಬಹುದಾಗಿತ್ತು. ಆದರೆ, ಈಗ ಕೆರೆಗೆ ಸಾಕಷ್ಟು ನೀರು ಹರಿದು ಬಂದಿರುವುದರಿಂದ ಅಂದನೂರು ಸೇರಿ ಅಚ್ಚುಕಟ್ಟು ವ್ಯಾಪ್ತಿಯ ಹತ್ತಾರು ಗ್ರಾಮಗಳ ಕುಡಿಯುವ ನೀರಿಗೆ, ತೋಟ, ಜಮೀನುಗಳಲ್ಲಿ ಕೊರೆಸಿರುವ ಕೊಳವೆ ಬಾವಿಗಳಿಗೆ ಅಂತರ್ಜಲ ಹೆಚ್ಚಾಗಲಿದೆ.

ಮಂಗಳವಾರ ಸಂಜೆ ಕೆರೆಗೆ ನೀರು ಬರುತ್ತಿರುವುದು ತಿಳಿಯುತ್ತಿದ್ದಂತೆ ಬಂಡೆಬೊಮ್ಮೇನಹಳ್ಳಿಯ ನೂರಾರು ಮಂದಿ ಕೆರೆ ಬಳಿಗೆ ಧಾವಿಸಿ ಗಂಗಾಪೂಜೆ ಸಲ್ಲಿಸಿದರು.

ಕೆರೆ ಏರಿ ದುರಸ್ತಿಗೆ ಆಗ್ರಹ: ಹೊಸದುರ್ಗ- ದಾವಣಗೆರೆ ರಸ್ತೆ ಕೆರೆ ಏರಿ ಮೇಲೆ ಹಾದು ಹೋಗಿದೆ. ಅಂದನೂರು ಗೇಟ್‌ನಿಂದ, ಲಿಂಗದಹಳ್ಳಿವರೆಗೆ ಒಂದುವರೆ ಕಿ.ಮೀ. ದೂರದವರೆಗೆ ಕೆರೆ ಏರಿ ಮೇಲಿನ ಡಾಂಬರ್ ರಸ್ತೆಯಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ವಾಹನಗಳು ಸಂಚರಿಸುತ್ತವೆ. ಆದರೆ ಕೆರೆ ಏರಿ ಮೇಲೆ ರಸ್ತೆಯಲ್ಲಿ ಗುಂಡಿಗಳಳು ಬಿದ್ದಿವೆ. ಕೆಲವೆಡೆ ರಸ್ತೆ ಕುಸಿದಿದೆ. ಕೆರೆಯಲ್ಲಿ ನೀರು ಸಂಗ್ರಹವಾದಲ್ಲಿ ಏರಿಯ ಬಿರುಕುಗಳಲ್ಲಿ ನೀರು ಸೋರಿಕೆಯಾಗುವ ಸಂಭವವಿದೆ. ಕೆರೆ ಏರಿ ದುರಸ್ಥಿ ಮಾಡಿಸಬೇಕು ಎಂದು ಅಂದನೂರು, ಬಂಡೆಬೊಮ್ಮನಹಳ್ಳಿ, ಲಿಂಗದಹಳ್ಳಿ, ಗ್ಯಾರೆಹಳ್ಳಿ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.