ವೈಭವದ ಪಂಗುನಿ ಉತ್ತರ ತೀರ್ಥ ಕಾವಡಿ ಜಾತ್ರೆ

ತರೀಕೆರೆ: ಎಂ.ಸಿ.ಹಳ್ಳಿ ಗ್ರಾಮದ ಭದ್ರಗಿರಿ ಶ್ರೀ ಶಿವಸುಬ್ರಹ್ಮಣ್ಯ ಸ್ವಾಮಿ ದೇಗುಲದಲ್ಲಿ ಬುಧವಾರ ವೈಭವದ ಪಂಗುನಿ ಉತ್ತ್ತಿರತೀರ್ಥ ಕಾವಡಿ ಜಾತ್ರಾ ಮಹೋತ್ಸವ ನಡೆಯಿತು.

ಮಂಗಳವಾರ ಸಂಜೆ 5ಕ್ಕೆ ಸರ್ವಾಲಂಕೃತ ರಥದಲ್ಲಿ ಉತ್ಸವ ಮೂರ್ತಿಯ ಗಿರಿ ಪ್ರದಕ್ಷಿಣೆ, ರಾತ್ರಿ 8ಕ್ಕೆ ಮೆಟ್ಟಿಲು ಪೂಜೆಯೊಂದಿಗೆ ಶ್ರೀ ಶಿವ ಸುಬ್ರಹ್ಮಣ್ಯ ಸ್ವಾಮಿ ಉತ್ಸವಮೂರ್ತಿಯನ್ನು ಮಹಾಮಂಟಪಕ್ಕೆ ಆಹ್ವಾನಿಸಲಾಯಿತು. ರಾತ್ರಿ 12ಕ್ಕೆ ಹಾಲು, ಮೊಸರು, ತುಪ್ಪ, ಎಳನೀರು, ಬಿಲ್ವಪತ್ರೆ, ತಿರುಮಂಜುನಂ, ಪಂಚಾಮೃತ ಸೇರಿ 16 ವಿಧದ ಸುಗಂಧ ದ್ರವ್ಯದೊಂದಿಗೆ ಶ್ರೀಸ್ವಾಮಿಗೆ ಅಭಿಷೇಕ ನೆರವೇರಿಸಲಾಯಿತು.

ಬುಧವಾರ ಬೆಳಗಿನಜಾವ 4 ಗಂಟೆಗೆ ಶ್ರೀ ಮರುಗೇಶ್ ಸ್ವಾಮಿ ನೇತೃತ್ವದಲ್ಲಿ ಶ್ರೀ ಶಿವ ಸುಬ್ರಹ್ಮಣ್ಯಸ್ವಾಮಿ ಉತ್ಸವಮೂರ್ತಿಗೆ ವಿವಿಧ ಹೂವುಗಳಿಂದ ಅಲಂಕಾರಗೊಳಿಸಿ ಪೂಜೆ ಸಲ್ಲಿಸಿ ಭಕ್ತರಿಗೆ ದರ್ಶನ ಭಾಗ್ಯ ಕಲ್ಪಿಸಲಾಯಿತು. ಬೆಳಗಿನಜಾವ 5ರಿಂದ ಮಧ್ಯಾಹ್ನ 1 ಗಂಟೆವರೆಗೆ ಮೂಲ ದೇವರಿಗೆ ಭಕ್ತರು ತುಂಗಾ-ಭದ್ರಾ ಕೂಡಲಿ ಸಂಗಮ ಮತ್ತು ಕಲ್ಲತ್ತಿಗಿರಿ ಪುಣ್ಯಕ್ಷೇತ್ರದಿಂದ ತಂದ ಪುಣ್ಯತೀರ್ಥದ ಅಭಿಷೇಕ ನೆರವೇರಿಸಿ ಬಂಗಾರ ಕವಚದಲ್ಲಿ ಆಹ್ವಾನಿಸಿದ ಶ್ರೀ ಸ್ವಾಮಿಯ ದರ್ಶನದೊಂದಿಗೆ ಮಹಾಮಂಗಳಾರತಿ ನಡೆಯಿತು.