28 ರಿಂದ ಸೀತಾಕಲ್ಯಾಣ ಮಹೋತ್ಸವ

ಶೃಂಗೇರಿ: ತಾಲೂಕಿನ ವಿದ್ಯಾರಣ್ಯಪುರ ಶ್ರೀರಾಮ ದೇವಸ್ಥಾನದ ಸೀತಾಕಲ್ಯಾಣ ಮಹೋತ್ಸವ ಮಾ.28ರ ಸಂಜೆ ಶಾರದಾಪೀಠದ ಜಗದ್ಗುರು ಶ್ರೀ ವಿಧುಶೇಖರ ಭಾರತೀ ಸ್ವಾಮೀಜಿ ಸಾನ್ನಿಧ್ಯದಲ್ಲಿ ನೆರವೇರಲಿದೆ. ಶ್ರೀರಾಮ ಸೇವಾ ಸಮಿತಿಯಿಂದ ಶ್ರೀರಾಮ ವಸಂತ ನವರಾತ್ರಿ ಪ್ರಯುಕ್ತ ಅಂದು ಬೆಳಗ್ಗೆ ಕಲ್ಪೋಕ್ತ ಪೂಜೆ, ಶ್ರೀ ಮದ್ರಾಮಾಯಣ ಪಾರಾಯಣ, ರಾಮದೇವರ ಪ್ರತಿಷ್ಠಾಪನಾ ವರ್ಧಂತಿ, ರಾಮನವಮಿ, ಶ್ರೀರಾಮ ಪಟ್ಟಾಭಿಷೇಕ, ರಾಮತಾರಕ ಹೋಮ ಹಾಗೂ ಸಂಜೆ ಬೀದಿ ಉತ್ಸವ, ಭಜನೆ, ಅಷ್ಟಾವಧಾನ ಸೇವೆ ನಡೆಯಲಿದೆ. ಮಾ.29ರಂದು ಸತ್ಯಗಣಪತಿ ವ್ರತ, ಸತ್ಯನಾರಾಯಣ ವ್ರತ ಹಾಗೂ ಸಂಜೆ ಶ್ರೀ ಹನುಮದುತ್ಸವ ಧಾರ್ಮಿಕ ಆಚರಣೆಯೊಂದಿಗೆ ಸಂಪನ್ನಗೊಳ್ಳಲಿದೆ.

ಶೃಂಗೇರಿ ಸಮೀಪದ ವಿದ್ಯಾರಣ್ಯಪುರ 1386ರಲ್ಲಿ ಕರ್ನಾಟಕ ಸಿಂಹಾಸನ ಪ್ರತಿಚ್ಠಾಪನಾಚಾರ್ಯ ಜಗದ್ಗುರು ಶ್ರೀ ವಿದ್ಯಾರಣ್ಯ  ಸ್ವಾಮೀಜಿ ಅವರ ನೆನಪಿಗಾಗಿ ವಿಜಯನಗರ ಸಾಮ್ರಾಜ್ಯದ ಎರಡನೇ ಹರಿಹರರಾಯ ಕಾಲದಲ್ಲಿ ವಿದ್ಯಾರಣ್ಯಪುರ ನಿರ್ಮಿತಗೊಂಡಿತ್ತು. ವಿದ್ಯಾರಣ್ಯಪುರ ಅಗ್ರಹಾರದಲ್ಲಿ ಹಲವು ದೇವಾಲಯಗಳಿದ್ದು ಶ್ರೀರಾಮ ದೇವಸ್ಥಾನ 120 ವರ್ಷಗಳ ಹಿಂದೆ ಜಗದ್ಗುರು ಸಚ್ಚಿದಾನಂದ ಶ್ರೀ ಶಿವಾಭಿನವ ನೃಸಿಂಹಭಾರತೀ ಸ್ವಾಮೀಜಿ ಅವರಿಂದ ನಿರ್ಮಿಸಲ್ಪಟ್ಟಿತ್ತು. ಅಂದಿನಿಂದ ಪ್ರಾರಂಭಗೊಂಡ ಶ್ರೀರಾಮ ದೇವಾಲಯದಲ್ಲಿ ಪ್ರತಿ ವರ್ಷ ಚೈತ್ರ ಮಾಸ ಯುಗಾದಿಯಿಂದ ಏಕಾದಶಿತನಕ ರಾಮೋತ್ಸವನ್ನು ವಿಜೃಂಭಣೆಯಿಂದ ಆಚರಿಸಲಾಗುತ್ತಿದೆ.