ಕಾಲುಸಂಕ ನಿರ್ಮಾಣಕ್ಕೆ ಆಗಿಲ್ಲ ಟೆಂಡರ್

 ಶೃಂಗೇರಿ: ಕೆರೆಕಟ್ಟೆ ಗ್ರಾಪಂನ ಭಲೇಕಡಿ ಗ್ರಾಮದ ಕಾಲುಸಂಕಕ್ಕೆ ಶಾಶ್ವತ ಪರಿಹಾರ ಎಂಬಂತೆ ನಕ್ಸಲ್ ಪ್ಯಾಕೇಜ್‌ನಡಿ ಅನುದಾನ ಘೋಷಣೆಯಾಗಿದೆ. ಆದರೆೆ ಟೆಂಡರ್ ಪ್ರಕ್ರಿಯೆ ಆಗದೆ ಕಾಮಗಾರಿ ಈವರೆಗೂ ಅರಂಭವಾಗಿಲ್ಲ. 

ತಾಲೂಕಿನಿಂದ 22 ಕಿ.ಮೀ. ದೂರದಲ್ಲಿರುವ ಕೆರೆಕಟ್ಟೆ ಗ್ರಾಪಂನ ಭಲೇಕಡಿ ಗ್ರಾಮಸ್ಥರು ಮೂಲ ಸೌಕರ್ಯಗಳಿಂದ ವಂಚಿತರಾಗಿದ್ದು, ಗ್ರಾಮಸ್ಥರು ಒಂದು ಬೆಂಕಿಪೊಟ್ಟಣ ಬೇಕಾದರೂ ಗ್ರಾಮದ ಕಚ್ಚಾರಸ್ತೆ ಮೂಲಕ ರಾಷ್ಟ್ರೀಯ ಹೆದ್ದಾರಿ ತಲುಪಲು ಸುಮಾರು 7 ಕಿ.ಮೀ. ಸಾಗಬೇಕು. ಪಡಿತರ ತರಲು, ಆರೋಗ್ಯ ಸಮಸ್ಯೆ ಎದುರಾದರೆ ಆಸ್ಪತ್ರೆಗೆ ಬರಲು ಕೆರೆಕಟ್ಟೆ ಅಥವಾ ನೆಮ್ಮಾರ್‌ಗೆ ಬರಬೇಕು. ಇಂತಹ ಸ್ಥಿತಿಯಿದ್ದರೂ ಜನಪ್ರತಿನಿಧಿಗಳು ಕಾಲುಸಂಕ ನಿರ್ಮಾಣಕ್ಕೆ ಕಾಳಜಿ ವಹಿಸುತ್ತಿಲ್ಲ.

ಭಲೇಕಡಿ ಗ್ರಾಮದ ಹುಲ್ಗಾರ್‌ಬೈಲಿನ ಹಳ್ಳಕ್ಕೆ 40 ಅಡಿ ಉದ್ದದ ತೂಗು ಸೇತುವೆಗೆ 55 ಲಕ್ಷ ರೂ. ಅನುದಾನ ಬಿಡುಗಡೆಯಾಗಿದೆ. ಆದರೆ ಟೆಂಡರ್ ಪ್ರಕ್ರಿಯೆ ತಡೆಹಿಡಿಯಲಾಗಿದೆ. ಕಾಲುಸಂಕದ ಮರ ಅಲ್ಲಲ್ಲಿ ತುಂಡಾಗಿದ್ದು ಸದ್ಯದಲ್ಲೇ ಮಳೆಗಾಲ ಪ್ರಾರಂಭವಾಗುವುದರಿಂದ ಗ್ರಾಮಸ್ಥರು ಜೀವ ಭಯದಲ್ಲಿ ಸಂಚರಿಸುವಂತಾಗಿದೆ.