ದೇವರ ಸ್ಮರಣೆಯಿಂದ ಸುಖ, ಶಾಂತಿ

ಎನ್.ಆರ್.ಪುರ: ಪ್ರತಿಯೊಬ್ಬರೂ ಶ್ರದ್ಧೆಯಿಂದ ದೇವರ ಸ್ಮರಣೆ ಮಾಡಿದರೆ ಜೀವನದಲ್ಲಿ ಸುಖ, ಶಾಂತಿ, ನೆಮ್ಮದಿ ಪಡೆಯಲು ಸಾಧ್ಯ ಎಂದು ಜಿಲ್ಲಾ ಜನಜಾಗೃತಿ ವೇದಿಕೆ ನಿಕಟಪೂರ್ವ ಅಧ್ಯಕ್ಷ ಅರವಿಂದ ಸೋಮಯಾಜಿ ತಿಳಿಸಿದರು.

ಗುಡ್ಡೇಹಳ್ಳ ಶಾಲೆಯಲ್ಲಿ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯ ಬಿ.ಎಚ್.ಕೈಮರ ವಲಯದ ಪ್ರಗತಿ ಬಂಧು ಸ್ವಸಹಾಯ ಸಂಘಗಳ ಒಕ್ಕೂಟದ ಆಶ್ರಯದಲ್ಲಿ ನಡೆದ ಸಾಮೂಹಿಕ ಸತ್ಯನಾರಾಯಣ ಪೂಜೆ ಹಾಗೂ ಧಾರ್ಮಿಕ ಸಭೆಯಲ್ಲಿ ಮಾತನಾಡಿ, ಮನುಷ್ಯರು ಸತ್ಸಂಗ ಮಾಡಬೇಕು. ತಂದೆ, ತಾಯಿಯನ್ನು ಚೆನ್ನಾಗಿ ಪೋಷಿಸಕೊಳ್ಳಬೇಕು ಎಂದರು.

ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯ ಕೊಪ್ಪ ಹಾಗೂ ಎನ್.ಆರ್.ಪುರ ತಾಲೂಕು ಯೋಜನಾಧಿಕಾರಿ ರಾಜೇಶ್ ಮಾತನಾಡಿ, ಕೊಪ್ಪ, ಎನ್.ಆರ್.ಪುರ ತಾಲೂಕು ವ್ಯಾಪ್ತಿಯಲ್ಲಿ 2240 ಸ್ವಸಹಾಯ ಸಂಘಗಳಿವೆ. 15,900 ಸದಸ್ಯರಿದ್ದಾರೆ. ಈ ಹಿಂದೆ ಕೊಪ್ಪ, ಎನ್.ಆರ್.ಪುರ, ಶೃಂಗೇರಿ, ಬಾಳೆಹೊನ್ನೂರು ಸೇರಿತ್ತು. ನಿರ್ವಹಣೆ ಮಾಡುವುದು ಕಷ್ಟವಾಗಿದ್ದರಿಂದ ಈಗ ಶೃಂಗೇರಿ, ಬಾಳೆಹೊನ್ನೂರು ಪ್ರತ್ಯೇಕವಾಗಿದೆ. 7 ವಲಯಗಳು ಕಾರ್ಯನಿರ್ವಹಿಸುತ್ತಿವೆ. ಶೇ.100 ರಷ್ಟು ಆರ್ಥಿಕ ಪ್ರಗತಿ ಸಾಧಿಸಿದ್ದೇವೆ. ಸಾಲ ಮಾತ್ರ ನೀಡುತ್ತಿಲ್ಲ. ಧಾರ್ಮಿಕ, ಸಾಮಾಜಿಕ ಚಟುವಟಿಕೆಗಳಲ್ಲೂ ತೊಡಗಿಸಿಕೊಂಡಿದ್ದೇವೆ ಎಂದರು.

 ಸತ್ಯನಾರಾಯಣ ಪೂಜಾ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಸಂಜೀವ ಮಾತನಾಡಿ, ಮನಸ್ಸಿನ ಒಳಗೆ ಇರುವ ಕೊಳಕನ್ನು ಮೊದಲು ತೆಗೆಯಬೇಕು. ಸ್ಥಾರ್ಥ ಬಿಡಬೇಕು ಎಂದರು. 

ಗುಡ್ಡೇಹಳ್ಳ ಸರ್ಕಾರಿ ಶಾಲೆಯ ಮುಖ್ಯಶಿಕ್ಷಕ ಆರ್.ನಾಗರಾಜ್, ಮಾವಿನಮನೆ ತಿಮ್ಮಣ್ಣ, ಗ್ರಾಪಂ ಸದಸ್ಯರಾದ ಮನೋಹರ್, ಉಮಾದೇವಿ, ನಾಗರತ್ನಾ, ಗ್ರಾಪಂ ಅಧ್ಯಕ್ಷೆ ಕೆ.ಟಿ.ನಾಗರತ್ನಾ, ಜೇಸಿ ಅಧ್ಯಕ್ಷ ಆದರ್ಶ ಬಿ.ಗೌಡ, ಸಂದೀಪಕುಮಾರ್, ಶ್ರೀನಾಥ್, ಪ್ರೇಮಾ ಶ್ರೀನಿವಾಸ್, ವಿಜಯಕುಮಾರ್, ಲಕ್ಷ್ಮಣ, ಶೈನಾ, ಕಾಸನಚಂದ್ರಶೇಖರ್, ತೀರ್ಥೇಶ್, ಅನ್ನಪೂರ್ಣ, ಸಿಬಿ, ಮೇರಿ, ಮಂಜುಳಾ, ಶೈನಿ, ಅಶ್ವಿನಿ ಇತರರಿದ್ದರು.