ಜಾನಪದ ಸಮಾಜ ಒಗ್ಗೂಡಿಸುವ ದೊಡ್ಡ ಶಕ್ತಿ

ತರೀಕೆರೆ: ನೆಲದಲ್ಲಿ ಬಹಳಷ್ಟು ಜಾನಪದ ಸಾಹಿತ್ಯ, ಕಲೆ ಸೃಷ್ಟಿಯಾಗಿದ್ದು ನೂರಾರು ಕಲಾವಿದರ ಸೇವೆ ಅನನ್ಯ ಮತ್ತು ಅವಿಸ್ಮರಣೀಯ ಎಂದು ಜಾನಪದ ಕಲಾವಿದ ಟಿ.ಸಿ.ಚಂದ್ರಪ್ರಕಾಶ್ ಹೇಳಿದರು. 

ಅಜ್ಜಂಪುರ ತಾಲೂಕಿನ ಗಡೀಹಳ್ಳಿ ಸರ್ಕಾರಿ ಶಾಲೆ ಆವರಣದಲ್ಲಿ ಮಾಳೇನಹಳ್ಳಿ ಜಾನಪದ ಸಾಹಿತಿ ಎಂ.ಎಸ್.ಕಲ್ಲಪ್ಪ ಹೆಸರಿನಲ್ಲಿ ನಿರ್ಮಿಸಿದ್ದ ವೇದಿಕೆಯಲ್ಲಿ ಕರ್ನಾಟಕ ಜಾನಪದ ಪರಿಷತ್ ಜಿಲ್ಲಾ ಮತ್ತು ತಾಲೂಕು ಘಟಕದ ಸಹಯೋಗದಲ್ಲಿ ಭಾನುವಾರ ಆಯೋಜಿಸಿದ್ದ 7ನೇ ತಾಲೂಕು ಜಾನಪದ ಸಮ್ಮೇಳನದ ಸರ್ವಾಧ್ಯಕ್ಷತೆವಹಿಸಿ ಮಾತನಾಡಿದರು.

ಮಾಜಿ ಶಾಸಕ ಎಸ್.ಎಂ.ನಾಗರಾಜ್ ಮಾತನಾಡಿ, ಶಾಲಾ ಕಾಲೇಜುಗಳಲ್ಲಿ ಜಾನಪದ ಕಲೆ ಉತ್ತೇಜಿಸುವಂತಹ ಶಿಕ್ಷಣ ನೀಡಬೇಕು. ಪಠ್ಯಗಳಲ್ಲಿ ಜಾನಪದಕ್ಕೆ ಸಂಬಂಧಿಸಿದ ವಿಷಯ ಅಳವಡಿಸಿ ಆಕರ್ಷಣೀಯವಾಗಿ ಬೋಧಿಸುವ ಕೆಲಸವಾಗಬೇಕು. ಇದರಿಂದ ಮಕ್ಕಳಲ್ಲಿ ಜಾನಪದ ಕಲೆ, ಸಾಹಿತ್ಯ, ಸಂಗೀತದ ಆಸಕ್ತಿ ಮೂಡಲಿದೆ ಎಂದರು. 

ಜಿಪಂ ಮಾಜಿ ಸದಸ್ಯ ಎಂ.ಕೃಷ್ಣಮೂರ್ತಿ ಮಾತನಾಡಿ, ಭಾರತೀಯ ಸಂಸ್ಕೃತಿ ಹಲವು ವಿಶಿಷ್ಟತೆಯಿಂದ ಕೂಡಿದೆ. ಇಲ್ಲಿನ ಆಚಾರ, ವಿಚಾರ, ಉಡುಗೆ, ತೊಡುಗೆ, ಹಬ್ಬ ಹರಿದಿನಗಳ ಆಚರಣೆ ಜಾನಪದದಿಂದ ಹೆಚ್ಚು ಉದ್ಭವಿಸಿದೆ. ಬಹುತೇಕ ವರ್ಷಗಳಿಂದ ಜಾನಪದ ಕಲೆ, ಸಂಗೀತ, ಸಂಸ್ಕೃತಿಗಾಗಿ ವಿಶಿಷ್ಟ ಸೇವೆ ಸಲ್ಲಿಸಿರುವ ಟಿ.ಸಿ.ಚಂದ್ರಪ್ರಕಾಶ್ ಅವರನ್ನು 7ನೇ ತಾಲೂಕು ಜಾನಪದ ಸಮ್ಮೇಳನದ ಸರ್ವಾಧ್ಯಕ್ಷರನ್ನಾಗಿ ಆಯ್ಕೆ ಮಾಡಿರುವುದು ಅತ್ಯಂತ ಸಮಂಜಸವೆನಿಸಿದೆ ಎಂದು ಶ್ಲಾಸಿದರು.

ಕರ್ನಾಟಕ ಜಾನಪದ ಪರಿಷತ್ ಜಿಲ್ಲಾಧ್ಯಕ್ಷ ಜಿ.ಬಿ.ಸುರೇಶ್ ಮಾತನಾಡಿ, ಜಾನಪದ ಕಲೆ, ಸಾಹಿತ್ಯ, ಸಂಗೀತ ಮನುಷ್ಯನ ವ್ಯಕ್ತಿತ್ವ ವಿಕಸನಗೊಳಿಸುತ್ತದೆ. ಸಮಾಜಕ್ಕೆ ಉತ್ತಮ ನಾಗರಿಕತೆ ಕಲಿಸುತ್ತದೆ. ಸಮಾಜದ ಓರೆಕೋರೆ ತಿದ್ದಿ ಸ್ವಸ್ಥ ಸಮಾಜ ನಿರ್ಮಾಣ ಮಾಡುವಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ ಎಂದರು.

ಕರ್ನಾಟಕ ಜಾನಪದ ಪರಿಷತ್ ಜಿಲ್ಲಾ ಉಪಾಧ್ಯಕ್ಷ ಗೊಂಡೇದಹಳ್ಳಿ ತಿಪ್ಪೇಶ್, ಜಿಲ್ಲಾ ಸಂಚಾಲಕಿ ಗಾಯತ್ರಮ್ಮ, ತಾಲೂಕು ಅಧ್ಯಕ್ಷ ಮಾಳೇನಹಳ್ಳಿ ಬಸಪ್ಪ, ಗೌರವಾಧ್ಯಕ್ಷ ಮರುಳಸಿದ್ದಪ್ಪ, ಸಾಹಿತಿ ಇಮ್ರಾನ್ ಅಹ್ಮದ್ ಬೇಗ್, ಪ್ರಮುಖರಾದ ಆರ್.ನಾಗೇಶ್, ದಂಡೂರು ರಾಜಣ್ಣ, ಜಯಣ್ಣ, ಚಿಕ್ಕಲೂರು ಜಯಣ್ಣ, ಡಿ.ಪಿ.ರಾಜಪ್ಪ, ಶಂಕರಪ್ಪ, ಪರಪ್ಪ, ಕಾರೇಹಳ್ಳಿ ಬಸಪ್ಪ, ಜಗದೀಶ್ವರ ಆಚಾರ್ ಮತ್ತಿತರರಿದ್ದರು.