ಮಳೆ ಅಭಾವದಿಂದ ರೈತರಲ್ಲಿ ಆತಂಕ

ಕಡೂರು:  ಆಕಾಶದ ತುಂಬ ಮೋಡಗಳಿದ್ದರೂ ಕೂಡ ಒಂದನಿ ಮಳೆಯಿಲ್ಲ, ನೆತ್ತಿ ಸುಡುವ ಬಿಸಿಲು ಬಳಿಕ ಮಳೆಯಿಲ್ಲದೆ ಚಲಿಸುವ ಮೋಡಗಳಿಂದ ರೈತಾಪಿ ವರ್ಗ ತೀವ್ರ ಆತಂಕಕ್ಕೊಳಗಾಗಿದೆ.

ಕಡೂರು ತಾಲೂಕಿನಲ್ಲಿ ಮುಂಗಾರು ಮಳೆ ಕೈಕೊಟ್ಟಿದ್ದು ಇದುವರೆಗೂ ಶೇ.46ರಷ್ಟು ಮಳೆ ಕೊರತೆ ಉಂಟಾಗಿದೆ. ಒಟ್ಟಾರೆ 53.385 ಹೆಕ್ಟೇರ್ ಬಿತ್ತನೆ ಪ್ರದೇಶದಲ್ಲಿ ಸಕಾಲಕ್ಕೆ ಮಳೆಯಾಗದೆ ಸುಮಾರು 2258 ಹೆಕ್ಟೇರ್ ಪ್ರದೇಶದಲ್ಲಿ ವಿವಿಧ ಬೆಳೆಗಳು ಬಿತ್ತನೆಯಾಗಿವೆ.

ಇನ್ನು ಮಳೆಗಾಲದಲ್ಲಿ ತುಂಬಿ ತುಳುಕುತ್ತಿದ್ದ ಕೆರೆಕಟ್ಟೆಗಳು ಬರಿದಾಗಿವೆ. ಕೃಷಿಯ ಬದುಕು ಕೈಕೊಟ್ಟರೆ ಆಸರೆಯಾಗುತ್ತಿದ್ದ ಹೈನುಗಾರಿಕೆಯ ಬದುಕಿಗೆ ಮೇಯಲು ಬೇಕಿದ್ದ ದನಕರುಗಳಿಗೆ ಹಸಿ ಮೇವಿನ ಕೊರತೆಯಾಗಿದೆ. ಅಲ್ಲದೆ ಗ್ರಾಮೀಣ ಜನರು ಕುಡಿಯುವ ನೀರಿಗೆ ಪರಿತಪಿಸುವಂತಾಗುವ ದಿನಗಳು ಸಮೀಪಿಸುತ್ತಿವೆ. ಮಳೆಗಾಗಿ ರೈತರು ಮುಗಿಲತ್ತ ಮುಖ ಮಾಡಿದ್ದಾರೆ. ಜುಲೈ ಅಂತ್ಯದೊಳಗೆ ಒಂದಷ್ಟು ನಿರೀಕ್ಷಿತ ಮಳೆಯೂ ಬಾರದೆ ಹೋದರೆ ಮುಂಗಾರು ಸಂಪೂರ್ಣ ನೆಲಕಚ್ಚುವ ಸಾಧ್ಯತೆ ದಟ್ಟವಾಗಿವೆ.

ಈ ಬಾರಿಯ ಮುಂಗಾರಿನಲ್ಲಿ ಉತ್ತಮ ಮಳೆಯ ನಿರೀಕ್ಷೆಯಲ್ಲಿದ್ದ ರೈತರಿಗೆ ನಿರಾಸೆಯಾಗಿದೆ. ಬಿತ್ತನೆಗೆ ಸಿದ್ಧವಾಗಿದ್ದ ಜಮೀನುಗಳು ಮಳೆ ಕೊರತೆಯಿಂದ ಖಾಲಿ ಬಿದ್ದಿವೆ. ಬಿತ್ತನೆ ಮಾಡಿದ ಬೆಳೆಗಳು ಕಮರುತ್ತಿವೆ. ಬೀಸುತ್ತಿರುವ ಒಣಗಾಳಿಯಿಂದ ನೆಲದ ತೇವಾಂಶ ಸಂಪೂರ್ಣ ಕಡಿಮೆಯಾಗುತ್ತಿದ್ದು ಕೊರೆಸಲಾಗಿರುವ ಕೊಳವೆಬಾವಿಗಳಲ್ಲಿ ಅಂತರ್ಜಲ ಮಟ್ಟ ಇಳಿಮುಖವಾಗುತ್ತಿದೆ.

ತಾಲೂಕಿನ ಹಿರೇನಲ್ಲೂರು-ಚೌಳಹಿರಿಯೂರು ಹಾಗೂ ಕಡೂರು ಕಸಬಾ ಭಾಗಗಳಲ್ಲಿ ಪ್ರತಿ ವರ್ಷದ ವಾಡಿಕೆಯಂತೆ ಸುಮಾರು 3,500 ಹೆಕ್ಟೇರ್ ಪ್ರದೇಶದಲ್ಲಿ ಬೆಳೆಯುತ್ತಿದ್ದ ಈರುಳ್ಳಿ ಬೆಳೆ ಈ ಬಾರಿ ಮಳೆಯಿಲ್ಲದೆ ಬಿತ್ತನೆಗೆ ಹಿನ್ನಡೆಯಾದರೆ, ನೀರಾವರಿ ವ್ಯವಸ್ಥೆ ಕಲ್ಪಿಸಿಕೊಂಡಿರುವ ಕೆಲ ರೈತರು ಸೇರಿದಂತೆ ಸುಮಾರು 350-400 ಹೆಕ್ಟೇರ್ ಪ್ರದೇಶದಲ್ಲಿ ಈರುಳ್ಳಿ ಬಿತ್ತನೆಗೆ ಈ ಬಾರಿ ಸೀಮಿತವಾಗಿದೆ. 

ಮಳೆಯ ವಸ್ತುಸ್ಥಿತಿಗಳ ನಿಖರ ಮಾಹಿತಿ ನೀಡಬೇಕಾದ ಮಳೆಮಾಪನ ಕೇಂದ್ರಗಳು ಬಹುತೇಕ ಸಮರ್ಪಕ ನಿರ್ವಹಣೆಯಿಲ್ಲದೆ ಸೊರಗಿವೆ. ಪ್ರತಿ ಗ್ರಾಪಂ ಮಟ್ಟದಲ್ಲಿ ಅಳವಡಿಸಿರುವ ಮಳೆಮಾಪನದ ಕೇಂದ್ರಗಳಲ್ಲಿನ ಶೇ.50ರಷ್ಟು ಮಾಪನ ಕೇಂದ್ರಗಳು ನಿರ್ವಹಣೆಯಿಲ್ಲದಂತಾಗಿವೆ. ಹೀಗಾಗಿ ಬೆಳೆವಿಮೆಗಳ ಬಗ್ಗೆ ಕೃಷಿ ಇಲಾಖೆಯು ರೈತರಲ್ಲಿ ಜಾಗೃತಿ ಮೂಡಿಸುವುದು ಅತಿ ಅವಶ್ಯಕ. ಸ್ಥಳೀಯ ರೈತ ಸಂಪರ್ಕ ಕೇಂದ್ರಗಳಿಗಿಂತ ಗ್ರಾಮ ಪಂಚಾಯಿತಿ ಮಟ್ಟದಲ್ಲಿ ತುರ್ತಾಗಿ ಪ್ರಚಾರ ಕಾರ್ಯವಾಗಬೇಕಿದೆ.