ದೇಸಿ ಭತ್ತದ ತಳಿಗಳು ಮಲೆನಾಡು ಪ್ರದೇಶಕ್ಕೆ ಸೂಕ್ತ

ಮೂಡಿಗೆರೆ: ದೇಸಿ ಭತ್ತದ ತಳಿಗಳು ಮಲೆನಾಡಿನ ಭೂಪ್ರದೇಶಕ್ಕೆ ಸೂಕ್ತವಾಗುತ್ತವೆ. ರೈತರು ದೇಸಿ ಭತ್ತದ ತಳಿಯನ್ನು ಬಿತ್ತನೆ ಮಾಡುವ ಮೂಲಕ ಹೆಚ್ಚಿನ ಇಳುವರಿ ಪಡೆದು ಲಾಭಗಳಿಸಲು ಅವಕಾಶವಿದೆ ಎಂದು ಪ್ರಗತಿಪರ ಕೃಷಿಕ ಶ್ರೀವತ್ಸ ಹೇಳಿದರು.

ಕೃಷಿ ವಿಜ್ಞಾನ ಕೇಂದ್ರದಲ್ಲಿ ಶನಿವಾರ ಕೃಷಿ ಇಲಾಖೆಯಿಂದ ನಡೆದ ದೇಸಿ ಭತ್ತದ ತಳಿಗಳ ಸಂರಕ್ಷಣೆ ಹಾಗೂ ಉತ್ತೇಜನ ಮತ್ತು ರೈತರೊಂದಿಗೆ ಸಂವಾದ ಕಾರ್ಯಕ್ರಮದಲ್ಲಿ ಮಾತನಾಡಿ, ದೇಸಿ ಭತ್ತದ ತಳಿಗಳು ರೋಗ ನಿರೋಧಕ ಶಕ್ತಿಯನ್ನು ಹೊಂದಿರುವುದಲ್ಲದೆ ಸ್ಥಳೀಯ ಭೂಪ್ರದೇಶಕ್ಕೆ ಹೊಂದಾಣಿಕೆಯಾಗುತ್ತವೆ. ಕಣ್ಮರೆಯಾಗುತ್ತಿರುವ ಸ್ಥಳೀಯ ಭತ್ತದ ತಳಿಗಳ ಸಂರಕ್ಷಿಸುವ ಜತೆಗೆ ಆಯಾ ಪ್ರದೇಶಕ್ಕೆ ಸೂಕ್ತವಾದ ದೇಸಿ ತಳಿಗಳನ್ನು ಗುರುತಿಸಿ ಸಂರಕ್ಷಿಸಿ ಅಭಿವೃದ್ಧಿಪಡಿಸಬೇಕಿದೆ. ಆ ನಿಟ್ಟಿನಲ್ಲಿ ಪ್ರತಿಯೊಬ್ಬ ರೈತರು ಕಾರ್ಯಯೋನ್ಮುಖರಾಗುವ ಮೂಲಕ ಭತ್ತದ ಗದ್ದೆಗಳನ್ನು ಹಾಳು ಬಿಡಬಾರದು. ಪ್ರತಿಯೊಬ್ಬರೂ ದೇಸಿ ತಳಿಯನ್ನು ಆಯ್ಕೆ ಮಾಡುವ ಮೂಲಕ ಭತ್ತದ ತಳಿಗೆ ಪ್ರೋತ್ಸಾಹ ನೀಡಬೇಕು ಎಂದು ತಿಳಿಸಿದರು.

ಸ್ಥಳೀಯ ಭತ್ತದ ಬೆಳೆಗಾರ ಅರುಣ್ಕುಮಾರ್ ಮಾತನಾಡಿ, ಭತ್ತದ ಬೆಳೆ ಹಾಗೂ ತಳಿಗಳಲ್ಲಿ ಈಗ ಸಾಕಷ್ಟು ಬದಲಾವಣೆಗಳಾಗಿದೆ. ಸಾವಯವ ಕೃಷಿ ಬಗ್ಗೆ ಅರಿವು ಮೂಡಿಸುವ ಕೆಲಸವನ್ನು ಕೃಷಿ ಇಲಾಖೆ ಮತ್ತು ಕೃಷಿ ವಿಜ್ಞಾನ ಕೇಂದ್ರ ಕಾಲಕಾಲಕ್ಕೆ ಮಾಡುತ್ತಿದೆ. ಮೂಲ ಭತ್ತದ ಸಂತತಿಗಳನ್ನು ನಾವು ಮರೆಯಬಾರದು. ಹಸಿರುಕ್ರಾಂತಿ ಪ್ರಾರಂಭವಾದ ಮೇಲೆ ಸಾವಯುವ ಬಿತ್ತನೆ ಬೀಜಗಳು, ರಾಸಾಯನಿಕ ಗೊಬ್ಬರ, ಕೀಟನಾಶಕ, ರೋಗನಾಶಕಗಳು ಬಂದಿದೆ ಎಂದರು.

 ಭತ್ತದ ಗದ್ದೆಯಲ್ಲಿ ಕಳೆ ತೆಗೆಯಲು ಕಾರ್ಮಿಕರ ಸಮಸ್ಯೆಯಿಂದಾಗಿ ಈಗ ಮಾರುಕಟ್ಟೆಗೆ ಕಳೆನಾಶಕಗಳು ಬಂದಿದೆ. ಬೇಸಾಯ ಕ್ರಮವನ್ನು ಮುಂದುವರಿಸಲು ಪ್ರತಿ ಹಂತದಲ್ಲೂ ಯಾಂತ್ರಿಕೀಕರಣ ವ್ಯವಸ್ಥೆ ಮಾರುಕಟ್ಟೆಗೆ ಬಂದಿದೆ. ಇಂತಹ ಆಧುನಿಕ ಪರಿಸ್ಥಿತಿಯನ್ನು ರೈತರು ಅರ್ಥ ಮಾಡಿಕೊಳ್ಳದೆ ಕಾರ್ಮಿಕರ ಸಮಸ್ಯೆ ನೆಪದಲ್ಲಿ ಭತ್ತದ ಗದ್ದೆಗಳನ್ನು ಪಾಳು ಬಿಡುವುದು ಸರಿಯಲ್ಲ ಎಂದರು. 

 ತಾಲೂಕು ರೈತ ಉತ್ಪಾದಕರ ಸಹಕಾರ ಸಂಘದ ಅಧ್ಯಕ್ಷ ಪೂರ್ಣೇಶ್, ಕೃಷಿ ಇಲಾಖೆ ಜಿಲ್ಲಾ ಉಪನಿರ್ದೇಶಕಿ ಕುಮುದಾ, ಸಹಾಯಕ ಕೃಷಿ ನಿರ್ದೇಶಕಿ ಸುಮಾ, ಕೃಷಿ ಅಧಿಕಾರಿ ಗೀತಾ, ತಾಂತ್ರಿಕ ವ್ಯವಸ್ಥಾಪಕಿ ರಶ್ಮಿ, ಅನನ್ಯಾ ಇತರರಿದ್ದರು.