ಕಾಡಾನೆಗಳ ದಾಳಿಯಿಂದ ಬೆಳೆ ನಷ್ಟ

 ಲಿಂಗದಹಳ್ಳಿ: ನಂದಿಬಟ್ಟಲು, ತಣಿಗೆಬೈಲು, ಹುಣಸೆಬೈಲು, ಜೈಪುರ ಮುಂತಾದ ಗ್ರಾಮಗಳ ವ್ಯಾಪ್ತಿಯಲ್ಲಿ ತೆಂಗು, ಅಡಿಕೆ, ಮಾವು, ಹಲಸು, ಕಾಫಿ, ಕಾಳುಮೆಣಸು ಬೆಳೆಗಳನ್ನು ಕಾಡಾನೆಗಳು  ತುಳಿದು, ಮುರಿದು ನಾಶಪಡಿಸುತ್ತಿರುವುದರಿಂದ ಈ ಭಾಗದ ತೋಟದ ಬೆಳೆಗಾರರಿಗೆ ಅಪಾರ ನಷ್ಟ ಉಂಟಾಗುತ್ತಿದೆ ಎಂದು ನಂದಿಬಟ್ಟಲು ಗ್ರಾಪಂ ಮಾಜಿ ಅಧ್ಯಕ್ಷ ಎನ್.ಪಿ.ಕೃಷ್ಣೇಗೌಡ ತಿಳಿಸಿದರು. 

ಭದ್ರಾ ಅಭಯಾರಣ್ಯ, ತಣಿಗೆಬೈಲು ವಲಯದಲ್ಲಿರುವ ಕಾಡಾನೆಗಳ ಜತೆಗೆ ಬೇರೆ ಬೇರೆ ಸ್ಥಳಗಳಲ್ಲಿ ರೈತರಿಗೆ ತೊಂದರೆ ನೀಡುತ್ತಿರುವ ಕಾಡಾನೆಗಳನ್ನು ತಂದು ತಣಿಗೆಬೈಲು ಅಭಯಾರಣ್ಯಕ್ಕೆ ಅರಣ್ಯ ಇಲಾಖೆ ಬಿಡುತ್ತಿದೆ. ಈ ಪುಂಡಾನೆಗಳು ಅಭಯಾರಣ್ಯದಿಂದ ಹೊರ ಬಂದು ರೈತರ ಜಮೀನುಗಳಿಗೆ ದಾಳಿ ಮಾಡುತ್ತಿರುವುದರಿಂದ ತೋಟದ ಬೆಳೆಗಳು ಕಣ್ಣ ಮುಂದೆಯೇ ನಾಶವಾಗುತ್ತಿರುವುದನ್ನು ಕಂಡು ಅಸಹಾಯಕತೆಯಿಂದ ನೋಡುತ್ತ ಕೂರಬೇಕಾದ ಪರಿಸ್ಥಿತಿ ಇದೆ ತಿಳಿಸಿದ್ದಾರೆ.

ಲಿಂಗದಹಳ್ಳಿ ಹೋಬಳಿಯಾದ್ಯಂತ ಸಣ್ಣ ಮತ್ತು ಅತಿ ಸಣ್ಣ ರೈತರೇ ಹೆಚ್ಚಾಗಿ ವಾಸಿಸುತ್ತಿದ್ದು ಬ್ಯಾಂಕ್, ಸಹಕಾರ ಸಂಘ ಇತರ ಕಡೆಗಳಿಂದ ಸಾಲ ಪಡೆದು ಬೆಳೆಗಳನ್ನು ಬೆಳೆದಿದ್ದು ಸಲು ಬಿಡುತ್ತಿರುವ ಅಡಿಕೆ, ತೆಂಗು, ಮಾವು, ಕಾಫಿ ಮುಂತಾದ ಬೆಳೆಗಳ ನಷ್ಟದಿಂದ ರೈತರಿಗೆ ಸಂಕಷ್ಟವಾಗಿದೆ. ಸಂಬಂಧಪಟ್ಟ ಇಲಾಖೆಯವರು ಇತ್ತ ಗಮನಹರಿಸಿ ಭದ್ರಾ ಅಭಯಾರಣ್ಯದ ಸುತ್ತಲೂ ರೈಲ್ವೆ ಬ್ಯಾರಿಕೇಡ್‌ಗಳನ್ನು ಅಳವಡಿಸಿ ಕಾಡು ಪ್ರಾಣಿಗಳ ದಾಳಿಯನ್ನು ತಡೆಗಟ್ಟುವಂತೆ ಒತ್ತಾಯಿಸಿದ್ದಾರೆ. ಅಗತ್ಯ ಕ್ರಮ ಕೈಗೊಳ್ಳದಿದ್ದರೆ ಅರಣ್ಯ ಇಲಾಖೆಯ ವಿರುದ್ಧ ಪ್ರತಿಭಟನೆ ನಡೆಸಬೇಕಾಗುತ್ತದೆ ಎಂದು ಎಚ್ಚರಿಸಿದ್ದಾರೆ. 

ನಂದಿಬಟ್ಟಲು ಗ್ರಾಮದ ಸರಸಮ್ಮ, ಮಂಜಪ್ಪ ಎಂಬುವವರಿಗೆ ಸೇರಿರುವ ನಂದಿಬಟ್ಟಲು ಸರ್ವೇ ನಂ. 103ರಲ್ಲಿರುವ ಜಮೀನಿನಲ್ಲಿ ಸಲು ಬಿಡುತ್ತಿದ್ದ ತೆಂಗಿನ ಮರವನ್ನು ಕಾಡಾನೆಗಳು ಬುಡ ಸಮೇತವಾಗಿ ಉರುಳಿಸಿದ್ದು ಅರಣ್ಯ ಇಲಾಖೆಯವರು ಸ್ಥಳ ಪರಿಶೀಲನೆ ನಡೆಸಿ ಸೂಕ್ತ ಬೆಳೆ ಪರಿಹಾರ ನೀಡುವಂತೆ ಒತ್ತಾಯಿಸಿದ್ದಾರೆ.