ಮೂಡಿಗೆರೆ: ರಾಜಕೀಯ ಪಕ್ಷಗಳು ಇಬ್ಬಾಗವಾಗಿ ಜಿದ್ದಿಗೆ ಬಿದ್ದವರಂತೆ ಸ್ಪರ್ಧಿಸಿ ಭಾರಿ ಪೈಪೋಟಿ ನಡೆದಿದ್ದ ತಾಲೂಕು ವ್ಯವಸಾಯೋತ್ಪನ್ನ ಮಾರಾಟ ಸಹಕಾರ ಸಂಘದ ಚುನಾವಣೆ ಭಾನುವಾರ ನಡೆದು ಸಂಜೆ ಮತ ಎಣಿಕೆ ಆರಂಭವಾಗಿ ಅದೆ ದಿನ ತಡರಾತ್ರಿ ಫಲಿತಾಂಶ ಪ್ರಕಟವಾಗಿದೆ.
8 ಮಂದಿ ಸದಸ್ಯ ಸ್ಥಾನಕ್ಕೆ ಕಾಂಗ್ರೆಸ್-ಜೆಡಿಎಸ್ನಿಂದ ಟಿಎಪಿಸಿಎಂಎಸ್ ಅಭಿವೃದ್ಧಿ ವೇದಿಕೆ ಹೆಸರಿನಲ್ಲಿ ಮತ್ತು ಬಿಜೆಪಿ-ಜೆಡಿಎಸ್ನಿಂದ ಎನ್ಡಿಎ ಹೆಸರಿನಲ್ಲಿ 2 ತಂಡಗಳಾಗಿ ತಲಾ 8 ರಂತೆ 16 ಮಂದಿ ಸ್ಪರ್ಧಿಸಿದ್ದರು. ಕಾಂಗ್ರೆಸ್-ಜೆಡಿಎಸ್ ಮೈತ್ರಿಯ ಟಿಎಪಿಸಿಎಂಎಸ್ ಅಭಿವೃದ್ಧಿ ವೇದಿಕೆಯಿಂದ ರಂಜನ್ ಅಜಿತ್ ಕುಮಾರ್ ಒಬ್ಬರು ಮಾತ್ರ ಗೆಲುವು ಪಡೆದಿದ್ದಾರೆ. ಉಳಿದ 7 ಮಂದಿ ಅಭ್ಯರ್ಥಿಗಳು ಪರಾಭವಗೊಂಡಿದ್ದಾರೆ. ಬಿಜೆಪಿ-ಜೆಡಿಎಸ್ ಬೆಂಬಲಿತ ಎನ್ಡಿಎ ಅಭ್ಯರ್ಥಿಗಳ ಪೈಕಿ ಎಚ್.ಎಸ್.ಮಂಜುನಾಥ್ ಒಬ್ಬರು ಮಾತ್ರ ಸೋತಿದ್ದಾರೆ. ಉಳಿದ 7 ಮಂದಿ ಗೆಲುವು ಪಡೆದಿದ್ದಾರೆ.
ಸೋಲು ಕಂಡಿರುವ ಎಚ್.ಎಸ್.ಮಂಜುನಾಥ್ ಮೂಲತಃ ಜೆಡಿಎಸ್ ಪಕ್ಷದವರು. ಜೆಡಿಎಸ್ ಜಿಲ್ಲಾಧ್ಯಕ್ಷ ರಂಜನ್ ಅಜಿತ್ ಕುಮಾರ್ ಅವರ ಎದುರು 35 ಮತಗಳ ಅಂತರದಲ್ಲಿ ಸೋಲು ಕಂಡಿದ್ದಾರೆ. 1043 ಮತಗಳ ಪೈಕಿ 1015 ಮತ ಚಲಾವಣೆಯಾಗಿದೆ. ಪ್ರತಿಯೊಬ್ಬ ಮತದಾರ ತಲಾ 8 ಮತ ಚಲಾಯಿಸಿದ್ದಾರೆ. ಟಿಎಪಿಸಿಎಂಎಸ್ಗೆ ಸೇರಿದ ರೈತ ಭವನದಲ್ಲಿ ಬೆಳಗ್ಗೆ 9 ರಿಂದ ಸಂಜೆ 4ರವರೆಗೆ ಮತದಾನ ನಡೆಯಿತು. ಸಂಜೆ 5ರಿಂದ ಮತ ಎಣಿಕೆ ಕಾರ್ಯ ಆರಂಭಗೊಂಡು ರಾತ್ರಿ 10ಕ್ಕೆ ಫಲಿತಾಂಶ ಪ್ರಕಟವಾಗಿದೆ.
2020ರಲ್ಲಿ ನಡೆದ ಚುನಾವಣೆಯಲ್ಲಿ ಜೆಡಿಎಸ್-ಕಾಂಗ್ರೆಸ್ ಬೆಂಬಲಿತ 7 ಮಂದಿ ಅಭ್ಯರ್ಥಿಗಳು, 2015ರಲ್ಲಿ ನಡೆದ ಚುನಾವಣೆಯಲ್ಲಿ ಕಾಂಗ್ರೆಸ್-ಜೆಡಿಎಸ್ ಬೆಂಬಲಿತ 8 ಮಂದಿ ಗೆಲುವು ಪಡೆದಿದ್ದರು. 2 ಬಾರಿಯೂ ಬಿಜೆಪಿ ಏಕಾಂಗಿಯಾಗಿ ಸ್ಪರ್ಧಿಸಿ ಸೋಲು ಕಂಡಿತ್ತು. 2020ರಲ್ಲಿ ಬಿಜೆಪಿ ಬೆಂಬಲಿತ ಬಿ.ಎನ್.ಜಯಂತ್ ಅಲ್ಪಮತದ ಅಂತರದಲ್ಲಿ ಜಯಗಳಿಸಿದ್ದರು. ಆಗ ಟಿಎಪಿಸಿಎಂಎಸ್ನಲ್ಲಿ 3338 ಮಂದಿ ಮತದಾರರಿದ್ದರು. ಈ ಬಾರಿ ವಿವಿಧ ಕಾರಣದಿಂದ 2295 ಮಂದಿ ಷೇರುದಾರರು ಮತದಾನದಿಂದ ಹೊರಗುಳಿದಿದ್ದಾರೆ. ಎ ದರ್ಜೆಯ 5 ಕೃಷಿ ಪತ್ತಿನ ಸಹಕಾರ ಸಂಘದಿಂದ ಟಿಎಪಿಸಿಎಂಎಸ್ ಸದಸ್ಯರಾಗಿ ಐದು ಮಂದಿ ಆಯ್ಕೆಯಾಗಿದ್ದಾರೆ. ಗೋಣಿಬೀಡಿನಿಂದ ವಿ.ಕೆ.ಶಿವೇಗೌಡ, ಮಾಕೋನಹಳ್ಳಿಯಿಂದ ಎಂ.ಎಲ್.ಕಲ್ಲೇಶ್, ನಂದಿಪುರದಿಂದ ಜಿ.ಎಂ.ಪ್ರಸನ್ನ, ಬಣಕಲ್ನಿಂದ ಟಿ.ಎಂ.ಗಜೇಂದ್ರ, ಬಿದರಹಳ್ಳಿಯಿಂದ ಎಂ.ಎನ್.ಪ್ರಸನ್ನ, ಸರ್ಕಾರದ ನಾಮನಿರ್ದೇಶಿತ ಸದಸ್ಯರಾಗಿ ಬಲಿಗೆ ಗ್ರಾಮದ ಈಶ್ವರ ಈಗಾಗಲೆ ಆಯ್ಕೆಯಾಗಿದ್ದಾರೆ.
