ಸಿಎಸ್​ ಪುರ ಬಳಿ ಬಲೆಗೆ ಬಿದ್ದ ಚಿರತೆ

ಗುಬ್ಬಿ: ತಾಲೂಕಿನ ಸಿ.ಎಸ್​.ಪುರ ಬಳಿಯ ವಿ.ಕೋಡಿಹಳ್ಳಿಯಲ್ಲಿ ಮೂವರ ಮೇಲೆರಗಿ ಗಾಯಗೊಳಿಸಿದ್ದ ಚಿರತೆ ಬಲೆಗೆ ಬಿದ್ದಿದೆ. ಅರಣ್ಯ ಹಾಗೂ ಪೊಲೀಸ್​ ಇಲಾಖೆ ಸಿಬ್ಬಂದಿ ಜಂಟಿ ಕಾರ್ಯಾಚರಣೆ ನಡೆಸಿ ಗುರುವಾರ ಸೆರೆ ಹಿಡಿಯುವಲ್ಲಿ ಯಶಸ್ವಿಯಾಗಿದ್ದಾರೆ.

ಚಿಕ್ಕಕೆರೆ ಬಾರೆ ತೋಟದ ಸಾಲಿನಲ್ಲಿ ಕಾಣಿಸಿಕೊಂಡ ಚಿರತೆಯು ಸ್ಥಳಿಯ ರೈತರ ಮೇಲೆರಗಿ ಗಾಯಗೊಳಿಸಿತ್ತು. ಗ್ರಾಮದ ಬಳಿ ಬುಧವಾರ ಪ್ರತ್ಯಕ್ಷ$ವಾದ ಚಿರತೆ ಪ್ರಾಣಹಾನಿ ಮಾಡುವ ಸಾಧ್ಯತೆ ಹಿನ್ನೆಲೆಯಲ್ಲಿ ಗ್ರಾಮಸ್ಥರು ಕಲ್ಲುದೊಣ್ಣೆ ಹಿಡಿದು ಗಾಬರಿ ಮಾಡಿ ಓಡಿಸಲು ಮುಂದಾಗಿದ್ದು ಈ ವೇಳೆ ವ್ಯ್ರಾಗೊಂಡ ಚಿರತೆಯು ದಾಳಿ ನಡೆಸಿದೆ. ಈ ಸಂದರ್ಭದಲ್ಲಿ ಮೂವರು ಗಾಯಗೊಂಡಿದ್ದರು.

ಜಂಟಿ ಕಾರ್ಯಾಚರಣೆ: ಚಿರತೆ ಉಪಟಳ ಬಗ್ಗೆ ಸ್ಥಳಿಯರು ಆಕ್ರೋಶ ವ್ಯಕ್ತಪಡಿಸಿದ್ದಲ್ಲದೆ ಚಿರತೆ ಹಿಡಿಯುವಂತೆ ಅರಣ್ಯ ಇಲಾಖೆಯನ್ನು ಒತ್ತಾಯಿಸಿದ್ದರು. ಕೂಡಲೇ ಎಚ್ಚೆತ್ತುಕೊಂಡ ಅರಣ್ಯ ಇಲಾಖೆ ಸಿಬ್ಬಂದಿ, ಸಿ.ಎಸ್​.ಪುರ ಪೊಲೀಸರ ಸಹಕಾರದಲ್ಲಿ ಜಂಟಿ ಕಾರ್ಯಾಚರಣೆ ನಡೆಸಿ ಸುಮಾರು8 ವರ್ಷದ ಚಿರತೆಯನ್ನು ಬಲೆ ಬೀಸಿ ಹಿಡಿದಿದ್ದಾರೆ. ವಲಯ ಅರಣ್ಯಾಧಿಕಾರಿ ಸತೀಶ್​ ಚಂದ್ರ ನೇತೃತ್ವದ ತಂಡ 24 ಗಂಟೆಯಲ್ಲಿ ಚಿರತೆ ಸೆರೆಹಿಡಿದ್ದು ಗ್ರಾಮಸ್ಥರ ಪ್ರಶಂಸೆಗೆ ಪಾತ್ರವಾಗಿದೆ.