ಯಾವ ಮಡಿವಂತಿಕೆ ಇಲ್ಲದೆ ಪ್ರಾಚೀನ, ಆಧುನಿಕ ಹಾಗೂ ನವ್ಯ ಸೇರಿ ಎಲ್ಲ ತರಹದ ಕಾವ್ಯಗಳನ್ನು ಅಭ್ಯಾಸ ಮಾಡಿದೆ. ವಿಶೇಷವಾಗಿ ಸಂಸ್ಕೃತ ಮತ್ತು ಪ್ರಾಕೃತ ಭಾಷೆಯನ್ನು ಅಧ್ಯಯನ ಮಾಡುವ ಅವಕಾಶ ನನಗೆ ಒದಗಿ ಬಂದಿತ್ತು. ಕಾಲೇಜಿನಲ್ಲಿ ಸಂಸ್ಕೃತವನ್ನು ಕಲಿತೆ. ವೈಯಕ್ತಿಕವಾಗಿ ಪ್ರಾಕೃತ ಕಾವ್ಯವನ್ನು ಅಭ್ಯಾಸ ಮಾಡಿದೆ. ಈ ಸಂದರ್ಭದಲ್ಲಿ ಸಾಮಾನ್ಯ ಜನರಿಗೂ ರಾಮಾಯಣ ಕಥೆ ತಲುಪಿರುವುದು ತಿಳಿಯಿತು. ಸಂಸ್ಕೃತದಲ್ಲಿ ಬಿಡಿ ಕಥೆಗಳನ್ನು ಇಟ್ಟುಕೊಂಡು ಕೆಲವರು ದೊಡ್ಡ ಕಾವ್ಯಗಳನ್ನು ರಚಿಸಿದ್ದಾರೆ. ಅಂತಹ ಕಥೆಗಳಲ್ಲಿ ಚಾರುವಸಂತ ಕಥೆಯೂ ಒಂದು. ಅನನ್ಯತೆ, ಮೋಹಕತೆ, ಕಥಾನಾಯಕನ ಬದುಕಿನ ಏಳು-ಬೀಳುಗಳು, ದೊಡ್ಡ ಕುಟುಂಬ, ಒಬ್ಬ ವರ್ತಕ, ಸ್ತ್ರೀಯರ ದುಃಖ-ದುಮ್ಮಾನ, ಅವಿಭಕ್ತ ಕುಟುಂಬಗಳು ಹಾಗೂ ತ್ಯಾಗ ಸೇರಿ ಎಲ್ಲವನ್ನೂ ಒಳಗೊಂಡ ಅಂಶಗಳು ‘ಚಾರುವಸಂತ’ ಕಥೆಯಲ್ಲಿದೆ ಹಂಪನಾ ಹೇಳಿದರು.
