ಅಂಗಡಿ ಎದುರಿನ ಅನಧಿಕೃತ ಶೀಟ್​ಗಳ ತೆರವು

ಚನ್ನಪಟ್ಟಣ
ನಗರದ ಪ್ರಮುಖ ರಸ್ತೆಗಳಲ್ಲಿ ಒಂದಾದ ಸಾತನೂರು ರಸ್ತೆಯಲ್ಲಿನ ಅಂಗಡಿ ಮಳಿಗೆಗಳ ಎದುರು ಅನಧಿಕೃತವಾಗಿ ಅಳವಡಿಸಿದ್ದ ಶೀಟ್​ಗಳು ಮತ್ತು ಒತ್ತುವರಿಯನ್ನು ನಗರಸಭೆ ಅಧಿಕಾರಿಗಳು ಗುರುವಾರ ತೆರವು ಗೊಳಿಸಿದರು.

ಬೆಳಗ್ಗೆಯೇ ಪೊಲೀಸರ ಸಹಕಾರದೊಂದಿಗೆ ಜೆಸಿಬಿ ಯಂತ್ರಗಳ ಮೂಲಕ ಸಾತನೂರು ವೃತ್ತದ ಬಳಿಯಿಂದ ಕಾರ್ಯಾಚರಣೆ ಆರಂಭಸಿದ ಅಧಿಕಾರಿಗಳು, ಕಾವೇರಿ ಜಲಮಂಡಳಿವರೆಗೆ ರಸ್ತೆಯ ಎರಡು ಬದಿಯ ಅಂಗಡಿಗಳ ಮುಂದೆ ಅನಧಿಕೃತವಾಗಿ ಅಳವಡಿಸಿದ್ದ ಶೀಟ್​ಗಳನ್ನು ತೆರವುಗೊಳಿಸಿದರು.

ಸಾತನೂರು-ಹಲಗೂರು ಮತ್ತಿತರ ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸುವ ಪ್ರಮುಖ ರಸ್ತೆ ಇದಾಗಿದ್ದು, ಪ್ರತಿನಿತ್ಯ ಸಾವಿರಾರು ವಾಹನಗಳು ಓಡಾಡುತ್ತವೆ. ಈ ರಸ್ತೆಯ ಎರಡು ಬದಿಯಲ್ಲಿ ಹಲವಾರು ವರ್ಷಗಳಿಂದ ಅಂಗಡಿ ಮಳಿಗೆಗಳ ಮಾಲೀಕರು, ತಮ್ಮ ಅಂಗಡಿ ವ್ಯಾಪ್ತಿ ಮೀರಿ ರಸ್ತೆಗೆ ಚಾಚಿದಂತೆ ಶೀಟ್​ಗಳನ್ನು ಅಳವಡಿಸಿದ್ದರು.

ಇದರಿಂದಾಗಿ ರಸ್ತೆ ಕಿರಿದಾಗಿದ್ದು, ವಾಹನ ಸವಾರರು ಸಾಕಷ್ಟು ಕಿರಿಕಿರಿ ಅನುಭವಿಸುತ್ತಿದ್ದರು. ಇಂದು ಕಾರ್ಯಾಚರಣೆ ನಡೆಸಿ ತೆರವುಗೊಳಿಸಲಾಯಿತು.

ಈ ವಿಚಾರ ಸಂಬಂಧ ನಗರಸಭೆಯಿಂದ ಅಂಗಡಿಗಳ ಮಾಲೀಕರಿಗೆ ಮನವಿ ಮಾಡಿದರೂ ಪ್ರಯೋಜನವಾಗಿರಲಿಲ್ಲ. ಅಂಗಡಿಗಳ ಮಾಲೀಕು ನಿರ್ಲಕ್ಷ್ಯ ತೋರಿದ್ದರಿಂದ ಎರಡು ದಿನಗಳ ಹಿಂದೆ ನೋಟಿಸ್​ ಸಹ ನೀಡಲಾಗಿತ್ತು. ಆದರೂ ಅಂಗಡಿ ಮಾಲೀಕರು ತಲೆಕೆಡಿಸಿಕೊಂಡಿರಲಿಲ್ಲ. ಅಂತಿಮವಾಗಿ ಪೊಲೀಸರ ಸಹಕಾರದೊಂದಿಗೆ ಗುರುವಾರ ಕಾರ್ಯಾಚರಣೆ ನಡೆಸಿದ ನಗರಸಭೆ ಅಧಿಕಾರಿಗಳು, ಅನಧಿಕೃತ ಶೀಟ್​ಗಳನ್ನು ತೆರವುಗೊಳಿಸಿದರು.

ನಗರಸಭೆ ತೆರವು ಕಾರ್ಯಾಚರಣೆ ಕೈಗೊಳ್ಳುತ್ತಿದ್ದಂತೆ ರಸ್ತೆಯಲ್ಲಿದ್ದ ಕೆಲವು ಅಂಗಡಿಗಳ ಮಾಲೀಕರು ಸ್ವಯಂಪ್ರೇರಿತರಾಗಿ ಶೀಟ್​ಗಳನ್ನು ತೆರವುಗೊಳಿಸಲು ಮುಂದಾದ ದೃಶ್ಯ ಕಂಡುಬಂತು. ಈ ವೇಳೆ ನಗರಸಭೆ ಅಧಿಕಾರಿಗಳು ಮತ್ತು ಪೊಲೀಸರು ಇದ್ದರು.