ಯಳಂದೂರಲ್ಲಿ ತ್ಯಾಜ್ಯದಿಂದ ಅನೈರ್ಮಲ್ಯ ಸೃಷ್ಟಿ

ದಿವಾನ್ ಪೂರ್ಣಯ್ಯ ವಸ್ತು ಸಂಗ್ರಹಾಲಯದ ಮುಂಭಾಗದಲ್ಲಿರುವ ಖಾಲಿ ಜಾಗದಲ್ಲಿ ಪಾನಿಪೂರಿ, ಮೀನು, ಚಿಕನ್ ಕಬಾಬ್ ಸೆಂಟರ್, ಎಗ್‌ರೈಸ್, ಬೋಂಡ ಬಜ್ಜಿ, ಮಾರಾಟ ಮಾಡುವ ಹತ್ತಾರು ತಳ್ಳುಗಾಡಿಗಳು ಸಂಜೆಯಾದರೆ ಇಲ್ಲಿ ಬಂದು ನಿಲ್ಲುತ್ತವೆ. ಹೀಗಾಗಿ ಈ ಜಾಗ ರಾತ್ರಿ ವೇಳೆ ಚಾಟ್ ಸ್ಪಾಟ್ ಆಗಿ ಮಾರ್ಪಡುತ್ತದೆ. ಇದರ ಪಕ್ಕದಲ್ಲೇ ಐತಿಹಾಸಿಕ ಬಳೇಮಂಟಪ ಹಾಗೂ ಗೌರೇಶ್ವರ ದೇಗುಲವಿದ್ದು, ಇದರ ಸುತ್ತುಗೋಡೆ ಸುತ್ತಲೂ ಪೇಪರ್, ತಿಂಡಿ-ತಿನಿಸುಗಳ ತ್ಯಾಜ್ಯ, ಕೈ ತೊಳೆಯುವ ನೀರು ಸಂಗ್ರಹವಾಗುತ್ತದೆ. ಇದರ ಪರಿಣಾಮ ಈ ಜಾಗದಲ್ಲಿ ನಿತ್ಯ ಕಸ ಸಂಗ್ರಹವಾಗುತ್ತದೆ.

ಮಕ್ಕಳು ಹಾಗೂ ಸಾರ್ವಜನಿಕರ ಹಿತದೃಷ್ಟಿಯಿಂದ ಇಲ್ಲಿ ನಿಲ್ಲುವ ತಿಂಡಿ-ತಿನಿಸು ಮಾರುವ ಅಂಗಡಿಗಳನ್ನು ಬೇರೆಡೆ ಸ್ಥಳಾಂತರ ಮಾಡಬೇಕು. ಈ ಜಾಗವು ಪ್ರಾಚೀನ ಸ್ಮಾರಕಗಳ ತಾಣವಾಗಿದ್ದು, ಇಲ್ಲಿ ಸ್ವಚ್ಛತೆ ಕಾಪಾಡಬೇಕು ಎಂಬ ಕೂಗಿಗೆ ಯಾರೂ ತಲೆಕೆಡಿಸಿಕೊಂಡಿಲ್ಲ ಎಂಬುದು ಸ್ಥಳೀಯರ ಆರೋಪ.

ಇನ್ನು ಈ ಜಾಗದಲ್ಲಿ ನಿತ್ಯ ಸಂಗ್ರಹವಾಗುವ ಕಸವನ್ನು ವಿಲೇವಾರಿ ಮಾಡುತ್ತಿಲ್ಲ. ಜನರು ತಿಂದು ಬಿಸಾಡಿದ ಆಹಾರ ಪದಾರ್ಥಗಳ ತ್ಯಾಜ್ಯವೇ ಹೆಚ್ಚಾಗಿರುವ ಕಾರಣ ಇದು ಇಲ್ಲೇ ಕೊಳೆತು ದುರ್ವಾಸನೆ ಬೀರುತ್ತಿದೆ. ಅಲ್ಲದೆ ಇಲ್ಲಿರುವ ಕಾಂಪೌಂಡ್‌ನ ಅಕ್ಕಪಕ್ಕದಲ್ಲಿ ಗಿಡಗಂಟಿ ಬೆಳೆದಿದ್ದು ಇದನ್ನೂ ಕೂಡ ತೆರವುಗೊಳಿಸಿಲ್ಲ. ಪರಿಣಾಮ ಕೆಟ್ಟ ವಾಸನೆ ಬೀರುತ್ತಿದೆ. ಅಲ್ಲದೆ, ಈ ಜಾಗದಲ್ಲಿ ಮೀನು, ಚಿಕನ್‌ನ ತುಂಡುಗಳು ಬೀಳುವುದರಿಂದ ಬೀದಿ ನಾಯಿಗಳ ಸಂಖ್ಯೆಯೂ ಹೆಚ್ಚಾಗಿದೆ. ಶಾಲೆಗೆ ಬರುವ ವಿದ್ಯಾರ್ಥಿನಿಯರು ಸೇರಿದಂತೆ ಮಕ್ಕಳು, ವಯೋವೃದ್ಧರು ನಾಯಿ ದಾಳಿ ನಡೆಸಬಹುದೆಂಬ ಭಯದೊಂದಿಗೆ ಹೋಗುವ ಪರಿಸ್ಥಿತಿ ಇದೆ. ಹಲವು ಬಾರಿ ಬೀದಿ ನಾಯಿಗಳು ಹಲವರ ಮೇಲೆ ಇಲ್ಲಿ ದಾಳಿ ಮಾಡಿದ ಉದಾಹರಣೆಯೂ ಇದೆ.

ಅವಘಡ ಸಂಭವಿಸುವ ಮುನ್ನ ಸಂಬಂಧಪಟ್ಟವರು ಇನ್ನಾದರೂ ಎಚ್ಚೆತ್ತು ಅಗತ್ಯ ಕ್ರಮ ವಹಿಸುವ ಮೂಲಕ ಸಾರ್ವಜನಿಕರಿಗೆ ಅನುಕೂಲ ಕಲ್ಪಿಸಬೇಕು ಎಂಬುದು ಸ್ಥಳೀಯರ ಆಗ್ರಹ.