ಪಟ್ಟು ಬಿಡದೆ ಗ್ರಾಮಸ್ಥರ ಹೋರಾಟಕ್ಕೆ ಜಯ

ತಾಲೂಕಿನ ಪಣ್ಯದಹುಂಡಿ ಗ್ರಾಮದ ಬಸ್ ನಿಲ್ದಾಣದಲ್ಲಿ ಜಿಲ್ಲಾ ರೈತ ಸಂಘದ ನೇತೃತ್ವದಲ್ಲಿ ಜಮಾಯಿಸಿದ ಗ್ರಾಮಸ್ಥರನ್ನು ಅಕ್ಕ-ಪಕ್ಕದ ಊರಿನ ಜನರೂ ಸೇರಿಕೊಂಡು ದೊಡ್ಡ ಗುಂಪು ರಚನೆಯಾಯಿತು. ಕೆಲವರು ಅಂಗಡಿಗಳನ್ನು ಬಂದ್ ಮಾಡಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡರು. ಮಹಿಳೆಯರು, ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿ ಗಮನ ಸೆಳೆದರು.

ಅವೈಜ್ಞಾನಿಕ ಮೇಲ್ಸೇತುವೆ ಕಾಮಗಾರಿಯನ್ನು ಸ್ಥಗಿತ ಮಾಡಬೇಕು. ಪಣ್ಯದಹುಂಡಿಯಲ್ಲಿ ಅಂಡರ್‌ಪಾಸ್ ಮತ್ತು ಬಸ್ ನಿಲ್ದಾಣ ನಿರ್ಮಾಣ ಮಾಡಬೇಕು, ಭೂಮಿಗೆ ಸೂಕ್ತ ಬೆಲೆ ಕೊಡಬೇಕೆಂಬ ಒತ್ತಾಯ ಪ್ರತಿಧ್ವನಿಸಿತು. ಭಾರಿ ವಿರೋಧದ ನಡುವೆಯೂ ಸೋಮವಾರ ಪೊಲೀಸರ ಸರ್ಪಗಾವಲಿನಲ್ಲಿ ಶುರುವಾಗಿದ್ದ ಕಾಮಗಾರಿ ಬುಧವಾರ ಬೆಳಗ್ಗೆ ನಡೆಯುತ್ತಿರಲಿಲ್ಲ. ಭೂಮಿ ಅಗೆಯಲು ಬಂದಿದ್ದ ಜೆಸಿಬಿಯ ಸದ್ದು ಅಡಗಿ ಹೋಗಿತ್ತು. ಗ್ರಾಮಸ್ಥರ ಒಗ್ಗಟ್ಟಿನ ಬಲ, ನ್ಯಾಯಯುತವಾದ ಒತ್ತಾಯಕ್ಕೆ ಪೊಲೀಸರು ಕೂಡ ಕರಗಿಹೋಗಿದ್ದರು.ಪ್ರತಿಭಟನಾಕಾರರೊಂದಿಗೆ ಸಂಯಮ ಮತ್ತು ವಿಶ್ವಾಸದ ಮಾತುಗಳನ್ನಾಡುತ್ತಲೇ ಮನವಿ ಮಾಡಿಕೊಂಡರು. ಕಾಮಗಾರಿಯನ್ನು ನಿಲ್ಲಿಸಿರುವುದರಿಂದ ಪ್ರತಿಭಟನೆ ಕೈಬಿಡಿ ಎಂದು ಗ್ರಾಮಾಂತರ ಪೊಲೀಸ್ ಠಾಣೆಯ ಇನ್ಸ್‌ಪೆಕ್ಟರ್ ಶೇಷಾದ್ರಿ ಕೇಳಿಕೊಂಡರು.

ಗ್ರಾಮಸ್ಥರು ಮೊದಲಿನಿಂದಲೂ ಹೇಳಿಕೊಂಡು ಬರುತ್ತಿರುವಂತೆ ಲಿಖಿತ ಪತ್ರದಲ್ಲಿ ನಮ್ಮ ಭರವಸೆಗೆ ಗ್ಯಾರಂಟಿ ಕೊಡಿ ಪ್ರತಿಭಟನೆಯನ್ನು ಹಿಂಪಡೆಯುತ್ತೇವೆ ಎಂದು ಹೇಳಿ ಧರಣಿ ಮುಂದುವರೆಸಿದರು. ನಂತರ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳು ಅಂಡರ್‌ಪಾಸ್, ಬಸ್ ನಿಲ್ದಾಣ ನಿರ್ಮಾಣ ಮಾಡಿಕೊಡುವುದಾಗಿ ಪತ್ರ ನೀಡಲಿದ್ದಾರೆ ಎಂದು ತಿಳಿದುಬಂತು. ಈ ಕಾರಣಕ್ಕೆ ಪ್ರತಿಭಟನಾನಿರತರು ಪತ್ರ ಕೈಸೇರುವರೆಗೂ ಧರಣಿ ಮುಂದುವರೆಸಲು ನಿರ್ಧರಿಸಿದರು.

ಈ ಸಂದರ್ಭದಲ್ಲಿ ಎನ್‌ಎಚ್ ಇಇ ಅನಿಲ್ ಅವರು ಕಳುಹಿಸುವ ಪತ್ರವನ್ನು ಎಇಇ ರೇಣುಕಾ ಕಾಯುತ್ತಿದ್ದರು. ಪತ್ರ ಕೈಗೆ ಸಿಗುತ್ತಿದ್ದಂತಯೇ ಸ್ಥಳಕ್ಕೆ ಆಗಮಿಸಿ ಎಇಇ ರೇಣುಕಾ ಗ್ರಾಮಸ್ಥರೊಂದಿಗೆ ಮಾತನಾಡಿದರು. ಪತ್ರದಲ್ಲಿ ಬರೆದಿರುವಂತೆ ಅಂಡರ್‌ಪಾಸ್, ಬಸ್ ನಿಲ್ದಾಣ ನಿರ್ಮಾಣ ಮಾಡಿಕೊಡುವುದಾಗಿ ತಿಳಿಸಿದರು. ಈ ಹಿನ್ನೆಲೆಯಲ್ಲಿ ಗ್ರಾಮಸ್ಥರು ಪ್ರತಿಭಟನೆಯನ್ನು ಕೈಬಿಟ್ಟರು. ರೈತ ಸಂಘದ ನಾಯಕರಾದ ಹೊನ್ನೂರು ಬಸವಣ್ಣ, ವಿಜಯ್‌ಕುಮಾರ್ ಹೆಗ್ಗೋಠಾರ, ಮೇಲಾಜಿಪುರ ಕುಮಾರ್ ಮತ್ತು ಪಣ್ಯದಹುಂಡಿ, ಸುತ್ತಮುತ್ತಲ ಗ್ರಾಮಸ್ಥರು ಇದ್ದರು.

ಗ್ರಾಮಸ್ಥರು ಪ್ರತಿಭಟನೆ ಕೈಬಿಟ್ಟ ಹಿನ್ನೆಲೆಯಲ್ಲಿ ರೈಲ್ವೆ ಮೇಲ್ಸೇತುವೆ ನಿರ್ಮಾಣದ ಕಾಮಗಾರಿ ಶುರುವಾಗಲಿದೆ. ಅಂತೆಯೇ ಅಂಡರ್‌ಪಾಸ್ ನಿರ್ಮಾಣಕ್ಕೆ ಭೂಮಿಪೂಜೆ ಮಾಡಲು ಗಡುವು ಕೊಟ್ಟಿದ್ದಾರೆ. ಅಂದರಂತೆಯೇ ಕಾರ್ಯನಿರ್ವಹಿಸುವುದಾಗಿ ಅಧಿಕಾರಿಗಳು ಒಪ್ಪಿಕೊಂಡಿದ್ದಾರೆ.

ರೈಲ್ವೆ ಮೇಲ್ಸೇತುವೆ ನಿರ್ಮಾಣ ಶುರು ಮಾಡದೆ ಹೋದರೆ ಕಾಮಗಾರಿ ಹಿಂದಕ್ಕೆ ಹೋಗಲಿದೆ ಎಂದು ಪತ್ರ ಬಂದಿತ್ತು. ಹಾಗಾಗಿ ಕಾಮಗಾರಿಯನ್ನು ಶುರು ಮಾಡಲಾಯಿತು. ಅಂಡರ್‌ಪಾಸ್ ನಿರ್ಮಾಣ ಮಾಡಬೇಕೆಂದು ಒತ್ತಾಯಿಸುತ್ತಿರುವ ಹಿನ್ನೆಲೆಯಲ್ಲಿ ಕೇಂದ್ರ ರೈಲ್ವೆ ಸಚಿವ ವಿ.ಸೋಮಣ್ಣ ಅವರೊಂದಿಗೆ ಮಾತನಾಡಿದ್ದೇನೆ. ಇದಕ್ಕೆ ಅವರು ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ. ನಾನು ಮತ್ತು ಜಿಲ್ಲಾಧಿಕಾರಿ ಇಬ್ಬರೂ ಪತ್ರ ಬರೆದಿದ್ದೇವೆ. ಗ್ರಾಮಸ್ಥರಿಗೆ ಅನುಕೂಲ ಆಗುವ ರೀತಿಯಲ್ಲಿ ಮಾಡಿಕೊಡುತ್ತೇವೆ.