ನನಸಾಗದ ಲಿಂಗತ್ವ ಅಲ್ಪಸಂಖ್ಯಾತರ ಉದ್ಯೋಗದ ಕನಸು

ಈ ಹಿಂದೆ ಜಿಲ್ಲಾಡಳಿತದಿಂದ ಚಾಮರಾಜನಗರ, ಗುಂಡ್ಲುಪೇಟೆ, ಹನೂರು, ಯಳಂದೂರು, ಕೊಳ್ಳೇಗಾಲ ತಾಲೂಕು ಕಚೇರಿಗಳು ಮತ್ತು ಜಿಲ್ಲಾಡಳಿತ ಭವನದಲ್ಲಿ ಹೊರಗುತ್ತಿಗೆ ಆಧಾರದ 6 ಡಿ ಗ್ರೂಪ್ ನೌಕರಿಗಳನ್ನು ಲಿಂಗತ್ವ ಅಲ್ಪಸಂಖ್ಯಾತರಿಗೆ ನೀಡಲು ನಿರ್ಧರಿಸಲಾಗಿತ್ತು. ಅಂದು ಜಿಲ್ಲಾಧಿಕಾರಿಯಾಗಿದ್ದ ಶಿಲ್ಪಾನಾಗ್ ಅವರು ಈ ಸಂಬಂಧ ಸಭೆ ನಡೆಸಿ ಕಾರ್ಯಾನುಷ್ಠಾನಕ್ಕೆ ಮುಂದಾಗಿದ್ದರು. 6 ಡಿ ಗ್ರೂಪ್ ಹುದ್ದೆಗಳಿಗೆ 20ಕ್ಕೂ ಹೆಚ್ಚು ಲಿಂಗತ್ವ ಅಲ್ಪಸಂಖ್ಯಾತರು ಅರ್ಜಿ ಸಲ್ಲಿಸಿದ್ದರು. ಇವರಲ್ಲಿ 6 ಲಿಂಗತ್ವ ಅಲ್ಪಸಂಖ್ಯಾತರನ್ನು ಆಯ್ಕೆ ಮಾಡುವ ಸಂದರ್ಭದಲ್ಲಿ ಲಿಂಗತ್ವ ಅಲ್ಪಸಂಖ್ಯಾತರ ಸಮುದಾಯದಲ್ಲೇ ಕೆಲವು ಭಿನ್ನಾಭಿಪ್ರಾಯ ಉಂಟಾಗಿತ್ತು. ತನದ ನಂತರ ಉದ್ಯೋಗ ನೀಡುವ ವಿಚಾರ ತೆರೆಮರೆಗೆ ಸರಿಯಿತು.

ಆಗಲೇ ಈ ಪ್ರಕ್ರಿಯೆ ಯಶಸ್ಸು ಕಂಡಿದ್ದರೆ ಜಿಲ್ಲೆಯ ಎಲ್ಲ ಆಡಳಿತ ಕಚೇರಿಗಳಲ್ಲಿ ಒಬ್ಬೊಬ್ಬರು ತೃತೀಯ ಲಿಂಗಿಗಳು ಹೊರಗುತ್ತಿಗೆ ಆಧಾರದಲ್ಲಿ ಉದ್ಯೋಗದಲ್ಲಿ ಇರುತ್ತಿದ್ದರು. ವಿಧಾನ ಪರಿಷತ್ತಿನ ಸಚಿವಾಲಯದಲ್ಲಿ ಮೋನಿಷಾ, ಹೈಕೋರ್ಟ್‌ನಲ್ಲಿ ಅನು ಎಂಬ ಲಿಂಗತ್ವ ಅಲ್ಪಸಂಖ್ಯಾತರು ಡಿ ಗ್ರೂಪ್ ನೌಕರರಾಗಿ ಕೆಲಸ ಮಾಡುತ್ತಿರುವ ಮಾದರಿಯಲ್ಲಿ ಚಾಮರಾಜನಗರ ಜಿಲ್ಲಾಡಳಿತವೂ ಪ್ರೇರಣಾದಾಯಕ ಕಾರ್ಯಕ್ಕೆ ಉದಾಹರಣೆಯಾಗುತ್ತಿತ್ತು.

ಆದರೆ ಈಗ ತೃತೀಯ ಲಿಂಗಿಗಳಿಗೆ ಹೊರಗುತ್ತಿಗೆ ಆಧಾರದಲ್ಲಿ ಡಿ ಗ್ರೂಪ್ ಉದ್ಯೋಗ ನೀಡುವ ವಿಚಾರ ಚರ್ಚೆಯಲ್ಲಿಲ್ಲ. ಹೊಸದಾಗಿ ಬಂದಿರುವ ಜಿಲ್ಲಾಧಿಕಾರಿ ಶ್ರೀರೂಪಾ ಜಿಲ್ಲೆಯ ಅಗತ್ಯಗಳಿಗೆ ತಕ್ಕಂತೆ ವಿನೂತನ ಕಾರ್ಯಕ್ರಮಗಳನ್ನು ರೂಪಿಸಿ ಅನುಷ್ಠಾನಗೊಳಿಸುತ್ತಿದ್ದಾರೆ. ಜಿಲ್ಲೆಯಲ್ಲಿರುವ ನೀರಿನ ಅಭಾವವನ್ನು ಅರಿತು ತಂತ್ರಜ್ಞಾನ ಆಧಾರಿತ ಪರಿಹಾರವನ್ನು ಕಂಡುಕೊಳ್ಳಲು ಗಾಳಿಯಿಂದ ನೀರು ತಯಾರಿಸುವ ಯಂತ್ರವನ್ನು ಸೋಮವಾರಪೇಟೆ ಶಾಲೆಯಲ್ಲಿ ಹಾಕಿಸಿ ಪ್ರಾಯೋಗಿಕ ಪ್ರಯತ್ನದಲ್ಲಿ ಕಾಡಂಚಿನ ಗ್ರಾಮಗಳ ನೀರಿನ ಬವಣೆಗೆ ಪರಿಹಾರದ ಭರವಸೆ ಮೂಡಿಸಿದ್ದಾರೆ. ಚಾಮರಸಿ ಎಂಬ ಹೆಸರಿನ ಕಾರ್ಯಕ್ರಮದ ಮೂಲಕ ಸ್ಥಳೀಯ ಉತ್ಪನ್ನಗಳಿಗೆ ಮಾರುಕಟ್ಟೆ ಒದಗಿಸಿಕೊಡಲು ಮುಂದಾಗಿದ್ದಾರೆ. ಈ ಸಂಬಂಧ ಮಹಿಳೆಯರಿಗೆ ತರಬೇತಿಗಳನ್ನೂ ಕೊಡಿಸುತ್ತಿದ್ದಾರೆ. ಸ್ಪರ್ಧಾತ್ಮಕ ಪರೀಕ್ಷೆಗೆ ವಿದ್ಯಾರ್ಥಿಗಳನ್ನು ತಯಾರು ಮಾಡುವ ನಿಟ್ಟಿನಲ್ಲಿ ಅಭ್ಯುದಯ ಕಾರ್ಯಕ್ರಮಕ್ಕೆ ಚಾಲನೆ ಕೊಟ್ಟಿದ್ದಾರೆ. ಜಿಲ್ಲೆಯ ಅವಶ್ಯಕತೆಗಳನ್ನು ಮನಗಂಡು ರೂಪುಗೊಳ್ಳುತ್ತಿರುವ ಇಂತಹ ಕಾರ್ಯಕ್ರಮಗಳ ನಡುವೆ ತೃತೀಯ ಲಿಂಗಿಗಳಿಗೆ ಅನುಕೂಲವಾಗುವ ಚಿಂತನೆಗಳೂ ನಡೆಯಬೇಕಾಗಿದೆ.

ಸಮಾಜದ ಕಟ್ಟಕಡೆಯ ಸಮುದಾಯವಾಗಿ ತೃತೀಯ ಲಿಂಗಿಗಳು ಬದುಕುತ್ತಿದ್ದಾರೆ. ತಿರಸ್ಕಾರ, ಅವಮಾನಗಳ ಕೂಪದಿಂದ ಮೇಲೇಳಲು ಇನ್ನಿಲ್ಲದ ಪ್ರಯತ್ನ ನಡೆಸುತ್ತಿದ್ದಾರೆ. ಇವರ ಪಾಲಿಗೆ ಉದ್ಯೋಗ ಕೇವಲ ಸಂಬಳ ಕೊಡುವ ಕೆಲಸ ಮಾತ್ರವಲ್ಲ. ಗೌರವದ ಬದುಕು ಕಟ್ಟಿಕೊಡುವಂತ ಧೀಶಕ್ತಿ. ಏಕೆಂದರೆ ತೃತೀಯ ಲಿಂಗಿಗಳಿಗೆ ಎಲ್ಲರಂತೆ ಉದ್ಯೋಗ ದೊರೆಯುವುದಿಲ್ಲ. ನಗರ ಪ್ರದೇಶಗಳಲ್ಲಿ ಭಿಕ್ಷಾಟನೆ, ಲೈಂಗಿಕ ವೃತ್ತಿ ಮಾಡಿಕೊಂಡು ಜೀವನ ಮಾಡುವವರಂತೆ ಎಲ್ಲರೂ ಎಂದು ಸಮಾಜ ಭಾವಿಸುತ್ತಿದೆ. ಆದರೆ ಜಿಲ್ಲೆಯಲ್ಲಿ ಅನೇಕರು ಇದಕ್ಕೆ ತದ್ವಿರುದ್ಧವಾಗಿದ್ದಾರೆ. ಜಿಲ್ಲೆಯಲ್ಲಿ 2 ಸಾವಿರಕ್ಕೂ ಹೆಚ್ಚು ತೃತೀಯ ಲಿಂಗಿಗಳು ಇದ್ದಾರೆ. ಕೆಲವರು ಊರು ಬಿಟ್ಟು ಬೇರೆ ಕಡೆಗಳಿಗೆ ವಲಸೆ ಹೋಗಿದ್ದಾರೆ. ಇಲ್ಲೇ ಉಳಿದಿರುವವರು ಕೃಷಿ, ಹೈನುಗಾರಿಕೆ ಮಾಡಿಕೊಂಡು ಬದುಕಿನ ಬಂಡಿ ಎಳೆಯುತ್ತಿದ್ದಾರೆ. ಬೇರೆ ಕಡೆ ಉದ್ಯೋಗಕ್ಕೆ ಸೇರಿಕೊಳ್ಳಲು ತಿರಸ್ಕಾರದ ಭಯ, ಹಿಂಜರಿಕೆ ಸ್ವಭಾವ ಮುಂದಕ್ಕೆ ಹೆಜ್ಜೆ ಇಡದಂತೆ ಮಾಡಿಬಿಟ್ಟಿದೆ. ಇಂತಹ ಸಂದರ್ಭದಲ್ಲಿ ತೃತೀಯ ಲಿಂಗಿಗಳಿಗೆ ಜಿಲ್ಲಾಡಳಿತದಿಂದ ಹೊರಗುತ್ತಿಗೆ ಆಧಾರದಲ್ಲಿ ಡಿ ಗ್ರೂಪ್ ನೌಕರಿ ನೀಡಿದ್ದರೆ ಸಮಾಜದ ಮುಂದೆ ಅವರಿಗೂ ಗೌರವಯುತ ಜೀವನ ನಡೆಸುತ್ತಿರುವವರ ಉದಾಹರಣೆಗಳು ಸಿಗುತ್ತಿದ್ದರು. ಸ್ವಯಂ ಉದ್ಯೋಗ ಮಾಡಲು ಸರ್ಕಾರದ ಹಲವಾರು ಯೋಜನೆಗಳಿದ್ದರೂ ತೃತೀಯ ಲಿಂಗಗಳ ಮೇಲೆ ಜಿಲ್ಲಾಡಳಿತ ಹೊಂದಿರುವ ಕಾಳಜಿಯ ಲ ಪ್ರತಿಲಿಸುತ್ತದೆ.

ಕೋವಿಡ್ ಸಂದರ್ಭದಲ್ಲಿ ಜಿಲ್ಲಾಸ್ಪತ್ರೆಯಲ್ಲಿ ಉಸಿರಾಟದ ತೊಂದರೆಯಲ್ಲಿ ಸಿಲುಕಿದ್ದ ಸೋಂಕಿತರಿಗೆ ಆಕ್ಸಿಜನ್ ಸಿಗದೆ ಮೃತಪಟ್ಟರು. ರಾಜ್ಯದಲ್ಲಿ ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದರೆ ಆಕ್ಸಿಜನ್ ದುರಂತದ ಸಂತ್ರಸ್ತರಿಗೆ ಉದ್ಯೋಗ ನೀಡುವುದಾಗಿ ಭರವಸೆ ನೀಡಲಾಗಿತ್ತು. ಕೊಟ್ಟ ಆಶ್ವಾಸನೆಯಂತೆ ಇತ್ತೀಚೆಗೆ 25 ಸಂತ್ರಸ್ತರಿಗೆ ಸರ್ಕಾರಿ ಉದ್ಯೋಗವನ್ನು ನೀಡಲಾಗಿದೆ. ಸಂತ್ರಸ್ತರ ಬದುಕಿನಲ್ಲೀಗ ಸಮಾಧಾನ ನೆಲೆಯೂರುತ್ತಿದೆ. ಈ ಸಮಾಧಾನ ಸಮಾಜದಲ್ಲಿ ಗೌರವಯುತ ಬದುಕಿಗಾಗಿ, ಅವಕಾಶಗಳಿಂದ ವಂಚಿತರಾಗುತ್ತಿರುವ ತೃತೀಯ ಲಿಂಗಳಿಗೂ ವಿಸ್ತರಣೆಯಾಗಲು ಜಿಲ್ಲಾಡಳಿತ ಭವನ ಮತ್ತು ಜಿಲ್ಲೆ ಎಲ್ಲ ತಾಲೂಕು ಕಚೇರಿಗಳಲ್ಲಿ 1 ಡಿ ಗ್ರೂಪ್ ಹುದ್ದೆಯ ನೌಕರಿಯನ್ನು ಕೊಡಬೇಕಾಗಿದೆ.

ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರ ಅರೆಕಾಲಿಕ ಕಾನೂನು ಸ್ವಯಂಸೇವಕರ ಹುದ್ದೆಗೆ ತೃತೀಯಲಿಂಗಿ ದೀಪಾ ಬುದ್ಧೆ ಅವರನ್ನು ಈ ಹಿಂದೆ ಆಯ್ಕೆ ಮಾಡಿ ಮಾದರಿಯಾಗಿತ್ತು. ದೀಪಾ ಬುದ್ಧೆ ತನ್ನ ಸಮುದಾಯಕ್ಕಾಗಿ ಹೋರಾಟ ನಡೆಸುತ್ತಿದ್ದು, ಮೈಸೂರು ವಿಶ್ವವಿದ್ಯಾಲಯದಲ್ಲಿ ಪಿಎಚ್.ಡಿ ಮಾಡುತ್ತಿದ್ದಾರೆ. ಸಮುದಾಯದ ಸಂಘಟನೆಯಾಗಿರುವ ಸಮತಾ ಸೊಸೈಟಿಯ ಅಧ್ಯಕ್ಷೆಯಾಗಿದ್ದಾರೆ.

"

ಜಿಲ್ಲಾಡಳಿತ ಭವನ ಮತ್ತು ತಾಲೂಕು ಕಚೇರಿಗಳಲ್ಲಿ ಹೊರಗುತ್ತಿಗೆ ಆಧಾರದ 6 ಡಿ ಗ್ರೂಪ್ ಹುದ್ದೆಗಳನ್ನು ನೀಡಲು ಈ ಹಿಂದೆ ಜಿಲ್ಲಾಡಳಿತ ಪ್ರಯತ್ನ ನಡೆಸಿತ್ತು. ಅದರಂತೆ ನೌಕರಿ ಕೊಟ್ಟಿದ್ದರೆ ತೃತೀಯಲಿಂಗಿಗಳ ಆರ್ಥಿಕವಾಗಿ ಅನುಕೂಲ ಮತ್ತು ಗೌರವಯುತ ಜೀವನ ನಡೆಸಲು ನೆರವಾಗುತ್ತದೆ. ರಾಜ್ಯದಲ್ಲಿ ಚಾಮರಾಜನಗರ ಜಿಲ್ಲಾಡಳಿತದ ಘನತೆಯ ಕಾರ್ಯ ಮಾದರಿಯಾಗಲಿದೆ.

— ದೊಡ್ಡಸ್ವಾಮಿ, ಯೋಜನಾ ವ್ಯವಸ್ಥಾಪಕ, ಸಮತಾ ಎಂಎಸ್‌ಎಂಪಿಐ, ಚಾಮರಾಜನಗರ

"

ಹೊರಗುತ್ತಿಗೆ ಆಧಾರದಲ್ಲಿ ತೃತೀಯ ಲಿಂಗಿಗಳಿಗೆ ಡಿ ಗ್ರೂಪ್ ನೌಕರಿ ನೀಡುವ ಕಾರ್ಯದ ಕುರಿತು ಈ ಹಿಂದೆ ಏನಾಗಿತ್ತು ಎಂಬುದನ್ನು ನಾನು ಪರಿಶೀಲನೆ ಮಾಡುತ್ತೇನೆ.

— ಶ್ರೀರೂಪಾ, ಜಿಲ್ಲಾಧಿಕಾರಿ, ಚಾಮರಾಜನಗರ