ಮಹಿಳೆಯರ ಆಶಾವಾದಿತನ ತಿಳಿಸುವ ತಿರುವುಗಳು

ನಗರದ ರೋಟರಿಭವನದಲ್ಲಿ ಶನಿವಾರ ಆಯೋಜಿಸಿದ್ದ ಜಿಲ್ಲಾ ಬರಹಗಾರರ ಹಾಗೂ ಕಲಾವಿದರ ಬಳಗದ 25ನೇ ವಾರ್ಷಿಕೋತ್ಸವ, ಸನ್ಮಾನ ಸಮಾರಂಭ ಹಾಗೂ ತಿರುವುಗಳು ಕೃತಿ ಬಿಡುಗಡೆ ಸಮಾರಂಭದಲ್ಲಿ ಭಾಗವಹಿಸಿ ಮಾತನಾಡಿದರು.

ಕೃತಿಯಲ್ಲಿರುವ ಕತೆಗಳು ಬದುಕಿನ ಮನೋಧರ್ಮವೇ, ಬರಹದ ಮನೋಧರ್ಮ ಎಂಬುದನ್ನು ಸಾರುತ್ತದೆ. ಅಲ್ಲಲ್ಲಿ ಪುರುಷ ಪಾತ್ರಗಳು ಕಂಡುಬಂದರೂ, ಹೆಚ್ಚಾಗಿ ಮೇಳೈಸಿರುವುದು ಮಹಿಳಾಪ್ರದಾನವೇ. ಓದುವ ಆಸಕ್ತಿ ಕ್ಷೀಣಿಸುತ್ತಿರುವ ಇಂದಿನ ಕಾಲಘಟ್ಟದಲ್ಲಿ ಬದುಕಿನುದ್ದಕ್ಕೂ ಎದುರಾಗುವ ಅನೇಕ ತಿರುವುಗಳನ್ನು ಅಕ್ಷರ ರೂಪದಲ್ಲಿ ಹೊರತಂದಿರುವ ಲೇಖಕರ ಚಿಂತನೆ ಅರ್ಥಪೂರ್ಣ ಎಂದರು.

ಕಸಾಪ ನಿಕಟಪೂರ್ವ ಅಧ್ಯಕ್ಷ ಬಿ.ಎಸ್.ವಿನಯ್ ಮಾತನಾಡಿ, ತಿರುವುಗಳು ಕೃತಿಯಲ್ಲಿ ತಳಮಟ್ಟದ ಜನರ ಬದುಕು, ಶ್ರೀಸಾಮಾನ್ಯನ ನೋವುನಲಿವುಗಳು, ಗ್ರಾಮೀಣಪರಿಸರದ ನಾನಾ ಮಜಲುಗಳು ಅನಾವರಣಗೊಂಡಿವೆ. ಲೇಖಕಿಯವರು ತಾವು ಹುಟ್ಟಿಬೆಳೆದ ಗ್ರಾಮೀಣಪರಿಸರ, ನೆರೆಯವರೊಂದಿಗಿನ ಒಡನಾಟ, ತಮ್ಮ ಕಷ್ಟಕಾರ್ಪಣ್ಯದ ದಿನಗಳು, ಅದನ್ನು ಎದುರಿಸಿದ ಬಗೆ, ಹೆಣ್ಣುಮಕ್ಕಳು ಎಂದಿಗೂ ನಿರಾಶವಾದಿಗಳಲ್ಲ, ಅವರು ಕೂಡಾ ಆಶಾವಾದಿಗಳು ಎಂಬ ದೊಡ್ಡಸಂದೇಶವನ್ನು ಕೃತಿಯಲ್ಲಿ ಸಾರಿದ್ದಾರೆ ಎಂದರು.

ಕಾಡಾಅಧ್ಯಕ್ಷ ಪಿ.ಮರಿಸ್ವಾಮಿ ಮಾತನಾಡಿ, ಯಾವುದೇ ಕ್ಷೇತ್ರದಲ್ಲಿ ಯಾರೇ ಕೆಲಸಮಾಡಲಿ, ಅವರನ್ನು ಬೆನ್ನುತಟ್ಟಿ ಪ್ರೋತ್ಸಾಹಿಸಬೇಕು. ಹಾಗಾದಾಗ ಅಂತಹವರು ಸಾಧನೆಯ ಶಿಖರವೇರುತ್ತಾರೆ ಎಂಬುದಕ್ಕೆ ಲೇಖಕಿ ಎನ್.ಎಸ್.ಗುರುಲಿಂಗಮ್ಮ ಸಾಕ್ಷಿಯಾಗಿದ್ದಾರೆ ಎಂದರು.

ಕಾರ್ಯಕ್ರಮದಲ್ಲಿ ಕರ್ನಾಟಕ ಮಾಧ್ಯಮ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ ಪತ್ರಕರ್ತ ಕೆ.ಎಸ್.ಬನಶಂಕರ ಆರಾಧ್ಯ, ಕೇಂದ್ರಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ ಸಾಹಿತಿ ಸ್ವಾಮಿಪೊನ್ನಾಚಿ, ಜಿಲ್ಲಾಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಆರ್.ಎನ್.ಸಿದ್ದಲಿಂಗಸ್ವಾಮಿ ಅವರನ್ನು ಸನ್ಮಾನಿಸಲಾಯಿತು.

ಜಿಲ್ಲಾ ಬರಹಗಾರರ ಹಾಗೂ ಕಲಾವಿದರ ಬಳಗದ ಅಧ್ಯಕ್ಷ ನಿರಂಜನ್‌ಕುಮಾರ್, ರೋಟರಿ ಅಧ್ಯಕ್ಷ ಚಂದ್ರಶೇಖರ್, ದಲಿತಮಹಾಸಭೆ ರಾಜ್ಯ ಉಪಾಧ್ಯಕ್ಷ ವೆಂಕಟರಮಣಸ್ವಾಮಿ, ಹಿರಿಯ ರಂಗಕರ್ಮಿ ಕೆ.ವೆಂಕಟರಾಜು, ವೀರಶೈವಲಿಂಗಾಯತ ನೌಕರರ ಕ್ಷೇಮಾಭಿವೃದ್ಧಿ ಸಂಘದ ಅಧ್ಯಕ್ಷ ಸಿದ್ದಮಲ್ಲಪ್ಪ, ಜಿಲ್ಲಾ ಬರಹಗಾರರ ಹಾಗೂ ಕಲಾವಿದರ ಬಳಗದ ಗೌರವ ಮಹಾಪೋಷಕ ಎ.ಎಂ.ನಾಗಮಲ್ಲಪ್ಪ, ಕಾರ್ಯದರ್ಶಿ ಮಾ.ಮಹೇಶ್ ಮಲೆಯೂರು ಹಾಗೂ ಇತರರು ಹಾಜರಿದ್ದರು.