ಅರಿಶಿಣ ಮಾರಾಟ ಕೇಂದ್ರ ಅಗತ್ಯ

ಚಾಮರಾಜನಗರ ಜಿಲ್ಲಾ ಕೇಂದ್ರದ ಎಪಿಎಂಸಿಯಲ್ಲಿ ಅರಿಶಿಣ ಮಾರಾಟ ಕೇಂದ್ರವಿದ್ದು, ಪ್ರತಿ ವರ್ಷವೂ ಹನೂರು, ಕೊಳ್ಳೇಗಾಲ ತಾಲೂಕಿನ ರೈತರು ಅರಿಶಿಣವನ್ನು ಮಾರಾಟ ಮಾಡಲು ಚಾಮರಾಜನಗರಕ್ಕೆ ಕೊಂಡೊಯ್ಯಲು ಸಾವಿರಾರು ರೂ. ಸಾರಿಗೆ ಶುಲ್ಕದ ಬರೆ ಬೀಳುತ್ತಿದೆ. ಸಾಲ ಮಾಡಿ ಅರಿಶಿಣ ಬೆಳೆದ ರೈತ ಸ್ಥಳೀಯವಾಗಿ ಮಾರುಕಟ್ಟೆ ವ್ಯವಸ್ಥೆ ದೊರೆಯದೆ ಪರದಾಡುವ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಇದರಿಂದ ದಲ್ಲಾಳಿಗಳಿಗೆ ಕಡಿಮೆ ಬೆಲೆಯಲ್ಲಿಯೇ ಮಾರಾಟ ಮಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಕಳೆದ ಬಾರಿಯೂ ಮಾರುಕಟ್ಟೆಯಲ್ಲಿ ಅರಿಶಿಣಕ್ಕೆ ಉತ್ತಮ ಬೆಲೆ ದೊರೆತಿತ್ತು. ಅಂತೆಯೇ ಈ ಬಾರಿಯೂ ಉತ್ತಮ ಬೆಲೆಯಿರುವ ಕಾರಣಕ್ಕೆ ಕೊಳ್ಳೇಗಾಲ ಹಾಗೂ ಹನೂರು ತಾಲೂಕು ಭಾಗದಲ್ಲಿ ಅರಿಶಿಣವನ್ನು ಪ್ರಮುಖ ಬೆಳೆದಿದ್ದಾರೆ. ಇದೀಗ ಅರಿಶಿಣ ಕಟಾವು ಪ್ರಕ್ರಿಯೆ ನಡೆಯುತ್ತಿದ್ದು, ಮಾರಾಟ ಮಾಡಲು ಕೊಳ್ಳೇಗಾಲ ಹಾಗೂ ಹನೂರು ತಾಲೂಕಿನ ಎಪಿಎಂಸಿಯಲ್ಲಿ ಮಾರುಕಟ್ಟೆ ವ್ಯವಸ್ಥೆ ಇಲ್ಲದಿರುವ ಕಾರಣ ಚಾಮರಾಜನಗರ ಜಿಲ್ಲಾ ಕೇಂದ್ರದಲ್ಲಿರುವ ಎಪಿಎಂಸಿ ಮಾರುಕಟ್ಟೆಗೆ ಅನಿವಾರ್ಯವಾಗಿ ತೆರಳಬೇಕಿದೆ.

ವಾರ್ಷಿಕ ಬೆಳೆಯಾದ ಅರಿಶಿಣದಲ್ಲಿ ರೈತರಿಗೆ ಬರುವ ಅಲ್ಪ-ಸ್ವಲ್ಪ ಲಾಭವನ್ನು ಮಾರುಕಟ್ಟೆಗೆ ಅರಿಶಿಣ ತಲುಪಿಸಲು ವ್ಯಯಿಸಬೇಕಾದ ಪರಿಸ್ಥಿತಿ ಎದುರಾಗಿದೆ. ಇದದಿಂದ ರೈತಾಪಿ ವರ್ಗ ಬೇಸತ್ತು ದಲ್ಲಾಳಿಗಳಿಗೆ ಮಾರಾಟ ಮಾಡುವ ಅನಿವಾರ್ಯತೆಯಲ್ಲಿ ಸಿಲುಕಿದ್ದಾರೆ. ಹಾಗಾಗಿ ರೈತರ ಹಿತದೃಷ್ಟಿಯಿಂದ ಕೊಳ್ಳೇಗಾಲ ಅಥವಾ ಹನೂರು ಭಾಗದಲ್ಲಿ ಅರಿಶಿಣ ಮಾರಾಟ ಕೇಂದ್ರ ತೆಗೆಯಬೇಕೆಂಬುದು ಅನ್ನದಾತರ ಒಕ್ಕೊರಲ ಒತ್ತಾಯ.

ವಿಶಾಲವಾದ ಮಾರುಕಟ್ಟೆ: ಕೊಳ್ಳೇಗಾಲ ಮತ್ತು ಹನೂರು ಪಟ್ಟಣದಲ್ಲಿರುವ ಕೃಷಿ ಮಾರುಕಟ್ಟೆ ವಿಶಾಲ ಪ್ರದೇಶದಿಂದ ಕೂಡಿದೆ. ಇಲ್ಲಿಯೇ ಅರಿಶಿಣ ಮಾರಾಟ ಮಾರುಕಟ್ಟೆ ಸ್ಥಾಪಿಸಿ ಎಂಬುದು ರೈತರ ಆಗ್ರಹವಾಗಿದ್ದು, ಮಾರುಕಟ್ಟೆ ವ್ಯವಸ್ಥೆ ಕಲ್ಪಿಸಿದರೆ ಅರಿಶಿಣಕ್ಕೂ ಉತ್ತಮ ಬೆಲೆ ದೊರೆಯಲಿದೆ.

ರೈತರಿಗೆ ಸಾರಿಗೆ ಶುಲ್ಕದ ಬರೆ: ಕೊಳ್ಳೇಗಾಲ ವ್ಯಾಪ್ತಿಯ ರೈತರು ಅರಿಶಿಣ ಮಾರಾಟ ಮಾಡಲು 40 ಕಿ.ಮೀ. ದೂರವಿರುವ ಚಾಮರಾಜನಗರ ಜಿಲ್ಲಾ ಕೇಂದ್ರದಲ್ಲಿರುವ ಎಪಿಎಂಸಿಗೆ ತೆರಳಬೇಕಿದೆ. ಕೊಳ್ಳೇಗಾಲದಿಂದ ಚಾಮರಾಜನಗರಕ್ಕೆ ಅರಿಶಿಣ ಸಾಗಿಸಲು 3 ಸಾವಿರ ರೂ. ವಾಹನ ಬಾಡಿಗೆಯೊಂದಿಗೆ 1800 ರೂ. ಕೂಲಿ ಹಣವನ್ನು ತೆತ್ತಬೇಕಿದೆ. ಇನ್ನು ಹನೂರು ಚಾಮರಾಜನಗರ ಜಿಲ್ಲಾ ಕೇಂದ್ರಕ್ಕೆ 70 ರಿಂದ 80 ಕಿಮೀ ದೂರವಿದ್ದು ಅರಿಶಿಣ ಸಾಗಣೆಗೆ ವಾಹನದ ಬಾಡಿಗೆ ಹಣ ದುಪ್ಪಟ್ಟಾಗಲಿದೆ. ಗುಂಡ್ಲುಪೇಟೆ ತಾಲೂಕಿಗೆ ಚಾಮರಾಜನಗರ ಜಿಲ್ಲಾ ಕೇಂದ್ರ ಹತ್ತಿರವಿದೆಯಾದರೂ ಹನೂರು ತಾಲೂಕಿಗೆ ದೂರವಿರುವುದರಿಂದ ರೈತರಿಗೆ ಸಾಗಣೆ ವೆಚ್ಚದ ಬಿಸಿ ತಟ್ಟಿದೆ. ಹಾಗಾಗಿ ರೈತರು ಸ್ಥಳೀಯ ಮಾರುಕಟ್ಟೆಯಲ್ಲಿ ಅರಿಶಿಣ ಮಾರುಕಟ್ಟೆ ವ್ಯವಸ್ಥೆ ಆಗಬೇಕೆಂಬ ಬೇಡಿಕೆ ಇಡುತ್ತಿದ್ದಾರೆ. ಇಲ್ಲವೇ ಕೃಷಿ ಮಾರುಕಟ್ಟೆಯೆ ಸಾರಿಗೆ ಶುಲ್ಕವನ್ನು ನೀಡಲಿ ಎಂಬುದು ರೈತರ ಆಗ್ರಹವಾಗಿದೆ.

ಕೊಳ್ಳೇಗಾಲ-ಹನೂರು ತಾಲೂಕಿನಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಅರಿಶಿಣ ಬೆಳೆಯುತ್ತಾರೆ. ಸ್ಥಳೀಯ ಎಪಿಎಂಸಿಯಲ್ಲಿ ಮಾರುಕಟ್ಟೆ ವ್ಯವಸ್ಥೆ ಇಲ್ಲದೆ ರೈತರಿಗೆ ಸಮಸ್ಯೆಯಾಗಿದೆ. ಚಾಮರಾಜನಗರ ಎಪಿಎಂಸಿಗೆ ಅರಿಶಿಣ ಕೊಂಡೊಯ್ಯಲು ಸಾವಿರಾರು ರೂ. ಖರ್ಚು ತಗುಲಲಿದೆ. ಅಧಿಕಾರಿಗಳು ರೈತರ ಪರವಾಗಿಲ್ಲ ಎಂಬ ಸಂಶಯ ಮೂಡುತ್ತಿದೆ. ರೈತರ ಆರ್ಥಿಕ ಹಿತದೃಷ್ಟಿ ಯಿಂದ ಜಿಲ್ಲಾಡಳಿತ ಹನೂರು, ಕೊಳ್ಳೇಗಾಲ ಕೃಷಿ ಮಾರುಕಟ್ಟೆಯಲ್ಲಿಯೇ ಮಾರಾಟ ಕೇಂದ್ರ ತೆರೆಬೇಕು. ಇಲ್ಲವೇ ಸಾರಿಗೆ ಶುಲ್ಕವನ್ನು ಕೃಷಿ ಮಾರುಕಟ್ಟೆಯಿಂದಲೇ ಕೊಡಲಿ.

ಶೈಲೇಂದ್ರ ಶ್ರೀಕಂಠಸ್ವಾಮಿ ಜಿಲ್ಲಾ ಕಾರ್ಯಾಧ್ಯಕ್ಷ, ರೈತ ಸಂಘ, ಕೊಳ್ಳೇಗಾಲ

ಚಾಮರಾಜನಗರ ಜಿಲ್ಲಾ ಕೇಂದ್ರದಲ್ಲಿ ಮಾತ್ರ ಅರಿಶಿಣ ಮಾರಾಟಕ್ಕೆ ಟೆಂಡರ್ ಮಾರ್ಕೆಟ್ ಇದೆ. ತಾಲೂಕು ವ್ಯಾಪ್ತಿಯಲ್ಲಿ ತೆರೆಯಲು ಅವಕಾಶವಿಲ್ಲ. ಜಿಲ್ಲೆ ವ್ಯಾಪ್ತಿಯಲ್ಲಿ ರೈತರು ಬೆಳೆದ ಅರಿಶಿಣ ಮಾರಾಟ ಮಾಡಬಹುದು. ಆನ್‌ಲೈನ್ ಮೂಲಕ ಟೆಂಡರ್ ಪ್ರಕ್ರಿಯೆ ನಡೆಯಲಿದೆ. ಪ್ರತಿ ಗುರುವಾರ ಟೆಂಡರ್ ಮಾರ್ಕೆಟ್ ನಡೆಯಲಿದೆ. ಕಳೆದ ವಾರ 13,000 ದಿಂದ 13,900 ರೂ.ವರೆಗೆ ಅರಿಶಿಣಕ್ಕೆ ಬೆಲೆ ದೊರೆತಿದೆ. ಬರೋಬ್ಬರಿ 2,220 ಕ್ವಿಂಟಾಲ್ ಖರೀದಿ ಮಾಡಲಾಗಿದೆ.

ಬಸವಣ್ಣ ಉಪ ನಿರ್ದೇಶಕ, ಎಪಿಎಂಸಿ, ಚಾಮರಾಜನಗರ