ಮಹಾರಾಷ್ಟ್ರದಲ್ಲಿ 5 ಹೆಣ್ಣು ಚಿರತೆಗಳಿಗೆ ಟ್ಯೂಬೆಕ್ಟಮಿ ಪ್ಲ್ಯಾನ್

ಮಹಾರಾಷ್ಟ್ರದ ಹಲವು ಕಡೆಗಳಲ್ಲಿ ಚಿರತೆ ಸಂತತಿ ಹೆಚ್ಚಳವಾಗಿ ಹಾವಳಿ ಅಧಿಕವಾಗಿದೆ. ಈ ಹಿನ್ನೆಲೆಯಲ್ಲಿ ಜುನ್ನಾರ್ ಅರಣ್ಯ ಇಲಾಖೆಯಿಂದ ಚಿರತೆಗಳಿಗೆ ಸಂತಾನ ಶಕ್ತಿ ಹರಣ ಶಸಚಿಕಿತ್ಸೆ ಮಾಡಲು ಯೋಜನೆ ರೂಪಿಸಲಾಗಿದೆ. ಪುಣೆಯ ಜುನ್ನಾರ್‌ನ ಮಣಿಕಡೋ ಲಿಯೋಪಾರ್ಡ್ ರೆಸ್ಕ್ಯೂ ಸೆಂಟರ್ ಇಲ್ಲಿನ ಪ್ರಮುಖ ಚಿರತೆ ಪುನರ್ವಸತಿ ಕೇಂದ್ರವಾಗಿದೆ. ಇದರಲ್ಲಿ ಚಿರತೆ ಮರಿಗಳು ಮತ್ತು ಸಂಘರ್ಷದಲ್ಲಿ ಗಾಯಗೊಂಡ ಚಿರತೆಗಳಿಗೆ ಚಿಕಿತ್ಸೆ, ಆಶ್ರಯ ನೀಡಲಾಗುತ್ತಿದೆ.

ಈ ಕೇಂದ್ರದಲ್ಲಿರುವ 5 ಹೆಣ್ಣು ಚಿರತೆಗಳಿಗೆ ಸಂತಾನ ಶಕ್ತಿ ಹರಣ ಶಸಚಿಕಿತ್ಸೆ ನಡೆಸಲು ಕೇಂದ್ರ ಸರ್ಕಾರದಿಂದ ಅನುಮತಿ ಪಡೆದುಕೊಳ್ಳಲಾಗಿದೆ. ಇದೊಂದು ಪೈಲಟ್ ಪ್ರಾಜೆಕ್ಟ್ ಆಗಿದ್ದು, 5 ಚಿರತೆಗಳಿಗೆ ಸಂತಾನ ಶಕ್ತಿ ಹರಣ ಶಸಚಿಕಿತ್ಸೆ ಮಾಡಲು ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ ಎಂದು ಜುನ್ನಾರ್ ಅರಣ್ಯ ಇಲಾಖೆ ‘ವಿಜಯವಾಣಿ’ಗೆ ತಿಳಿಸಿದೆ.

ವನ್ಯಜೀವಿಗಳ ಸಂತಾನ ಶಕ್ತಿ ಹರಣವನ್ನು ವೈಜ್ಞಾನಿಕ ಕ್ರಮವೆಂದು ಸಾಮಾನ್ಯವಾಗಿ ಪರಿಗಣಿಸಲ್ಪಟ್ಟರೂ, ಇದು ಮಾನವ-ವನ್ಯಜೀವಿ ಸಂಘರ್ಷಕ್ಕೆ ಸ್ವತಂತ್ರ ಪರಿಹಾರವಾಗಿ ಪರಿಣಾಮಕಾರಿ ಆಗುವ ಸಾಧ್ಯತೆ ಕಡಿಮೆ. ಆದಾಗ್ಯೂ, ಇದನ್ನು ಸೀಮಿತ ಮಟ್ಟದಲ್ಲಿ ಪ್ರಯೋಗಾತ್ಮಕವಾಗಿ ಪರಿಗಣಿಸಬಹುದು. ಇಲ್ಲವಾದರೆ ದೀರ್ಘಕಾಲಿಕ ಪರಿಹಾರಗಳನ್ನು ಕಂಡುಹಿಡಿಯುವುದು ಕಷ್ಟವಾಗಬಹುದು ಎಂದು ವನ್ಯಜೀವಿ ವಿಜ್ಞಾನಿ ಡಾ.ಸಂಜಯ್ ಗುಬ್ಬಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇದು ವನ್ಯಜೀವಿಗಳ ಆವಾಸಸ್ಥಾನಗಳ ಸಂರಕ್ಷಣೆ, ಅವೈಜ್ಞಾನಿಕ ನಿರ್ವಹಣಾ ವಿಧಾನಗಳನ್ನು ನಿಲ್ಲಿಸುವುದು, ವನ್ಯಜೀವಿ ಬೇಟೆಯನ್ನು ತಡೆಯುವುದು ಮತ್ತು ವನ್ಯಜೀವಿಗಳ ಅವೈಜ್ಞಾನಿಕ ಸ್ಥಳಾಂತರವನ್ನು ತಡೆಯುವಂತಹ ಕ್ರಮಗಳೊಂದಿಗೆ ಮಾತ್ರ ಜಾರಿಗೊಳಿಸಬೇಕು. ಆನೆಗಳ ಮೇಲೆ ಪ್ರಯೋಗಿಸಲು ಉದ್ದೇಶಿಸಿದರೆ, ಕೊಡಗು ಮತ್ತು ಹಾಸನ ಜಿಲ್ಲೆಗಳ ಕಾಫಿ ತೋಟಗಳಿಗೆ ಸೀಮಿತವಾಗಿರುವ ಆನೆಗಳ ಮೇಲೆ ನಿಯಂತ್ರಿತ ಪ್ರಯೋಗಾತ್ಮಕವಾಗಿ ಇದನ್ನು ಅನುಷ್ಠಾನಗೊಳಿಸಬಹುದು. ಚಿರತೆಗಳ ಮೇಲೆ ಪ್ರಯೋಗಿಸುವುದಾದರೆ, ತುಮಕೂರಿನ ಹೆಬ್ಬೂರು ಪ್ರದೇಶದಂತಹ ಸಂಪೂರ್ಣವಾಗಿ ಜನವಸತಿ ಪ್ರದೇಶಗಳಲ್ಲಿ ಕಾಣಿಸಿಕೊಳ್ಳುವ ಚಿರತೆಗಳ ಮೇಲೆ ಸೀಮಿತ ಮಟ್ಟದಲ್ಲಿ ಪ್ರಯತ್ನಿಸಬಹುದು.ಕರ್ನಾಟಕದಲ್ಲಿ ಮೊದಲ ಬಾರಿ ಪ್ರಯತ್ನಿಸುತ್ತಿರುವುದರಿಂದ ಅತಿ ಜಾಗರೂಕತೆಯಿಂದ ಮಾಡಬೇಕಾಗುತ್ತದೆ ಎಂದಿದ್ದಾರೆ.

ರಾಜ್ಯದಲ್ಲಿ ಹಲವು ಕಡೆ ಅರಣ್ಯ ಭೂಮಿ ಒತ್ತುವರಿಯಾಗಿದ್ದು, ಇದನ್ನು ತೆರವು ಮಾಡಿ ವನ್ಯಪ್ರಾಣಿಗಳ ಆವಾಸ್ಥಳವನ್ನು ವಿಸ್ತರಣೆ ಮಾಡುವುದು ಸೂಕ್ತವೇ ಹೊರತು, ಆಯ್ದ ವನ್ಯಪ್ರಾಣಿಗಳಿಗೆ ಸಂತಾನ ಶಕ್ತಿ ಹರಣ ಮಾಡುವುದು ಸರಿಯಲ್ಲ ಎಂದು ಪರಿಸರವಾದಿ ಪುಣಜನೂರು ದೊರೆಸ್ವಾಮಿ ಹೇಳಿದ್ದಾರೆ. ಅರಣ್ಯದ ಅಂಚಿನ ಪ್ರದೇಶ, ಬೆಟ್ಟಗುಡ್ಡಗಳು ಅಕ್ರಮವಾಗಿ ಒತ್ತುವರಿಯಾಗುತ್ತಿವೆ. ಕಾಡಿನಲ್ಲಿ ಜಾಗವಿಲ್ಲದೆ, ಮೇವಿಲ್ಲದೆ, ಕುಡಿಯುವ ನೀರಿಲ್ಲದೆ ಪ್ರಾಣಿಗಳು ಹೊರಗೆ ಬರುತ್ತಿವೆ. ಪರಿಣಾಮ ಸಂಘರ್ಷ ಸೃಷ್ಟಿಯಾಗುತ್ತಿದೆ. ಇದನ್ನೆಲ್ಲ ಸರಿಪಡಿಸುವ ಬದಲು ಸಂತಾನ ಶಕ್ತಿ ಹರಣ ಮಾಡಬೇಕೆನ್ನುವುದು ನಗೆಪಾಟಲಿನ ವಿಚಾರ. ವನ್ಯಜೀವಿಗಳಿಗೆ ಸಂತಾನ ಶಕ್ತಿ ಹರಣ ಶಸಚಿಕಿತ್ಸೆ ಮಾಡಲು ಸಾಧ್ಯವಾ?, ಕಾಡಿದ್ದರೆ ನಾಡು, ವನ್ಯಜೀವಿಗಳಿದ್ದರೆ ಆಹಾರ ಸರಪಳಿ ಸಮತೋಲನವಾಗುತ್ತದೆ ಎನ್ನುವುದನ್ನು ಮರೆಯಬಾರದು ಎಂದಿದ್ದಾರೆ.

"

"