ಗುಂಡ್ಲುಪೇಟೆ ತಾಲೂಕಿನಲ್ಲಿ ಧಾರಾಕಾರ ಮಳೆ

ಗಣೇಶ ಚತುರ್ಥಿಯ ರಾತ್ರಿ ಸುಮಾರು 11 ಗಂಟೆ ವೇಳೆಗೆ ಆರಂಭವಾದ ಮಳೆ ಸಿಡಿಲು, ಗುಡುಗಿನ ಜತೆ ಆರ್ಭಟಿಸಿತು. ಇದರಿಂದಾಗಿ ಮಂಗಳವಾರ ಬೆಳಗ್ಗೆಯಿಂದಲೇ ಬಿಸಿಲ ಝಳ ಹೆಚ್ಚಿತ್ತು. ಸಂಜೆ ವೇಳೆಗೆ ಗುಂಡ್ಲುಪೇಟೆ, ಅಣ್ಣೂರುಕೇರಿ, ಕೋಡಹಳ್ಳಿ, ಶಿವಪುರ, ಹುಲ್ಲೇಪುರ, ಬೊಮ್ಮಲಾಪುರ, ಅಂಕಹಳ್ಳಿ ಭಾಗದಲ್ಲಿ ದಪ್ಪ ಹನಿಗಳೊಂದಿಗೆ ಕೆಲವೆಡೆ ಆಲಿಕಲ್ಲಿನೊಂದಿಗೆ ಮಳೆ ಸಾಧರಣ ಪ್ರಮಾಣದಲ್ಲಿ ಸುರಿಯಿತು.

ತಾಲೂಕಿನ ಕಡತಾಳಕಟ್ಟೆಹುಂಡಿ, ಕೊಡಸೋಗೆ, ದಾರಿಬೇಗೂರು, ಸೋಮನಪುರ, ಶೀಲವಂತಪುರ, ದೇಪಾಪುರ, ತೆರಕಣಾಂಬಿ, ಕಂದೇಗಾಲ, ಮೊಳ್ಳಯ್ಯನಹುಂಡಿ, ಕಗ್ಗಳ, ತ್ರಿಯಂಭಕಪುರ ಭಾಗದಲ್ಲಿ ತಗ್ಗು ಪ್ರದೇಶಗಳಲ್ಲಿ ಅಪಾರ ಪ್ರಮಾಣದಲ್ಲಿ ಸಂಗ್ರಹವಾಗುವ ಜತೆಗೆ ಹಳ್ಳ, ಕೊಳ್ಳಗಳು ತುಂಬಿ ಹರಿಯಿತು. ಪರಿಣಾಮ ಕೆಲವು ಕೆರೆ ಕಟ್ಟೆಗಳಲ್ಲಿ ಮಳೆ ನೀರು ಸಂಗ್ರಹವಾಗಿದೆ.

ಮಳೆಯಿಂದ ಹಾನಿ: ಮಳೆ ನೀರು ಹೆಚ್ಚಿನ ಪ್ರಮಾಣದಲ್ಲಿ ಸಂಗ್ರಹವಾದ ಕಾರಣ ಕೊಡಸೋಗೆ ಗ್ರಾಮದ ಜೆಎಸ್‌ಎಸ್ ಪ್ರೌಢಶಾಲೆ ಸುತ್ತುಗೋಡೆ ಕುಸಿದಿದೆ. ಸೋಮನಪುರ ಗ್ರಾಮದಲ್ಲಿ ಗಣೇಶ ಮೂರ್ತಿ ಪ್ರತಿಷ್ಠಾಪಿಸಿದ್ದ ತೆಂಗಿನ ಗರಿಗಳ ಚಪ್ಪರ ಕುಸಿದಿದೆ. ಗೊನೆ ಬಿಡುವ ಹಂತಕ್ಕೆ ಬಂದಿದ್ದ ಬಾಳೆ ಬೆಳೆ ಮಳೆಯಿಂದ ಹಾನಿಗೊಳಗಾಗಿದೆ.

ಕಗ್ಗಳ ಸಮೀಪ ನೂತನವಾಗಿ ಸೇತುವೆ ನಿರ್ಮಿಸಲು ನಿರ್ಮಿಸಿದ್ದ ಪರ್ಯಾಯ ರಸ್ತೆಗೆ ಅಳವಡಿಸಿದ್ದ ಸಿಮೆಂಟ್ ಪೈಪ್‌ಗಳು ಕೊಚ್ಚಿಹೋಗಿವೆ. ಕಳೆ ತೆಗೆಸಿ, ಕಾಲಕ್ಕೆ ತಕ್ಕಂತೆ ಗೊಬ್ಬರ ಹಾಕಿ ಪಾರು(ಗಿಡಗಳಿಗೆ ಮಣ್ಣು ಸೇರಿಸುವುದು) ಮಾಡಿಸಿದ ನಂತರವೂ ಮಳೆ ಬಾರದ ಹಿನ್ನೆಲೆಯಲ್ಲಿ ನಿರಾಸೆ ಹೊಂದಿದ್ದ ಅರಿಶಿಣ ಬೆಳೆಗಾರರು ಮಳೆಯಿಂದ ನಿಟ್ಟುಸಿರು ಬಿಟ್ಟಿದ್ದಾರೆ. ಕೆರೆಗಳಿಗೆ ನೀರು ಬಿಡುವ ವಿಷಯ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದ್ದು, ಪ್ರಸ್ತುತ ತಾಲೂಕು ಕಚೇರಿ ಮುಂದೆ ರೈತ ಸಂಘಟನೆ ಸದಸ್ಯರು ಅಹೋರಾತ್ರಿ ಧರಣಿ ಮುಂದುವರಿಸಿದ್ದಾರೆ. ಈ ವೇಳೆ ತಾಲೂಕಿನ ಹಲವು ಗ್ರಾಮಗಳಲ್ಲಿ ಉತ್ತಮ ಮಳೆಯಾಗಿರುವುದು ರೈತರಲ್ಲಿ ಮಂದಹಾಸ ಮೂಡಿಸಿದೆ. ಅಲ್ಲದೆ ಬುಧವಾರದಿಂದ ಕೃಷಿ ಚಟುವಟಿಕೆಗಳು ಬಿರುಸು ಪಡೆದುಕೊಳ್ಳಲಿವೆ.