ಚಿಕ್ಕಲ್ಲೂರಿನಲ್ಲಿ ಹುಲಿ ವಾಹನ ಉತ್ಸವ

ಶನಿವಾರ ತುಂಬು ಹುಣ್ಣಿಮೆಯ ಬೆಳದಿಂಗಳಲ್ಲಿ ಸಿದ್ದಪ್ಪಾಜಿ ಜಾತ್ರೆಗೆ ಚಂದ್ರಮಂಡಲ ಉತ್ಸವದ ಮೂಲಕ ಚಾಲನೆ ದೊರೆತಿದ್ದು. 2ನೇ ದಿನ ಪೂಜೆಯನ್ನು ಭಕ್ತರು ದೊಡ್ಡಮ್ಮ ತಾಯಿ ಸೇವೆ ಹಾಗೂ ಹುಲಿವಾಹನ ಉತ್ಸವ ಜರುಗಿತು.

ರಾಜ ಬೊಪ್ಪೇಗೌಡನಪುರದ ಪೀಠಾಧಿಪತಿ ಶ್ರೀ ಜ್ಞಾನಾನಂದ ಚೆನ್ನರಾಜೇಅರಸ್ ಅವರು ಸಿದ್ದಪ್ಪಾಜಿ ಗದ್ದುಗೆಗೆ ಆಗಮಿಸಿ ಪೂಜೆ ಸಲ್ಲಿಸಿದ ಬಳಿಕ ಬೆಳ್ಳಿಯ ಲಿಂಗ ಸಮೇತ ನಾಗಾಭರಣವನ್ನು ಹುಲಿವಾಹನ ಉತ್ಸವಕ್ಕೆ ಪ್ರತಿಷ್ಠಾಪನೆ ಮಾಡಲಾಯಿತು. ಆನಂತರ, ಸ್ವಾಮೀಜಿ ಅವರು ಹುಲಿ ವಾಹನ ಉತ್ಸವಕ್ಕೆ ಪೂಜೆ ಸಲ್ಲಿಸಿ ಚಾಲನೆ ನೀಡಿದರು.

ಉತ್ಸವ ಮೂರ್ತಿಯನ್ನು ದೇವಾಲಯ ಸುತ್ತಲೂ ಪ್ರದಕ್ಷಿಣೆ ಮಾಡಲಾಯಿತು. ನೀಲಗಾರರ ಜಾಗಟೆ, ಡೊಳ್ಳು, ತಮಟೆ, ಕಂಸಾಳೆ ಸದ್ದಿನಲ್ಲಿ ಕುರುಬನಕಟ್ಟೆಯ ಚೆನ್ನಯ್ಯ-ಲಿಂಗಯ್ಯ ಕಂಡಾಯಗಳು, ಸತ್ತಿಗೆ, ಸೂರಾಪಾನಿ, ಛತ್ರಿ, ಚಾಮರ ಉತ್ಸವಕ್ಕೆ ಮೆರುಗು ನೀಡಿತು. ಸಾವಿರಾರು ಭಕ್ತರು ಉತ್ಸವವನ್ನು ಕಣ್ತುಂಬಿಕೊಂಡರು. ಇದಕ್ಕೂ ಮುನ್ನ ಬೆಳಗ್ಗಿನಿಂದ ಸಂಜೆವರೆಗೂ ಸಾವಿರಾರು ಭಕ್ತರು ಶ್ರೀ ಸಿದ್ದಪ್ಪಾಜಿ ಗದ್ದುಗೆಗೆ ಹೂ, ಹಣ್ಣು ಸಮರ್ಪಿಸಿದರು. ದೇವಾಲಯ ಮುಂಭಾಗ ಧೂಪ, ಕರ್ಪೂರ ಹಚ್ಚಿ ಭಕ್ತಿ ಮೆರೆದರು. ಬೆಳಗ್ಗಿನಿಂದ ರಾತ್ರಿವರೆವಿಗೂ ಸರತಿ ಸಾಲಿನ ಮೂಲಕ ಆಗಮಿಸಿ ದೇವರ ದರ್ಶನ ಪಡೆದರು.

ದೊಡ್ಡಮ ತಾಯಿಗೆ ಸಲ್ಲಿಕೆ

ಹಲಗೂರಿನ ಪಾಂಚಾಳರ ಬಳಿ ಶ್ರೀ ಸಿದ್ದಪ್ಪಾಜಿ ಕಬ್ಬಿಣದ ಭಿಕ್ಷೆ ಪಡೆಯಲು ತೆರಳುವ ಸಂದರ್ಭ ದೊಡ್ಡಮ್ಮ ತಾಯಿ ಸಿದ್ದಪ್ಪಾಜಿಗೆ ಆತ್ಮಸ್ಥೆರ್ಯ ತುಂಬಿ, ಆಶೀರ್ವದಿಸಿ ಬೆನ್ನೆಲುಬಾಗಿ ನಿಂತರು. ಸಿದ್ದಪ್ಪಾಜಿಗೆ ಪಾಂಚಾಳರು ನೀಡಿದ ಪವಾಡಗಳನ್ನು ಗೆಲ್ಲುವ ಶಕ್ತಿಯನ್ನು ದೊಡ್ಡಮ್ಮ ತಾಯಿ ನೀಡಿದರು ಎಂಬುದು ಪುರಾಣ. ಈ ಹಿನ್ನೆಲೆ, ಚಿಕ್ಕಲ್ಲೂರಿನ ಜಾತ್ರೆಯ 2 ದಿನದ ಪೂಜೆ ದೊಡ್ಡಮ್ಮ ತಾಯಿಗೆ ಸಲ್ಲುತ್ತದೆ. ಈ ದಿನ ಭಕ್ತರು ತಾವು ಹೂಡಿರುವ ಬಿಡಾರಗಳಲ್ಲಿ ಶ್ರದ್ಧಾ-ಭಕ್ತಿಯಿಂದ ಒಲೆ ಹಚ್ಚಿ ದೊಡ್ಡಮ್ಮ ತಾಯಿ ಹೆಸರೇಳಿ ಕಜ್ಜಾಯ, ತುಪ್ಪ, ಪಾಯಸ, ಅನ್ನ, ಸಾಂಬಾರ್ ಅಡುಗೆ ತಯಾರಿಸಿಕೊಂಡು ಎಡೆ ಇಟ್ಟು ದೊಡ್ಡಮ್ಮ ತಾಯಿಗೆ ಅರ್ಪಣೆ ಮಾಡುತ್ತಾರೆ. ಅಲ್ಲದೆ, ಪಾಂಚಾಳರು ಹಲಗೂರಿನಲ್ಲಿ ಹುಲಿ ಆಕೃತಿಯ ಮೇಲೆ ಸವಾರಿ ಮಾಡುವ ಪಾವಡವನ್ನು ಶ್ರೀ ಸಿದ್ದಪ್ಪಾಜಿ ಅವರಿಂದ ಮಾಡಿಸಿರುವ ಹಿನ್ನೆಲೆ ಹುಲಿ ವಾಹನ ಉತ್ಸವವೂ ನಡೆಯಲಿದೆ.

ವ್ಯಾಪಾರ ಜೋರು: 2ನೇ ದಿನ ಜಾತ್ರೆಗೆ ಸಾವಿರಾರು ಭಕ್ತರು ಆಗಮಿಸಿದ್ದು ಜಾತ್ರೆ ಕಳೆಗಟ್ಟಿತ್ತು. ಜಾತ್ರೆ ಮಾಳದಲ್ಲಿ ಸಿಗುವ ಮನೆ ಬಳಕೆಯ ವಸ್ತುಗಳು, ಮಕ್ಕಳ ಆಟದ ಸಾಮಗ್ರಿಗಳ ಖರೀದಿ ಭರಾಟೆ ಜೋರಾಗಿತ್ತು.

ವಿಶೇಷ ದರ್ಶನಕ್ಕೆ ನೂರು ರೂ.ಪಾವತಿಸಿದರೂ ಸಿಹಿ ಪ್ರಸಾದ ಇಲ್ಲ

ಉಚಿತ ದರ್ಶನವಲ್ಲದೆ ದೇವಾಲಯ ಮುಂಭಾಗ ಮಠದ ಕಡೆಯಿಂದ 100 ರೂ.ವಿಶೇಷ ದರ್ಶನ ವ್ಯವಸ್ಥೆ ಮಾಡಲಾಗಿತ್ತು. 100 ರೂ.ಪಾವತಿಸಿ ಬರುವ ಭಕ್ತರಿಗೆ ಕಪ್ಪು-ಧೂಳ್ತ ಮಾತ್ರ ನೀಡಲಾಗುತ್ತಿದೆ. ಬೇರೆ ದೇವಾಲಯಗಳಲ್ಲಿ ವಿಶೇಷ ಟಿಕೆಟ್ ಪಡೆದು ಬರುವವರಿಗೆ ದೇವಾಲಯದಲ್ಲಿ ಮಾರಾಟವಾಗುವ ಸಹಿ ಪ್ರಸಾದವನ್ನು ನೀಡುತ್ತಾರೆ. ಆದರೆ, ಇಲ್ಲಿ ಭಕ್ತರಿಗೆ ನೀಡುತ್ತಿಲ್ಲ.

ಧೂಳಿನ ಮಜ್ಜನ:

ಚಿಕ್ಕಲ್ಲೂರಿಗೆ ಬರುವ ಭಕ್ತರಿಗೆ ರಸ್ತೆ ಧೂಳು ಬಾಧಿಸಿತು. ಲೋಕೋಪಯೋಗಿ ಇಲಾಖೆ ಮತ್ತೀಪುರ ಕ್ರಾಸ್‌ನಿಂದ ಕೊತ್ತನೂರುವರೆಗೆ ರಸ್ತೆ ಅಭಿವೃದ್ಧಿಗೆ ಚಾಲನೆ ದೊರೆತು 6 ತಿಂಗಳಾಗಿದೆ. ಆದರೆ, ಇಲ್ಲಿವರೆವಿಗೂ ಪ್ರಕಾಶ್‌ಪಾಳ್ಯದಿಂದ ಕೊತ್ತನೂರು ಗ್ರಾ.ಪಂ.ಕಚೇರಿವರೆವಿಗೆ ಡಾಂಬರು ರಸ್ತೆಯಾಗಿದೆ. ಆದರೆ, ಉಳಿದ ಐದಾರು ಕಿ.ಮೀ. ರಸ್ತೆ ಕಾಮಗಾರಿ ಪೂರ್ಣಗೊಂಡಿಲ್ಲ. ಕಲ್ಲು ಮತ್ತು ಮಣ್ಣಿನ ರಸ್ತೆಯಲ್ಲೇ ಭಕ್ತರು ಜಾತ್ರೆಗೆ ಬರಬೇಕಿದೆ. ಇನ್ನು ಸಂಬಂಧ ಪಟ್ಟವರು ರಸ್ತೆಯಲ್ಲಿ ಧೂಳು ಬಾರದ ರೀತಿ ನೀರು ಹಾಕಿದರೂ ರಸ್ತೆ ಮತ್ತೆ ಒಣಗುತ್ತಿರುವುದ್ದರಿಂದ ಭಕ್ತರಿಗೆ ಧೂಳಿನ ಸ್ನಾನವಾಯಿತು.