ಚಾಮರಾಜನಗರ

ಗ್ರಾಮಗಳತ್ತ ಬಾಯಾರಿದ ‘ಜಿಂಕೆಗಳ ಓಟ’

ಮಲೆ ಮಹದೇಶ್ವರ ಬೆಟ್ಟದ ಕಾಡೊಲ ಗ್ರಾಮಕ್ಕೆ ನೀರು ಅರಸಿ ಬಂದಿದ್ದ ಜಿಂಕೆ
ಮಲೆ ಮಹದೇಶ್ವರ ಬೆಟ್ಟದ ಕಾಡೊಲ ಗ್ರಾಮಕ್ಕೆ ನೀರು ಅರಸಿ ಬಂದಿದ್ದ ಜಿಂಕೆ
ಕಿರಣ್ ಮಾದರಹಳ್ಳಿ
Published on: 

ಪ್ರಮುಖ ಮುಖ್ಯಾಂಶಗಳು

  • ನೀರು ಅರಸಿ ಊರಿಗೆ ಬರಲಾರಂಭಿಸಿರುವ ಚಿಗರೆಗಳು
ಚಾಮರಾಜನಗರ: ಬೇಸಿಗೆಯ ಪರಿಣಾಮ ಕುಡಿಯುವ ನೀರು ಮತ್ತು ಆಹಾರ ಅರಸಿ ಜಿಂಕೆಗಳು ಕಾಡಿನಿಂದ ನಾಡಿಗೆ ಬರಲು ಆರಂಭಿಸಿವೆ.
ಜಿಲ್ಲೆಯಲ್ಲಿ ಬೇಸಿಗೆ ತಾಪಮಾನ ಏರುತ್ತಲೇ ಇದೆ. ಕಾಡಿನಲಿ ್ಲ ಜಲಮೂಳಗಳು ಬತ್ತಿ ಹೋಗುತ್ತಿವೆ. ಅರಣ್ಯ ಇಲಾಖೆಯಿಂದ ಟ್ಯಾಂಕರ್ ಮೂಲಕ ತೊಟ್ಟಿಗಳಿಗೆ ನೀರನ್ನು ಸರಬರಾಜು ಮಾಡಲಾಗುತ್ತಿದೆ. ಇದರ ನಡುವೆ ಜಿಂಕೆಗಳ ವಾಸಸ್ಥಳದಲ್ಲಿ ನೀರು ಸಿಗದೆ ಸಮೀಪದ ಹಳ್ಳಿಗಳಿಗೆ ಬರುತ್ತಿವೆ.
ಮಾ.28ರಂದು ಮಲೆ ಮಹದೇಶ್ವರ ಬೆಟ್ಟ ವನ್ಯಜೀವಿಧಾಮ ವ್ಯಾಪ್ತಿಯ ಕಾಡೊಲ ಗ್ರಾಮಕ್ಕೆ ಜಿಂಕೆ ಬಂದಿತ್ತು. ನೀರನ್ನು ಅರಸಿ ಬಂದಿದ್ದ ಜಿಂಕೆಯನ್ನು ಗ್ರಾಮಸ್ಥರು ರಕ್ಷಣೆ ಮಾಡಿದ್ದರು. ವಿಷಯ ತಿಳಿದ ಅರಣ್ಯ ಇಲಾಖೆ ಜಿಂಕೆಯನ್ನು ಕಾಡಿಗೆ ಬಿಟ್ಟಿತು. ಏ.3ರಂದು ಗುಂಡ್ಲುಪೇಟೆ ತಾಲೂಕಿನ ಕುರುಬರಹುಂಡಿ ಗ್ರಾಮಕ್ಕೆ ಬಾಯಾರಿದ್ದ ಜಿಂಕೆ ಆಗಮಿಸಿತ್ತು. ರಕ್ಷಣೆ ಮಾಡಿದ ಗ್ರಾಮಸ್ಥರು ಕಾಡಿಗೆ ಬಿಟ್ಟರು. ಮುಂದಿನ ದಿನಗಳಲ್ಲಿ ಈ ರೀತಿಯಲ್ಲೆ ಜಿಂಕೆಗಳು ಕಾಡಿನಿಂದ ನಾಡಿಗೆ ಬರುವುದು ಹೆಚ್ಚಾಗುವ ಸಾಧ್ಯತೆ ಇದೆ. ಇದರೊಂದಿಗೆ ಬೀದಿನಾಯಿಗಳ ದಾಳಿಗೆ ತುತ್ತಾಗುವ ಆತಂಕವೂ ಇದೆ.
ಬೀದಿ ನಾಯಿಗಳಿಂದ ಅಪಾಯ:
ಕಾಡಿನಿಂದ ಗ್ರಾಮಗಳಿಗೆ ಬರುತ್ತಿರುವ ಜಿಂಕೆಗಳಿಗೆ ಬೀದಿನಾಯಿಗಳಿಂದ ಅಪಾಯವಿದೆ. 2025ರ ಮಾ.15ರಂದು ಗುಂಡ್ಲುಪೇಟೆ ತಾಲೂಕಿನ ಕಾಳನಹುಂಡಿಗೆ ಬಂದಿದ್ದ 3 ವರ್ಷದ ಗಂಡು ಜಿಂಕೆ ಮೇಲೆ ಬೀದಿ ನಾಯಿಗಳು ದಾಳಿ ಮಾಡಿ ಸಾಯಿಸಿದ್ದವು. 2024ರಲ್ಲಿ ಮಲೆ ಮಹದೇಶ್ವರ ವನ್ಯಜೀವಿಧಾಮದಲ್ಲಿ 8 ಜಿಂಕೆಗಳು ಬೀದಿನಾಯಿಗಳ ದಾಳಿಗೆ ಪ್ರಾಣ ಬಿಟ್ಟವು. ಈ ವರ್ಷ ಮಹದೇಶ್ವರ ಬೆಟ್ಟದ ಕಾಡೊಲ ಮತ್ತು ಗುಂಡ್ಲುಪೇಟೆಯ ಕುರುಬರಹುಂಡಿಗೆ ಜಿಂಕೆಗಳು ಬಂದಾಗ ಬೀದಿನಾಯಿಗಳು ದಾಳಿ ಮಾಡಿದ್ದವು. ಆದರೆ ಗ್ರಾಮಸ್ಥರು ರಕ್ಷಣೆ ಮಾಡಿದ ಹಿನ್ನೆಲೆಯಲ್ಲಿ ಜಿಂಕೆಯ ಪ್ರಾಣ ಉಳಿಯಿತು.
ಸ್ಥಳೀಯವಾಗಿಯೇ ನೀರು ಹುಡುಕುವ ಪ್ರಾಣಿ:
ಜಿಂಕೆಗಳು ನೀರನ್ನು ಹುಡುಕಿಕೊಂಡು ವಲಸೆ ಹೋಗುವುದಿಲ್ಲ. ಸ್ಥಳೀಯವಾಗಿಯೇ ಸಿಗುವ ನೀರಿನ ಮೂಲಗಳಿಗಾಗಿ ಹುಡುಕಾಟ ನಡೆಸುತ್ತಿವೆ. ಜಿಲ್ಲೆಯ ಅರಣ್ಯಗಳಲ್ಲಿ ಅಪಾರ ಸಂಖ್ಯೆಯಲ್ಲಿ ಜಿಂಕೆಗಳಿವೆ. ಚಾಮರಾಜನಗರ ತಾಲೂಕಿನ ಉಮ್ಮತ್ತೂರಿನಲ್ಲಿ ಕೃಷ್ಣಮೃಗ ಧಾಮವಿದೆ. ಜಿಂಕೆ ಸಂಸತಿ ಉತ್ತಮ ಸಸ್ಯ ವರ್ಗ, ಮಾಂಸಹಾರಿ ಪ್ರಾಣಿಗಳ ಇರುವಿಕೆಯ ಮೂಲಕ ಆಹಾರ ಸರಪಣಿಯ ಪ್ರಮುಖ ಕೊಂಡಿಯಾಗಿದೆ. ಬೇಸಿಗೆ ಬಂದರೆ ಆನೆಗಳು ನೀರು ಇರುವ ಪ್ರದೇಶಗಳಿಗೆ ವಲಸೆ ಹೋಗುತ್ತವೆ. ಆದರೆ ಜಿಂಕೆಗಳು ಮಾತ್ರ ವಾಸ ಮಾಡುವ ಸ್ಥಳದ ಸುತ್ತಮುತ್ತಲಿನಲ್ಲಿ ನೀರು ಹುಡುಕುತ್ತವೆ.
ಒಣಗಿದ ಹುಲ್ಲು, ಬತ್ತಿದ ಜಲ:
ಬಿಸಿಲಿನ ಪ್ರಖರತೆಗೆ ಕಾಡಿನಲ್ಲಿ ಹುಲ್ಲುಗಾವಲು, ಸಸ್ಯರಾಶಿ ಒಣಗಿನಿಂತಿದೆ. ಕೆರೆಗಳು ಬತ್ತಿ ಹೋಗುತ್ತಿವೆ. ಜಿಂಕೆಗಳಿಗೆ ಆಹಾರದ ಕೊರತೆ ಎದುರಾಗುತ್ತಿದೆ. ಬೇಸಿಗೆ ಕಾಲದಲ್ಲಿ ಬದುಕುಳಿಯುವ ಕಲೆಯನ್ನು ಎಲ್ಲ ಪ್ರಾಣಿಗಳೂ ಕಲಿತಿದ್ದು, ಅದೇ ರೀತಿ ಜಿಂಕೆಯೂ ಆಹಾರಕ್ಕಾಗಿ ಅಲೆದು ಹೊಟ್ಟೆ ತುಂಬಿಸಿಕೊಳ್ಳುತ್ತದೆ ಮತ್ತು ದಾಹ ತಣಿಸಿಕೊಳ್ಳುತ್ತದೆ. ಇದೇ ಪ್ರಯತ್ನದಲ್ಲಿರುವಾಗ ಜಿಂಕೆಗಳು ಕಾಡಿನಿಂದ ನಾಡಿಗೆ ಜಿಂಕೆಗಳು ಬರುತ್ತಿವೆ. ಈ ರೀತಿ ಬರುವ ಜಿಂಕೆಯನ್ನು ಗ್ರಾಮಸ್ಥರು ರಕ್ಷಣೆ ಮಾಡುತ್ತಿರುವುದು ಗಮನಾರ್ಹ.
"

ಬೇಸಿಗೆ ಹಿನ್ನೆಲೆಯಲ್ಲಿ ಕೆರೆಗಳು ಬತ್ತಿ ಹೋಗುತ್ತಿವೆ. ಅರಣ್ಯ ಇಲಾಖೆಯಿಂದ ಟ್ಯಾಂಕರ್ ಮೂಲಕ ತೊಟ್ಟಿಗಳಿಗೆ ನೀರು ತುಂಬಿಸಲಾಗುತ್ತಿದೆ. ಜಿಂಕೆಗಳು ನೀರಿನ ಮೂಲಗಳಿಗೆ ವಲಸೆ ಹೋಗದೆ ಸ್ಥಳೀಯ ಪ್ರದೇಶದ ಸುತ್ತಮುತ್ತ ನೀರು ಹುಡುಕಾಟ ಮಾಡುತ್ತವೆ. ಆಗ ಗ್ರಾಮಗಳಲ್ಲಿ ಕಾಣಿಸಿಕೊಂಡುಬಿಡುತ್ತವೆ.

— ಭಾಸ್ಕರ್, ಡಿಸಿಎ್, ಮಲೆ ಮಹದೇಶ್ವರ ವನ್ಯಜೀವಿಧಾಮ, ಕೊಳ್ಳೇಗಾಲ

"

ಬೀದಿನಾಯಿಗಳ ಹಿಂಡು ಜಿಂಕೆಗಳಿಗಾಗಿ ಅಥವಾ ಜನರಿಗಾಗಿ ತೊಂದರೆ ಕೊಟ್ಟರೆ ಅವುಗಳ ನಿಯಂತ್ರಣಕ್ಕೆ ಸ್ಥಳೀಯ ಆಡಳಿತಕ್ಕೆ ತಿಳಿಸಬೇಕಾಗುತ್ತದೆ. ಗ್ರಾಮಗಳಲ್ಲಿ ಜಿಂಕೆ ಕಂಡರೆ ಕೂಡಲೇ ಸ್ಥಳೀಯರು ಅರಣ್ಯ ಇಲಾಖೆಗೆ ಮಾಹಿತಿ ನೀಡುವುದು ಸೂಕ್ತ.

— ಪ್ರಭಾಕರನ್, ನಿರ್ದೇಶಕ, ಬಂಡೀಪುರ ಹುಲಿ ಸಂರಕ್ಷಿತಾರಣ್ಯ ಪ್ರದೇಶ, ಗುಂಡ್ಲುಪೇಟೆ

chamarajanagara news
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net