ರಂಗಭೂಮಿ ಅತ್ಯಂತ ಶಕ್ತಿಶಾಲಿ ಮಾಧ್ಯಮ

ನಗರದ ಸರ್ಕಾರಿ ದರ್ಜೆ ಕಾಲೇಜು ಸಭಾಂಗಣದಲ್ಲಿ ರಂಗ ತರಂಗ ಟ್ರಸ್ಟ್ ಹಾಗೂ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಕನ್ನಡ ವಿಭಾಗ ಮತ್ತು ಸಾಂಸ್ಕೃತಿಕ ಸಮಿತಿ ಸಹಯೋಗದಲ್ಲಿ ಶುಕ್ರವಾರ ಆಯೋಜಿಸಿದ್ದ ವಿಶ್ವ ರಂಗಭೂಮಿ ದಿನಾಚರಣೆ ಸಂದೇಶ ವಾಚಿಸಿ ಮಾತನಾಡಿದರು.

ಪ್ರಸ್ತುತ ಸಂದರ್ಭದಲ್ಲಿ ಕೋಟಿ ಬಂಡವಾಳವನ್ನು ಹಾಕಿಕೊಂಡು ನಾಟಕ ಮಾಡುವ ಬದಲು ಜನರನ್ನು ತಲುಪುವ ನಾಟಕಗಳು ಅಗತ್ಯವಿದೆ. ಸಣ್ಣ ಸಣ್ಣ ತಂಡಗಳ ಮೇಲೆ ಹೆಚ್ಚಿನ ಜವಾಬ್ದಾರಿಯಿದ್ದು, ಕಡಿಮೆ ಪ್ರೇಕ್ಷಕರಿಗೆ ನಾಟಕಗಳನ್ನು ಮಾಡಬೇಕಿದೆ. ಮನರಂಜನೆ, ಶಿಕ್ಷಣ ಹಾಗೂ ಪ್ರೇರಣೆ ನಾಟಕಗಳಲ್ಲಿ ಇರಬೇಕಾಗಿದೆ. ರಂಗಭೂಮಿ ಅತ್ಯಂತ ಶಕ್ತಿಶಾಲಿ ಮಾಧ್ಯಮವಾಗಿದ್ದು, ಶಾಲಾ-ಕಾಲೇಜುಗಳಲ್ಲಿ ರಂಗ ಚಟುವಟಿಕೆಗಳನ್ನು ಪ್ರಾರಂಭ ಮಾಡಿದರೇ ರಂಗಭೂಮಿ ಉಳಿಯುತ್ತದೆ ಎಂದರು.

ಅಂತಾರಾಷ್ಟ್ರೀಯ ರಂಗಭೂಮಿ ಸಂಸ್ಥೆ ಪ್ರಾರಂಭವಾದ ನೆನಪಿಗಾಗಿ ವಿಶ್ವ ರಂಗಭೂಮಿ ದಿನಾಚರಣೆಯನ್ನು ಆಚರಣೆ ಮಾಡಿಕೊಂಡು ಬರಲಾಗುತ್ತಿದೆ. ಪ್ರತಿವರ್ಷ ಪ್ರಪಂಚದ ಯಾವುದಾರೂ ರಂಗಭೂಮಿಯಲ್ಲಿ ಕೆಲಸ ಮಾಡುವವರನ್ನು ಆಯ್ಕೆ ಮಾಡುವ ಮೂಲಕ ರಂಗಭೂಮಿ ಸಂದೇಶವನ್ನು ನೀಡಲಾಗುತ್ತದೆ. ಈ ಹಿಂದೆ ನಾಟಕಕಾರ ಗಿರೀಶ್ ಕಾರ್ನಾಡ್ ಅವರಿಗೂ ಈ ಅವಕಾಶ ದೊರಕಿತ್ತು. ಅವರು ಭಾರತವನ್ನು ಪ್ರತಿನಿಧಿಸುವುದರ ತೆಗೆ ಕನ್ನಡದವರು ಎಂಬುದು ನಮ್ಮೆಲ್ಲರ ಹೆಮ್ಮೆಯಾಗಿದೆ ಎಂದರು.

ರಂಗತರಂಗ ಟ್ರಸ್ಟ್ ಅಧ್ಯಕ್ಷ ಬಿಸಲವಾಡಿ ಸೋಮಶೇಖರ್ ಮಾತನಾಡಿ, ರಂಗಭೂಮಿ ಸಾಮಾಜಿಕ ಬದಲಾವಣೆಯ ಮೂಲಕ ಸಂಸ್ಕೃತಿ ಮತ್ತು ಮಾನವೀಯ ಮೌಲ್ಯಗಳನ್ನು ಬಿತ್ತುವ ಕೆಲಸ ಮಾಡುತ್ತಿದೆ. ರಂಗಭೂಮಿ ಕಲಿಸುವ ಬದುಕಿನ ಪಾಠಗಳು ಎಲ್ಲದಕ್ಕೂ ಮಿಗಿಲಾಗಿರುತ್ತದೆ ಎಂದು ತಿಳಿಸಿದರು.

ಈ ಸಂದರ್ಭದಲ್ಲಿ ಹಿರಿಯ ರಂಗಕರ್ಮಿ ಹಾಗೂ ಚಿತ್ರನಟ ಬರ್ಟಿ ಒಲಿವೆರಾ ಮತ್ತು ರಂಗಭೂಮಿ ಕಲಾವಿದ ಅಂಬಳೆ ಸಿದ್ದರಾಜು ಅವರಿಗೆ ರಂಗಗೌರವ ಸಲ್ಲಿಸಲಾಯಿತು.

ಕಾರ್ಯಕ್ರಮದಲ್ಲಿ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಪ್ರಾಂಶುಪಾಲರಾದ ಡಾ.ಆರ್.ಎಸ್.ಅಶ್ವಿನಿ, ಕನ್ನಡ ವಿಭಾಗದ ಸುರೇಶ್, ಮಂಜುನಾಥ್, ಸಾಂಸ್ಕೃತಿಕ ಸಮಿತಿಯ ಸಂಚಾಲಕಿ ಡಾ.ಶಾಲಿನಿ, ಉಪನ್ಯಾಸಕರಾದ ನವೀನ್, ಪುಣಜೂರು ದೊರೆಸ್ವಾಮಿ, ರಶ್ಮಿ, ನಿವೃತ್ತ ಪ್ರಾಧ್ಯಾಪಕ ಎ.ಎಂ.ಶಿವಸ್ವಾಮಿ, ಜನಶಕ್ತಿ ಸುರೇಶ್, ರಂಗಕರ್ಮಿ ಕಿರಣ್ ಗಿರ್ಗಿ ಇನ್ನಿತರರು ಹಾಜರಿದ್ದರು.