ಚಾಮರಾಜನಗರ

ಅಂತರ್ಜಲದ ‘ಆರ್ತನಾದ ಮಾರ್ದನಿ’

ಜಿಲ್ಲಾ ಅಂತರ್ಜಲ ಕಚೇರಿ ಅಧಿಕಾರಿಗಳು ಜಲದಮಟ್ಟ ಪರೀಕ್ಷೆ ಮಾಡುತ್ತಿರುವುದು
ಜಿಲ್ಲಾ ಅಂತರ್ಜಲ ಕಚೇರಿ ಅಧಿಕಾರಿಗಳು ಜಲದಮಟ್ಟ ಪರೀಕ್ಷೆ ಮಾಡುತ್ತಿರುವುದು
ಕಿರಣ್ ಮಾದರಹಳ್ಳಿ
Published on: 

ಪ್ರಮುಖ ಮುಖ್ಯಾಂಶಗಳು

  • ಬೇಸಿಗೆ ಬೇಗೆ ಜಲಮಟ್ಟಕ್ಕೂ ತಟ್ಟಿದ ಧಗೆ
  • ಹನೂರಿನಲ್ಲಿ ಇಳಿಕೆ, ಭವಿಷ್ಯದ ಆತಂಕ ಏರಿಕೆ
ಚಾಮರಾಜನಗರ: ಬೇಸಿಗೆಯ ಬೇಗೆ ನೆಲದ ನೆತ್ತಿಯನ್ನು ಸುಡುತ್ತಿದೆ. ನೆಲದಾಳದಲ್ಲಿರುವ ಜಲಮಟ್ಟಕ್ಕೂ ಧಗೆ ತರಿಸಿದೆ. ಹನೂರು ತಾಲೂಕಿನಲ್ಲಂತೂ ಅಂತರ್ಜಲದ ಆರ್ತನಾದ ಬಹಿರಂಗವಾಗಿಯೇ ಮಾರ್ದನಿಸುತ್ತಿದೆ.
ಚಾಮರಾಜನಗರ ಮಳೆಯಾಶ್ರಿತ ಪ್ರದೇಶ. ಕಾವೇರಿ ನದಿ ಅಂಚಿನಲ್ಲಿ ಹರಿದರೂ ಸಮರ್ಪಕ ಬಳಕೆಗೆ ಬರುತ್ತಿಲ್ಲ. ಗುಂಡ್ಲು ನದಿ ಬತ್ತಿ ಹೋಗಿ ಗುಂಡ್ಲುಪೇಟೆ ಎಂಬ ಹೆಸರಿನಲ್ಲಷ್ಟೇ ಉಳಿದುಕೊಂಡಿದೆ. ಮೂಲೆಹೊಳೆ, ಮೋಯಾರ್ ನದಿ ಕಾಡಿಗಷ್ಟೇ ಸೀಮಿತವಾಗಿದೆ. ಸುವರ್ಣಾವತಿ, ಚಿಕ್ಕಹೊಳೆ, ಗುಂಡಾಲ್, ಹೂಗ್ಯಂ, ಮೀಣ್ಯಂ ಇನ್ನತರ ಜಲಾಶಯಗಳಷ್ಟೇ ಜೀವನಾಡಿಯಾಗಿವೆ. ದಾಹ ನೀಗಿಸಬಲ್ಲ ತುಂಬಬಲ್ಲ ಜೀವನದಿ ಮೂಲವಿಲ್ಲದೆ ಜಿಲ್ಲೆ ಕೆರೆ ತುಂಬಿಸುವ ಯೋಜನೆಯನ್ನೇ ಆಶ್ರಯಿಸಿದೆ. ಬೆಟ್ಟ, ಗುಡ್ಡ ಇಳಿಜಾರು ಪ್ರದೇಶ, ಕಲ್ಲು ಭೂಮಿಯ ನಡುವೆ ಅಂತರ್ಜಲ ಮಟ್ಟ ಏರಿಕೆ, ಇಳಿಕೆಯಾಗುತ್ತಲೇ ಇದೆ. ಕಳೆದ ಸಲ ಗುಂಡ್ಲುಪೇಟೆ ತಾಲೂಕನ್ನು ಅಂತರ್ಜಲ ಮಟ್ಟ ಕುಸಿದಿರುವ ತಾಲೂಕುಗಳ ಪಟ್ಟಿಗೆ ಸೇರಿಸಲಾಗಿತ್ತು. ಈ ತಾಲೂಕಿನಲ್ಲಿ ಕೊಳವೆ ಬಾವಿ ತೋಡಬೇಕೆಂದರೆ ಅನುಮತಿ ಪಡೆಯಬೇಕಾಗಿತ್ತು. ಭವಿಷ್ಯದಲ್ಲಿ ಈ ಸ್ಥಿತಿ ಹನೂರಿಗೆ ಬರಬಹುದಾದ ಆತಂಕ ಎದುರಾಗಿದ್ದು, ಏರುತ್ತಿರುವ ತಾಪಮಾನ ಅಂತರ್ಜಲ ಮಟ್ಟದ ಮೇಲೆ ಪರಿಣಾಮ ಬೀರುತ್ತಿದೆ.
ಹನೂರಿನಲ್ಲಿ ಕುಸಿದ ಅಂತರ್ಜಲ:
ಅಂತರ್ಜಲ ಇಲಾಖೆ ಜಿಲ್ಲೆಯ ಪ್ರತಿ ತಿಂಗಳು 59 ಕೊಳವೆ ಬಾವಿಗಳ ಅಧ್ಯಯನ ನಡೆಸಿ ಜಲದಮಟ್ಟವನ್ನು ದಾಖಲಿಸುತ್ತಿದೆ. ಈ ಕೊಳವೆ ಬಾವಿಗಳ ನೀರನ್ನು ಬೇರೆ ಕಾರಣಕ್ಕೆ ಬಳಕೆ ಮಾಡುವುದಿಲ್ಲ. ಅಂತರ್ಜಲದ ಮಟ್ಟ ಅಳತೆ ಮಾಡುವುದಕ್ಕಾಗಿಯೇ ಮೀಸಲು ಇಡಲಾಗಿದೆ. ಅಲ್ಲದೇ ಡಿಜಿಟಲ್ ಮಾದರಿಯಲ್ಲೂ ಅಂತರ್ಜಲದ ಮಟ್ಟವನ್ನು ದಾಖಲಿಸುತ್ತಿದೆ. ಈ ರೀತಿ ದಾಖಲಿಸಿದ 2024 ಮತ್ತು 2025ರ ಅಂತರ್ಜಲ ಮಟ್ಟದ ಅಂಕಿ-ಅಂಶಗಳ ವ್ಯತ್ಯಾಸದ ಮಾಹಿತಿ ಪ್ರಕಾರ, ಚಾಮರಾಜನಗರ ತಾಲೂಕಿನಲ್ಲಿ ಶೇ.0.11, ಗುಂಡ್ಲುಪೇಟೆ ತಾಲೂಕಿನಲ್ಲಿ ಶೇ.1.77, ಕೊಳ್ಳೇಗಾಲ ತಾಲೂಕಿನಲ್ಲಿ ಶೇ.0.96, ಯಳಂದೂರಿನಲ್ಲಿ ಶೇ.1.27ರಷ್ಟು ಅಂತರ್ಜಲ ಮಟ್ಟ ಏರಿಕೆ ಕಂಡಿದೆ. ಆದರೆ ಬೆಟ್ಟಗುಡ್ಡಗಳಿಂದ ಕೂಡಿರುವ ಹನೂರು ತಾಲೂಕಿನಲ್ಲಿ ಅಂರ್ತಜಲ ಮಟ್ಟ ಶೇ.3.73ರಷ್ಟು ಕಡಿಮೆಯಾಗಿದೆ. ಇನ್ನು 2026ರ ಜನವರಿ ಮತ್ತು ೆಬ್ರವರಿ ತಿಂಗಳ ಅಂರ್ತಜಲ ಮಟ್ಟದ ವ್ಯತ್ಯಾಸ ಗಮನಿಸಿದರೆ, ಚಾಮರಾಜನಗರ- ಶೇ.3.90, ಗುಂಡ್ಲುಪೇಟೆ- ಶೇ.1.99, ಕೊಳ್ಳೇಗಾಲ-ಶೇ.0.17, ಹನೂರು-ಶೇ.1.36, ಯಳಂದೂರು-ಶೇ.0.72ರಷ್ಟು ಜಲಮಟ್ಟ ಕುಸಿದಿದೆ.
ಕುಡಿಯುವ ನೀರಿನ ಸಮಸ್ಯೆ:
ಬೇಸಿಗೆಯ ಹೊಡೆತ ಅಂತರ್ಜಲ ಮಟ್ಟದ ಮೇಲೆ ಪರಿಣಾಮ ಬೀರುತ್ತಿರುವುದರಿಂದ ಜಿಲ್ಲೆಯ ಪ್ರಸ್ತುತ 47 ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಇರುವುದನ್ನು ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆ ಗುರುತಿಸಿದೆ. ಅಂತರ್ಜಲ ಮಟ್ಟ ಇಳಿಕೆಯಾಗದ ಚಾಮರಾಜನಗರ, ಗುಂಡ್ಲುಪೇಟೆ, ಕೊಳ್ಳೇಗಾಲ ತಾಲೂಕುಗಳ ಹಳ್ಳಿಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಇಲ್ಲ ಎಂದು ಇಲಾಖೆ ತಿಳಿಸಿದೆ. ಆದರೆ ಯಳಂದೂರು ತಾಲೂಕಿನ 2 ಗ್ರಾಮಗಳಲ್ಲಿ ಸಮಸ್ಯೆ ಇದೆ. ಹನೂರು ತಾಲೂಕಿನಲ್ಲಂತೂ ಬರೋಬ್ಬರಿ 45 ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಇರುವುದು ಕಂಡುಬಂದಿದೆ.
81 ಗ್ರಾಮಗಳಿಗೆ ಭವಿಷ್ಯದಲ್ಲಿ ಆತಂಕ:
ಜಿಲ್ಲೆಯಲ್ಲಿ ಮುಂಬರುವ ತಿಂಗಳಲ್ಲಿ 81 ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಉಂಟಾಗಬಹುದು ಎಂದು ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆ ಅಂದಾಜಿಸಿದೆ. ಚಾಮರಾಜನಗರ ತಾಲೂಕಿನಲ್ಲಿ 38, ಹನೂರು ತಾಲೂಕಿನಲ್ಲಿ 21, ಯಳಂದೂರು ತಾಲೂಕಿನಲ್ಲಿ 11, ಗುಂಡ್ಲುಪೇಟೆ ತಾಲೂಕಿನಲ್ಲಿ 7, ಕೊಳ್ಳೇಗಾಲ ತಾಲೂಕಿನಲ್ಲಿ 4 ಗ್ರಾಮಗಳಲ್ಲಿ ಭವಿಷ್ಯದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಉಂಟಾಗಬಹುದು ಗುರುತಿಸಲಾಗಿದೆ.
ಬೋರ್‌ವೆಲ್, ಟ್ಯಾಂಕರ್ ನೀರು:
ಕುಡಿಯುವ ನೀರಿನ ಸಮಸ್ಯೆ ಉಂಟಾಗಿರುವ ಗ್ರಾಮಗಳಿಗೆ ಖಾಸಗಿ ಬೋರ್‌ವೆಲ್ ಮತ್ತು ಟ್ಯಾಂಕರ್ ಮೂಲಕ ನೀರನ್ನು ಪೂರೈಕೆ ಮಾಡಲಾಗುತ್ತಿದೆ. ದೊಡ್ಡಲಾತ್ತೂರು, ಕೌದಳ್ಳಿ, ರಾಮಾಪುರ ಗ್ರಾಮ ಪಂಚಾಯಿತಿಗಳ ಹಳ್ಳಿಗಳಿಗೆ ಖಾಸಗಿ ಬೋರ್‌ವೆಲ್‌ನಲ್ಲಿ ನೀರು ಸರಬರಾಜು ಮಾಡಲಾಗಿದೆ. ಕೌದಳ್ಳಿಯ ಪೀಟರ್ಸ್ ಕಾಲನಿ, ಮಾರ್ಟಳ್ಳಿಯ ಗೋಡೆಸ್ಟ್ ನಗರ ಪ್ರಾಥಮಿಕ ಶಾಲೆ, ಹುತ್ತೂರಿನ ಸೊಪ್ಪಿನಗುಡ್ಡೆ, ಮಸಿಯಾಬೋವಿದೊಡ್ಡಿ, ಶೆಟ್ಟಳ್ಳಿಯ ಚೆನ್ನೂರು ಗ್ರಾಮಗಳಿಗೆ ಟ್ಯಾಂಕರ್‌ನಲ್ಲಿ ನೀರು ಪೂರೈಸಲಾಗಿದೆ. ಆದರೂ ಕೂಡ ಹಲವು ಗ್ರಾಮಗಳಲ್ಲಿ ಕುಡಿಯುವ ನೀರಿಗೆ ಹಾಹಾಕಾರ ಎದುರಾಗಿದೆ. ಬೇಸಿಗೆ ಹೆಚ್ಚಾದಂತೆ ನೀರಿನ ಬವಣೆಯೂ ಹೆಚ್ಚಾಗಲಿದೆ.
ಖಾಸಗಿ ಬೋರ್‌ವೆಲ್‌ಗಳ ಗುರುತು:
ಹನೂರು ತಾಲೂಕಿನಲ್ಲಿ ನೀರಿಗೆ ಸಮಸ್ಯೆ ಇರುವ ಹಿನ್ನೆಲೆಯಲ್ಲಿ ಖಾಸಗಿ ಬೋರ್‌ವೆಲ್‌ಗಳ ಮಾಲೀಕರ ಬಳಿ ಸಾರ್ವಜನಿಕರಿಗೂ ನೀರು ಸರಬರಾಜು ಮಾಡಲು ಕೇಳಿರುವುದಕ್ಕೆ ಒಪ್ಪಿಗೆ ಸಿಕ್ಕಿದೆ. ಈ ಹಿನ್ನೆಲೆಯಲ್ಲಿ ಅಜ್ಜೀಪುರ, ಬೈಲೂರು, ಬಂಡಳ್ಳಿ, ಚಿಕ್ಕಮಾಲಾಪುರ, ದಿನ್ನಳ್ಳಿ, ದೊಡ್ಡಲತ್ತೂರು, ಎಲ್ಲೇಮಾಳ, ಗೋನಾಥಂ, ಹೂಗ್ಯಂ, ಹುತ್ತೂರು, ಕುರಟ್ಟಿಹೊಸೂರು, ಕೌದಳ್ಳಿ, ಲೊಕ್ಕನಹಳ್ಳಿ, ಮಾರ್ಟಳ್ಳಿ, ಮಣಗಳ್ಳಿ, ಮಂಗಲ, ಮೀಣ್ಯಂ, ಪಿ.ಜಿ.ಪಾಳ್ಯ, ಪೊನ್ನಾಚಿ, ರಾಮಾಪುರ, ಶಾಗ್ಯ, ಶೆಟ್ಟಳ್ಳಿ, ಸೂಳೇರಿಪಾಳ್ಯ ಗ್ರಾಮಗಳ ಬೋರ್‌ವೆಲ್ ಮಾಲೀಕರು ಸಾರ್ವಜನಿಕರಿಗೂ ನೀರು ಕೊಡಲು ಉದಾರತೆ ತೋರಿದ್ದಾರೆ.
ಅಂತರ್ಜಲ ಕುಸಿತಕ್ಕೆ ಕಾರಣಗಳೇನು?
ಬಿದ್ದ ಮಳೆ ನೀರು ಮರುಪೂರಣವಾಗದೆ ಇರುವುದು, ಮಳೆ ಪ್ರಮಾಣ ಕಡಿಮೆಯಾಗುವುದು, ನೀರಾವರಿ ಬೆಳೆಗಳನ್ನೇ ಬೆಳೆಯುವುದು, ವ್ಯರ್ಥವಾಗಿ ನೀರು ಪೋಲು ಮಾಡುವುದು, ಹೆಚ್ಚು ಕೊಳವೆ ಬಾವಿಗಳನ್ನು ಒಂದೇ ಕಡೆ ಕೊರೆಸುವುದೂ ಸೇರಿದಂತೆ ವಿವಿಧ ಕಾರಣಗಳಿಂದ ಅಂತರ್ಜಲದ ಮಟ್ಟ ಕುಸಿಯುತ್ತಿದೆ. ಕೃಷಿಯಲ್ಲಿ ಹನಿ ನೀರಾವರಿ ಅಳವಡಿಕೆ, ಮಳೆ ಕೊಯ್ಲು ವಿಧಾನ, ನೀರನ ಲಭ್ಯತೆ ಆಧಾರದ ಮೇಲೆ ಬೆಳೆಗಳನ್ನು ಆಯ್ಕೆ ಮಾಡುವ ವಿಧಾನಗಳಿಂದ ಅಂತರ್ಜಲ ಸಮರ್ಪಕ ಬಳಕೆ ಜಲಮಟ್ಟವನ್ನು ಕಾಪಾಡುತ್ತದೆ.
"

ಮಳೆ ಕಡಿಮೆ, ಅಂತರ್ಜಲದ ಅತಿಯಾದ ಬಳಕೆಯ ಪ್ರಮಾಣದಿಂದ ಜಲದಮಟ್ಟ ಕಡಿಯೆಯಾಗುತ್ತದೆ. ಹನೂರು ತಾಲೂಕಿನ ಭೂಭಾಗ ಶಿಲಾಪದರಗಳಿಂದ ಕೂಡಿವೆ. ಇದರಿಂದ ಅಂತರ್ಜಲ ಮರುಪೂರಣ ಪ್ರಮಾಣ ಕಡಿಮೆಯಾಗುತ್ತದೆ. ಅರಣ್ಯ ಪ್ರದೇಶದ ಬೆಟ್ಟ ಗುಡ್ಡಗಳ ಇಳಿಜಾರು ಪ್ರದೇಶದಲ್ಲಿ ಬಿದ್ದ ಮಳೆ ನೀರು ಇಂಗದೆ ಹರಿದು ಹೋಗುತ್ತದೆ. ಮಳೆಯಾದಾಗ ಕೆರೆ, ಕಟ್ಟೆಗಳು ಸಮರ್ಪಕವಾಗಿ ತುಂಬುವುದಿಲ್ಲ. ಆಗ ಅಂತರ್ಜಲ ಮಟ್ಟ ಕ್ಷೀಣಿಸುತ್ತದೆ.

"

ಜಿಲ್ಲೆಯಲ್ಲಿ ಕುಡಿಯುವ ನೀರಿನ ಸಮಸ್ಯೆ ಬಗೆಹರಿಸಲು ಸೌಲಭ್ಯ ಕಲ್ಪಿಸುವುದಕ್ಕಾಗಿ ರಾಜ್ಯ ಸರ್ಕಾರಕ್ಕೆ 15.8 ಕೋಟಿ ರೂ. ಅನುದಾನ ಕೋರಿ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಸದ್ಯಕ್ಕೆ ಸಮಸ್ಯೆ ಹೆಚ್ಚಾಗಿರುವ ಹನೂರು ತಾಲೂಕಿಗೆ ಶಾಸಕ ಎಂ.ಆರ್.ಮಂಜುನಾಥ್ ಅವರ ಕೋರಿಕೆಗೆ ಜಿಲ್ಲಾಧಿಕಾರಿ ಶ್ರೀರೂಪಾ ಅವರು ಡಿಎಂಎ್ ಅನುದಾನದಲ್ಲಿ 70 ಲಕ್ಷ ರೂ. ಅನುದಾನ ಸಿಗುತ್ತಿದೆ.

"

ಮಹದೇಶ್ವರ ಬೆಟ್ಟದ ತೊಳಸಿಗೆರೆ ಗ್ರಾಮದಲ್ಲಿ ನಲ್ಲಿ ನೀರಿನ ಸೌಲಭ್ಯವಿಲ್ಲ. ಬೋರ್‌ವೆಲ್ ಇದ್ದು, ನೀರಿನ ಪ್ರಮಾಣ ಕಡಿಮೆಯಾಗಿದೆ. ಇದರಲ್ಲೇ ಸರಿದೂಗಿಸುತ್ತಿದ್ದೇವೆ. ಸಮರ್ಪಕವಾಗಿ ನೀರಿನ ಸೌಲಭ್ಯ ಕಲ್ಪಿಸಿಕೊಟ್ಟರೆ ಅನುಕೂಲವಾಗಿದೆ.

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net