ಕಾಡೊಲದ ಮಾರಮ್ಮನ ಮಹಿಮೆ ಅಪಾರ

ಹನೂರು ತಾಲೂಕಿನ ಮಲೆ ಮಹದೇಶ್ವರ ಬೆಟ್ಟದ ಕಾಡೊಲ ಗ್ರಾಮದಲ್ಲಿರುವ ಮಕ್ಕಳ ಮಾರಮ್ಮ ದೇವಿ ಮೇಲೆ ಸುತ್ತಮುತ್ತಲಿನ ಹಳ್ಳಿಗಳ ಜನರು ಅಚಲವಾದ ಭಕ್ತಿ ಇಟ್ಟುಕೊಂಡಿದ್ದಾರೆ. ಊರಿನೊಳಗಿರುವ ದೇಗುಲದಲ್ಲಿ ಕೈಮುಗಿದು, ಪೂಜೆ ಸಲ್ಲಿಸಿ, ಅರಿಶಿಣ-ಕುಂಕುಮದ ಅಭಿಷೇಕ ಮಾಡಿ ಮುಂದಿನ ಕೆಲಸಗಳನ್ನು ಕೈಗೊಂಡರೆ ಕಾರ್ಯ ಸಿದ್ಧಿಯಾಗುತ್ತದೆ ಎನ್ನುವ ನಂಬಿಕೆ ಅಚಲವಾಗಿ ಬೇರೂರಿದೆ. ಇಲ್ಲಿ ದೇವಸ್ಥಾನ ಸೃಷ್ಟಿಯಾಗುವುದರ ಹಿಂದೆ ದೊಡ್ಡ ಪವಾಡವೇ ನಡೆದಿರುವುದು ಇತಿಹಾಸದಲ್ಲಿ ಜನನಜನಿತವಾಗಿದೆ.

ಮೂರ್ತಿಯ ಆಕಾರದಲ್ಲಿ ದೈವ ದರ್ಶನ: ಕಾಡೊಲ ಗ್ರಾಮದ ಮಾರಮ್ಮ ಉದ್ಭವಿಸಿದರ ಹಿಂದೆ ದೈವಿಕ ಕಥನದ ಇತಿಹಾಸವಿದೆ. ಸುಮಾರು 18 ವರ್ಷಗಳ ಹಿಂದೆ ಕಾಡೊಲ ಗ್ರಾಮದ ಪಕ್ಕದ ಕೀರನಹೊಲದಲ್ಲಿ ಒಬ್ಬರ ಮೈ ಮೇಲೆ ದೇವಿ ಬಂದಿದ್ದಳು. ಕಾಡೊಲ ಗ್ರಾಮದ ಮರದ ಬಿಡದ ಭೂಮಿಯಲ್ಲಿ ದೇವಿ ಅಡಗಿರುವುದಾಗಿ ತಿಳಿಸಿದಳು. ಗ್ರಾಮಸ್ಥರು ಮರದ ಬುಡದಲ್ಲಿ ಭೂಮಿ ಅಗೆದು ನೋಡಿದಾಗ ಅಚ್ಚರಿ ಎಂಬಂತೆ ಕೈ-ಕಾಲು, ಮುಖದ ಆಕಾರವಿರುವ ದೇವರ ಕಲ್ಲು ಸಿಕ್ಕಿದೆ. ಆದರೆ ಇದನ್ನು ದೇವರಲ್ಲ ಎಂದು ಅನುಮಾನಿಸಿದವರು ಕೆಲವೇ ದಿನಗಳಲ್ಲಿ ಅನಾರೋಗ್ಯಕ್ಕೆ ತುತ್ತಾದರು. ಇದಕ್ಕೆ ಸಾಕ್ಷಿಯಾದ ಗ್ರಾಮಸ್ಥರು ದೇವರ ಮೇಲಿನ ನಂಬಿಕೆಯನ್ನು ಬೆಳೆಸಿಕೊಂಡರು. ದೇವಿಯನ್ನು ನಂಬಿ ಪೂಜೆ ಆರಂಭಿಸಿದ ಭಕ್ತರು ಗುಡಿಯನ್ನು ಕಟ್ಟಿ ಆರಾಧನೆಯನ್ನು ಮುಂದುವರೆಸಿದರು. ಕಾಡೊಲ ಗ್ರಾಮದ ಅಕ್ಕ-ಪಕ್ಕದ 18 ಹಳ್ಳಿಗಳ ಭಕ್ತರು ದೇಗುಲಕ್ಕೆ ಬರಲು ಶುರು ಮಾಡಿದರು. ದಿನ ಕಳೆದಂತೆ ಮಾರಮ್ಮನ ಸನ್ನಿದಿ ಕಾಡೊಲದ ಗ್ರಾಮದೇವಿಯ ದೇಗುಲವಾಗಿ ಪ್ರಸಿದ್ಧಿ ಪಡೆದುಕೊಂಡಿತು.

ಸಿಡುಬು ವಾಸಿ ಮಾಡುವ ಮಾರಮ್ಮ: ಕಾಡೊಲ ಗ್ರಾಮದ ಮಾರಮ್ಮ ದೇವಿಯನ್ನು ಮಕ್ಕಳ ಮಾರಮ್ಮ ಎಂದು ಕರೆಯುತ್ತಾರೆ. ಏಕೆಂದರೆ ಮಾರಮ್ಮನಿಗೆ ಪೂಜೆ ಮಾಡಿದರೆ ಮಕ್ಕಳಿಗೆ ಬರುವ ಕಾಯಿಲೆಗಳು ವಾಸಿಯಾಗುತ್ತವೆ ಎನ್ನುವ ನಂಬಿಕೆ ಮನೆ ಮಾಡಿದೆ. ಮಕ್ಕಳಲ್ಲಿ ಸಾಮಾನ್ಯವಾಗಿ ಕಾಣಿಸಿಕೊಳ್ಳುವ ಸಿಡುಬು ಬಂದಾಗ ಮಾರಮ್ಮನಿಗೆ ಪೂಜೆ ಮಾಡಲಾಗುತ್ತದೆ. ದೇವಿಯ ಮೂರ್ತಿಗೆ ತಂಪು ತೋರುವುದು, ಎಳನೀರು, ಬೇವಿನ ಸೊಪ್ಪು ಕಟ್ಟು ಪೂಜೆ ಸಲ್ಲಿಸುವುದರಿಂದ ಸಿಡುಬು ವಾಸಿಯಾಗುತ್ತದೆ ಎಂದು ಜನರು ನಂಬಿದ್ದಾರೆ. ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಯಾವುದೇ ಮಕ್ಕಳಿಗೆ ಸಿಡುಬು ಬಂದರೆ ಇಲ್ಲಿಗೆ ಆಗಮಿಸಿ ಪೂಜೆ ಸಲ್ಲಿಸಿದರೆ ಕಾಯಿಲೆ ವಾಸಿಯಾಗುತ್ತದೆ ಎಂಬ ಧೈರ್ಯ ಮೂಡುತ್ತದೆ.

ಪ್ರತಿ ವರ್ಷ ಗ್ರಾಮದಲ್ಲಿ ಮಾರಮ್ಮ ದೇವಿಯ ಹಬ್ಬ ಜೋರಾಗಿ ನಡೆಯುತ್ತದೆ. ಅಕ್ಕ-ಪಕ್ಕದ 18 ಹಳ್ಳಿಗಳ ಜನರು ದೇಗುಲಕ್ಕೆ ಬಂದು ಪೂಜೆ ಸಲ್ಲಿಸುತ್ತಾರೆ. ಪ್ರಸ್ತುತ ಇದೇ ತಿಂಗಳು ಜೂ.9ರಿಂದ 13ವರೆಗೆ ಮಾರಮ್ಮನ ಹಬ್ಬ ಹಮ್ಮಿಕೊಳ್ಳಲಾಗಿದೆ. ಕಾಡಿನ ಮಧ್ಯೆ ಇರುವ ದೇಗುಲದ ದೈವಿಕ ರೂಪ ಗಮನ ಸೆಳೆಯುತ್ತಿದೆ. ದೇವಸ್ಥಾನದ ಮುಂಭಾಗ ವಿಶೇಷವಾದ ಚಪ್ಪರವನ್ನು ಹಾಕಲಾಗಿದೆ. ಶುಕ್ರವಾರ ಮಹಿಳಾ ಭಕ್ತರು ತಂಬಿಟ್ಟು ಮತ್ತು ಆರತಿ ಬೆಳಗಿ ವಿಶೇಷ ಪೂಜೆ ಸಲ್ಲಿಸಲಿದ್ದಾರೆ. ಈ ವಿಶೇಷ ದಿನಕ್ಕಾಗಿ ಮಹಿಳೆಯರು ಪೂರ್ವ ತಯಾರಿಯಲ್ಲಿ ತೊಡಗಿಕೊಳ್ಳುತ್ತಾರೆ. ಇದು ಹಬ್ಬದ ಸಡಗರವನ್ನು ಹೆಚ್ಚು ಮಾಡುತ್ತದೆ.

ವರ್ಷಕ್ಕೆ ಒಮ್ಮೆ ನಡೆಯುವ ಹಬ್ಬದ ಪ್ರಯುಕ್ತ ಕಾಡೊಲ ಗ್ರಾಮಸ್ಥರು ವಿಭಿನ್ನವಾದ ಆಚರಣೆಯಲ್ಲಿ ತೊಡಗಿಕೊಳ್ಳುತ್ತಾರೆ. ಶುಕ್ರವಾರ ತಂಬಿಟ್ಟಿನ ಆರತಿ ಮಾಡಿದ ಬಳಿಕ, ಶನಿವಾರ ಕಾಡುಜನರ ವೇಷಧರಿಸುತ್ತಾರೆ. ಮೈಮೇಲೆ ಸೊಪ್ಪು ಕಟ್ಟಿಕೊಂಡು, ಮುಖಕ್ಕೆ ಮಸಿ ಬಳಿದುಕೊಂಡು ಕಾನನದ ವಾಸಿಗಳ ರೂಪ ತಾಳುತ್ತಾರೆ. ಮನೆಗಳಲ್ಲಿರುವ ಒನಕೆಯನ್ನು ದೇವಸ್ಥಾನಕ್ಕೆ ತಂದು ಪೂಜೆ ಸಲ್ಲಿಸುತ್ತಾರೆ. ದೆವ್ವ, ಪೀಡೆಗಳ ಕಾಟದಿಂದ ಮುಕ್ತಿ ದೊರೆಯುವ ನಂಬಿಕೆಯೊಂದಿಗೆ ಕೆಲವು ಆಚರಣೆಗಳು ರೂಢಿಯಲ್ಲಿದ್ದು, ಕಾಡೊಲ ಗ್ರಾಮ ದೇವಿಗೆ ಪೂಜೆ ಸಲ್ಲಿಕೆಯಾಗುತ್ತದೆ.

ಮಲೆ ಮಹದೇಶ್ವರ ಬೆಟ್ಟದ ತಪ್ಪಲಿನಲ್ಲಿರುವ ಗ್ರಾಮಗಳ ಜನರಿಗೆ ಮಾದಪ್ಪ ಮನೆ ದೇವರಾಗಿದ್ದಾನೆ. ದೇವರ ಗರ್ಭಗುಡಿಯಲ್ಲಿ ಸ್ವಾಮಿಯನ್ನು ಪೂಜಿಸುವ ಬೇಡಗಂಪಣರು ವಿಭಿನ್ನ ಆಚರಣೆಗಳು, ಸಂಪ್ರದಾಯಗಳನ್ನು ಹೊಂದಿರುವ ಸಮುದಾಯ. ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಬಹುಪಾಲು ಇವರೇ ವಾಸ ಮಾಡುತ್ತಿದ್ದು, ಇವರಿಗೆ ಮಾದಪ್ಪನ ಮನೆ ದೇವರಾಗಿದ್ದು, ಸ್ವಾಮಿಯ ಪೂಜೆಯೊಂದಿಗೆ ಗ್ರಾಮ ದೇವಿಯ ಪೂಜೆಗೂ ಭಕ್ತಿ ಸಮರ್ಪಿಸುತ್ತಿದ್ದಾರೆ.

ಕಾಡೊಲ ಗ್ರಾಮದ ಮಾರಮ್ಮ ದೇವಿ ನೆಲೆ ನಿಂತು ಸುಮಾರು 18 ವರ್ಷಗಳಾಗಿವೆ. ಮಕ್ಕಳಿಗೆ ಸಿಡುಬು ಬಂದರೆ ಮಾರಮ್ಮನಿಗೆ ಪೂಜೆ ಸಲ್ಲಿಸುವುದು ವಾಡಿಕೆಯಾಗಿದೆ. ಹಾಗಾಗಿ ಈ ದ

ದೇವಿಯನ್ನು ಮಕ್ಕಳ ಮಾರಮ್ಮ ಎಂದೂ ಕರೆಯುತ್ತಾರೆ. ಸುತ್ತಮುತ್ತಲಿನ 18 ಹಳ್ಳಿಗಳ ಭಕ್ತರು ಮಾರಮ್ಮನ ಪೂಜೆಯನ್ನು ಶ್ರದ್ಧಾಭಕ್ತಿಯಿಂದ ಮಾಡಿಕೊಂಡು ಬರುತ್ತಿದ್ದಾರೆ.

ಕಾಡೊಲ ಗ್ರಾಮದ ಮಾರಮ್ಮನ ಹಬ್ಬ ಪ್ರಸ್ತುತ ಭಕ್ತಿಪೂರ್ವಕವಾಗಿ ನಡೆಯುತ್ತಿದೆ. ಜೂ.9ರಿಂದ 13ವರೆಗೆ ನಡೆಯುತ್ತಿರುವ ಹಬ್ಬದಲ್ಲಿ ಪ್ರತಿದಿನ ವಿಶೇಷ ಪೂಜೆಗಳು ನಡೆಯುತ್ತಿವೆ. ವಿಶೇಷ ಮತ್ತು ವಿಭಿನ್ನ ಆಚರಣೆಗಳ ಮೂಲಕ ದೇವಿಗೆ ಭಕ್ತಿ ಸಮರ್ಪಿಸುತ್ತೇವೆ.