ಕೃಷಿ ಉತ್ಪನ್ನಗಳಿಲ್ಲದೆ ಭಣಗುಟ್ಟಿದ ತೆರಕಣಾಂಬಿ ಸಂತೆ

ರಾಜ್ಯದಲ್ಲಿಯೇ ದೊಡ್ಡ ಸಂತೆ ಎಂದು ಹೆಸರಾದ ತಾಲೂಕಿನ ತೆರಕಣಾಂಬಿ ಸಂತೆಯಲ್ಲಿ ಪ್ರತಿ ಗುರುವಾರ ಕೃಷಿ ಉತ್ಪನ್ನಗಳನ್ನು ಖರೀದಿಸಲು ಆಂಧ್ರಪ್ರದೇಶ, ಕೇರಳ ಹಾಗೂ ತಮಿಳುನಾಡಿನಿಂದಲೂ ವರ್ತಕರು ಆಗಮಿಸುತ್ತಾರೆ. ಆದರೆ ಈ ಬಾರಿ ಮಳೆಬೀಳದ ಕಾರಣದಿಂದ ಸುಗ್ಗಿಯ ಕಾಲದಲ್ಲಿಯೂ ಉತ್ಪನ್ನಗಳು ಮಾರಾಟಕ್ಕೆ ಬಾರದ ಹಿನ್ನೆಲೆಯಲ್ಲಿ ಇಡೀ ಸಂತೆಯೇ ಭಣಗುಡುತ್ತಿದೆ.

ಈ ಬಾರಿ ತಾಲೂಕಿನಲ್ಲಿ 9940 ಹೆಕ್ಟೇರ್ ಪ್ರದೇಶದಲ್ಲಿ ಸೂರ್ಯಕಾಂತಿ, 376 ಹೆಕ್ಟೇರ್‌ನಲ್ಲಿ ಮುಸುಕಿನ ಜೋಳ, 5500 ಹೆಕ್ಟೇರ್ ಭೂಮಿಯಲ್ಲಿ ಸಣ್ಣ ಜೋಳ, 435 ಹೆಕ್ಟೇರ್‌ನಲ್ಲಿ ಹತ್ತಿ, 745 ಹೆಕ್ಟೇರ್‌ನಲ್ಲಿ ನೆಲಗಡಲೆ ಬಿತ್ತನೆ ಮಾಡಲಾಗಿತ್ತು. ಆದರೆ ಈ ಬಾರಿ ಭಿತ್ತನೆ ನಂತರ ಪೂರ್ವ ಮುಂಗಾರು ಮಳೆ ಕೈಕೊಟ್ಟ ಪರಿಣಾಮ ಎರಡೆರಡು ಬಾರಿ ಬಿತ್ತನೆ ಮಾಡಿದರೂ ನಂತರ ಮಳೆ ಬೀಳದೆ ಎಲ್ಲ ಫಸಲುಗಳು ನಾಶವಾಗಿವೆ.

ತಾಲೂಕಿನಲ್ಲಿ ವಾಡಿಕೆ ಮಳೆ 393 ಮಿ.ಮೀ. ಈ ಬಾರಿ ಕೇವಲ 246 ಮಿ.ಮೀ. ಮಳೆ ಆಗಿದೆ. ಇದರಿಂದ ತಾಲೂಕಿನಲ್ಲಿ ದೊಡ್ಡ ಪ್ರಮಾಣದಲ್ಲಿ ಬಿತ್ತನೆ ಮಾಡಿದ್ದ ಸೂರ್ಯಕಾಂತಿ, ಮುಸುಕಿನ ಜೋಳ ಹಾಗೂ ಸಣ್ಣ ಜೋಳ ಸೇರಿದಂತೆ ಎಲ್ಲ ಬೆಳೆಗಳೂ ಸಂಪೂರ್ಣ ನಾಶವಾಗಿವೆ. ಅಲ್ಲಲ್ಲಿ ನೀರಾವರಿ ಜಮೀನುಗಳಲ್ಲಿ ಬೆಳೆದಿದ್ದ ಸೂರ್ಯಕಾಂತಿ ಮತ್ತು ಜೋಳ ಮಾತ್ರ ಸಂತೆಗೆ ಬರುತ್ತಿದೆ. ಪರಿಣಾಮವಾಗಿ ಪ್ರತಿ ವರ್ಷವೂ ಸುಗ್ಗಿಯ ಸಂದರ್ಭದಲ್ಲಿ ಹೊಸ ಪದಾರ್ಥಗಳ ಮಾರಾಟ ಭರಾಟೆ ಜೋರಾಗುತ್ತಿದ್ದ ಸಂತೆಯಲ್ಲಿ ಅಲ್ಲಲ್ಲಿ ಕೆಲವೇ ಮೂಟೆಗಳಷ್ಟು ಕೃಷಿ ಉತ್ಪನ್ನಗಳು ಕಂಡುಬರುತ್ತಿದ್ದು ತುಂಬಿರುತ್ತಿದ್ದ ಸಂತೆ ಬಿಕೋ ಎನ್ನುತ್ತಿತ್ತು.

ಈ ಬಾರಿ ಬಿತ್ತನೆ ಮಾಡಿದ್ದ ಎಲ್ಲ ಫಸಲುಗಳು ನಾಶವಾಗಿವೆ. ಪ್ರತಿ ವರ್ಷವೂ ಸಂತೆಗೆ ಸಾವಿರಾರು ಕ್ವಿಂಟಾಲ್‌ನಷ್ಟು ಬರುತ್ತಿದ್ದ ಜೋಳ ಕೆಲವೇ ಮೂಟೆಗಳಿಗೆ ಇಳಿದಿದೆ. ಇದರಿಂದ ರೈತರು ಮುಂದಿನ ಬಾರಿಗೆ ಬಿತ್ತನೆ ಮಾಡಲು ಜೋಳದ ಖರೀದಿಗೆ ಮುಗಿಬಿದ್ದಿರುವ ಪರಿಣಾಮ ಕ್ವಿಂಟಾಲ್‌ಗೆ ಗರಿಷ್ಠ 2 ಸಾವಿರ ರೂ.ಗೆ ಮಾರಾಟವಾಗುತ್ತಿದ್ದ ಸಣ್ಣಜೋಳ ಕಳೆದ ಎರಡು ವಾರಗಳಿಂದಲೂ 6 ಸಾವಿರ ರೂ.ವರೆಗೂ ಮಾರಾಟವಾಗುತ್ತಿದೆ.

ಬೇಗೂರು ಹಾಗೂ ನೆರೆಯ ಎಚ್.ಡಿ.ಕೋಟೆ ತಾಲೂಕಿನಲ್ಲಿ ಹೆಚ್ಚಿನ ಪ್ರಮಾಣದ ಹತ್ತಿ ಬೆಳೆಯಲಾಗುತ್ತಿರುವ ಹಿನ್ನೆಲೆಯಲ್ಲಿ ಬೇಗೂರಿನಲ್ಲಿ ಸುಸಜ್ಜಿತ ಹತ್ತಿಮಾರುಕಟ್ಟೆ ತೆರೆಯಲಾಗಿದೆ. ಆದರೆ ಈ ವರ್ಷ ಮಳೆಬೀಳದ ಪರಿಣಾಮ ಹತ್ತಿ ಬೆಳೆಯೂ ಸಂಪೂರ್ಣ ನಾಶವಾಗಿದ್ದರಿಂದ ಕೃಷಿ ಉತ್ಪನ್ನ ಮಾರುಕಟ್ಟೆಯಲ್ಲಿ ಈ ಬಾರಿ ಹತ್ತಿ ಮಾರುಕಟ್ಟೆ ಆರಂಭಿಸಲು ತೊಡಕಾಗಿದೆ.