ಭಕ್ತರ ಪಾಲಕ ಕಣಿವೆ ಹನುಮ

ಆಂಜನೇಯ ಸ್ವಾಮಿಯೇ ಮಗುವಿನ ರೂಪದಲ್ಲಿ ದರ್ಶನ ನೀಡಿದ ಸ್ಥಳವು ಧಾರ್ಮಿಕ ಶ್ರದ್ಧಾ ಕೇಂದ್ರವಾಗಿ ರೂಪುಗೊಂಡಿದೆ. ತನ್ನದೇ ಆದ ಹಿನ್ನೆಲೆಯಿಂದ ಪ್ರಖ್ಯಾತಿಯನ್ನೂ ಪಡೆದಿದೆ.

ಹನೂರು ತಾಲೂಕಿನ ಅಜ್ಜೀಪುರದ ಶ್ರೀ ಕಣಿವೆ ಆಂಜನೇಯಸ್ವಾಮಿಯನ್ನು ನಂಬಿದವರಿಗೆ ಕಷ್ಟ, ಕಾರ್ಪಣ್ಯಗಳು ದೂರವಾಗುತ್ತವೆ ಎಂಬ ನಂಬಿಕೆ ಢಾಳಾಗಿದೆ. ಬೆಟ್ಟ ಗುಡ್ಡಗಳಿಂದ ಕೂಡಿದ ಹನೂರಿಗೂ ರಾಮನ ಬಂಟ ಹುನುಮನಿಗೂ ವಿಶೇಷ ನಂಟಿದೆ. ರಾಮಾಯಣ ಕಾಲಘಟ್ಟದಲ್ಲಿ ಆಂಜನೇಯಸ್ವಾಮಿ ಈ ಭಾಗಕ್ಕೆ ಆಗಮಿಸಿ ಬೆಟ್ಟಗುಡ್ಡಗಳಲ್ಲಿ ಸಂಚಾರ ಮಾಡಿದ್ದ ಎನ್ನಲಾಗಿದೆ. ಇದಕ್ಕೆ ಹನೂರಿನ ಹಿಂದಿನ ಹೆಸರು ಹನುಮಪುರಿ ಎಂದಿತ್ತು ಎಂಬುದೇ ಸಾಕ್ಷಿಯಾಗಿದೆ.ಹನುಮನ ನೆಲೆಬೀಡಾದ ಹನೂರು ಪಟ್ಟಣ ಸೇರಿದಂತೆ ತಾಲೂಕಿನಲ್ಲಿ ಸಾವಿರಾರು ಕಪಿಗಳೂ ಇವೆ. ತಾಲೂಕಿನ ಅಜ್ಜೀಪುರ ಗ್ರಾಮ ಸಮೀಪದ ಕಾಡು ಪ್ರದೇಶದಲ್ಲಿರುವ ಕಣಿವೆ ಆಂಜನೇಯಸ್ವಾಮಿ ದೇಗುಲವು ಸಾವಿರಾರು ಭಕ್ತರನ್ನು ಹೊಂದಿದ್ದು, ಇತಿಹಾಸ ಮತ್ತು ಧಾರ್ಮಿಕ ಪರಂಪರೆಯ ಪ್ರತೀಕವಾಗಿದೆ.

ದೇಗುಲ ನಿರ್ಮಾಣದ ಹಿನ್ನೆಲೆ:

ಬೆಟ್ಟ ಗುಡ್ಡಗಳಿಂದ ಕೂಡಿದ್ದ, ಕಾಡು ಪ್ರಾಣಿಗಳ ವಾಸ ಸ್ಥಾನವಾಗಿರುವ ಅಜ್ಜೀಪುರ ಭಾಗಕ್ಕೆ ಆಂಜನೇಯಸ್ವಾಮಿ ಆಗಮಿಸಿದ್ದ. ಈ ವೇಳೆ ಇಳಿಜಾರು ಪ್ರದೇಶದಿಂದ ಕೂಡಿದ್ದ ಬಂಡೆಯನ್ನು ಹೊಂದಿರುವ ಗುಡ್ಡವನ್ನು ಕಂಡ. ಇಲ್ಲಿಯೇ ನೆಲೆಸಿ ಭಕ್ತರ ಇಷ್ಟಾರ್ಥಗಳನ್ನು ಪರಿಹರಿಸಬೇಕು ಎಂದು ನಿರ್ಧರಿಸಿದ.ಒಂದು ದಿನ ಆಂಜನೇಯಸ್ವಾಮಿ 3 ತಿಂಗಳ ಮಗುವಿನ ರೂಪ ತಳೆದು ದೊಡ್ಡ ಬಂಡೆಯ ಮೇಲೆ ಮಲಗಿದ್ದ. ಈ ವೇಳೆಗೆ ಯಾರೋ ಬರುತ್ತಿರುವ ಶಬ್ದ ಕೇಳಿ ಅಲ್ಲಿಯೇ ಕಲ್ಲಿನ ಮೂರ್ತಿಯಾಗಿ ನೆಲೆಗೊಂಡ. ಈ ವೇಳೆ ದೊಡ್ಡ ಬಂಡೆ ಸಿಡಿದು 2 ಕಡೆಗಳಿಗೆ ಚದುರಿತು. 2 ಬಂಡೆಯಲ್ಲೂ ಸ್ವಾಮಿಯ ಮೂರ್ತಿ ರೂಪುಗೊಂಡಿತು. ಕಣಿವೆ ಸೃಷ್ಠಿಯಾಯಿತು ಎನ್ನುತ್ತಾರೆ ಹಿರಿಯರು.

ಕಾಲಾನಂತರದಲ್ಲಿ ಅಜ್ಜಿಯೊಬ್ಬರು ಕಾಡು ಮೇಡುಗಳನ್ನು ಅಲೆಯುವ ಸಂದರ್ಭದಲ್ಲಿ ಈ ಭಾಗಕ್ಕೆ ಆಗಮಿಸಿದಾಗ ದೊಡ್ಡ ಬಂಡೆಯ ಮೇಲೆ ಹನುಮನ ಮೂರ್ತಿ ದರ್ಶನ ನೀಡಿತು. ಆಕೆ ದೇವರನ್ನು ಪೂಜಿಸಿ ಸುತ್ತಮುತ್ತಲ ಭಾಗದ ಜನರಿಗೆ ವಿಷಯ ತಿಳಿಸಿದಳು. ಕಣಿವೆಯನ್ನು ಹೊಂದಿದ್ದ ಪ್ರದೇಶದಲ್ಲಿ ಜನರು ದೇವರಿಗೆ ಪುಟ್ಟ ಗುಡಿಯನ್ನು ಕಟ್ಟಿಸಿದರು. ಹಾಗಾಗಿ ಇದು ಕಣಿವೆ ಆಂಜನೇಯಸ್ವಾಮಿ ದೇಗುಲ ಎಂದೇ ಹೆಸರಾಯಿತು. ನಂತರದಲ್ಲಿ ಗ್ರಾಮಸ್ಥರು ಹಾಗೂ ಭಕ್ತರ ನೆರವಿನಿಂದ ದೇಗುಲವನ್ನು ನಿರ್ಮಿಸಲಾಯಿತು.ಇನ್ನೊಂದು ಕಡೆ ಚದುರಿದ ಶಿಲೆಯು ಮಲೆಮಹದೇಶ್ವರ ಬೆಟ್ಟಕ್ಕೆ ತೆರಳುವ ಎಲ್ಲೇಮಾಳ ಮಾರ್ಗದಲ್ಲಿ ಬಿತ್ತು. ಆ ಸನ್ನಿಧಿಗೂ ಕಣಿವೆ ಆಂಜನೇಯಸ್ವಾಮಿ ಎಂಬ ಹೆಸರಿದೆ.

*

ಶ್ರಾವಣ ಮಾಸದಲ್ಲಿ ವಿಶೇಷ ಪೂಜೆ:

ಮೂರ್ತಿಯನ್ನು ಒಳಗೊಂಡ ಬಂಡೆಯ ಮೇಲೆ ನಿರ್ಮಿಸಿರುವ ಈ ದೇಗುಲದಲ್ಲಿ ಅಜ್ಜಿಯ ವಂಶಸ್ಥರೇ ಹಲವು ತಲೆಮಾರಿನಿಂದ ಅರ್ಚಕ ವೃತ್ತಿ ಮಾಡುತ್ತಿದ್ದಾರೆ. ದೇಗುಲದ ಮೇಲ್ಭಾಗದಲ್ಲಿ ಹನುಮ, ಶನೈಶ್ಚರ ಹಾಗೂ ವೆಂಕಟರಮಣ ಸ್ವಾಮಿ ಮೂರ್ತಿಯನ್ನು ಕೆತ್ತನೆ ಮಾಡಲಾಗಿದೆ. ಆಂಜನೇಯಸ್ವಾಮಿ ಪಾದ ಸ್ಪರ್ಶಿಸಿದ ಗುರುತು ಇದ್ದ ಸ್ಥಳದಲ್ಲಿ ಕಲ್ಲಿನ ಪಾದುಕೆಯನ್ನು ಇರಿಸಲಾಗಿದೆ. ದೇಗುಲದಲ್ಲಿ ಪ್ರತಿ ಶನಿವಾರ, ಅಮಾವಾಸ್ಯೆ, ಹುಣ್ಣಿಮೆ ಸೇರಿದಂತೆ ವಿಶೇಷ ಹಬ್ಬ, ಹರಿದಿನಗಳಂದು ಸಂಕಲ್ಪ ಸಹಿತ ಪೂಜೆಯನ್ನು ನೆರವೇರಿಸಲಾಗುತ್ತದೆ.

ಸಂಕ್ರಾಂತಿ ಹಬ್ಬದ ಹಿಂದಿನ ದಿನ ಇಲ್ಲಿ ಸಂಭ್ರಮದ ಪೂಜೆಯೊಂದಿಗೆ ಸಾವಿರಾರು ಭಕ್ತರಿಗೆ ಅನ್ನ ಸಂತರ್ಪಣೆಯನ್ನೂ ನಡೆಸಲಾಗುತ್ತದೆ. ಶ್ರಾವಣ ಮಾಸದ 4 ಶನಿವಾರಂದು ವಿವಿಧ ಅಭಿಷೇಕದ ಸೇವೆಯ ಜತೆಗೆ ಹನುಮನ ಮೂರ್ತಿಯನ್ನು ಬೆಣ್ಣೆಯಿಂದ ಅಲಂಕರಿಸಿ, ನೈವೇದ್ಯ ಅರ್ಪಿಸಿ ಆರಾಧಿಸಲಾಗುತ್ತದೆ. ಇಲ್ಲಿಗೆ ತಾಲೂಕಿನ ಜನರು ಸೇರದಂತೆ ಬೆಂಗಳೂರು, ಮೈಸೂರು ಹಾಗೂ ಇನ್ನಿತರೆ ಜಿಲ್ಲೆಯಿಂದಲೂ ಭಕ್ತರು ಆಗಮಿಸುತ್ತಾರೆ.

*

ಭಕ್ತರ ಆರಾಧ್ಯ ದೈವ : ಕಣಿವೆ ಹನುಮನನ್ನು ನಂಬಿದ ಭಕ್ತರು ನಾಡಿನಾದ್ಯಂತ ಇದ್ದಾರೆ. ಶ್ರದ್ಧಾ ಭಕ್ತಿಯಿಂದ ಸ್ವಾಮಿಯನ್ನು ಪೂಜಿಸಿದವರಿಗೆ ಆತ ಕೈ ಬಿಡುವುದಿಲ್ಲ ಎಂಬ ನಂಬಿಕೆ ಇದೆ. ಮನೆ, ಜಮೀನು ಸಮಸ್ಯೆ, ಮಾಟ ಮಂತ್ರಗಳ ದೋಷ ಹಾಗೂ ಇನ್ನಿತರೆ ತಡೆಗಳಿದ್ದರೆ ಅದನ್ನು ಹನುಮ ನಿವಾರಣೆ ಮಾಡುತ್ತಾನೆಂದು ಭಕ್ತರು ನಂಬಿದ್ದಾರೆ. ವಿವಾಹ, ಸಂತಾನ ಭಾಗ್ಯ ಪ್ರಾಪ್ತಿಯಾಗಲೂ ದೇವರನ್ನು ಆರಾಧನೆ ಮಾಡಲಾಗುತ್ತದೆ. ಹಲವು ಜನರು ಇಷ್ಟಾರ್ಥ ಸಿದ್ಧಿಗಾಗಿ ಹರಕೆ ಕಟ್ಟಿಕೊಳ್ಳುತ್ತಾರೆ. ಅಂದುಕೊಂಡಂತೆ ಸಮಸ್ಯೆ ದೂರವಾಗಿ, ಬೇಡಿಕೆ ಈಡೇರಿದ ನಂತರ ಮತ್ತೆ ಬಂದು ಹರಕೆ ಒಪ್ಪಿಸುತ್ತಾರೆ. ಒಟ್ಟಿನಲ್ಲಿ ಈ ದೇಗುಲ ಹನುಮನ ಭಕ್ತರಿಗೆ ಇಷ್ಟಾರ್ಥ ಸಿದ್ಧಿಸುವ ಹಾಗೂ ಕಷ್ಟ ಕಾರ್ಪಣ್ಯಗಳನ್ನು ನಿವಾರಿಸುವ ಧಾರ್ಮಿಕ ತಾಣವಾಗಿದೆ. ಅರಣ್ಯ ಪ್ರದೇಶದ ವ್ಯಾಪ್ತಿಯಲ್ಲಿ ಇರುವ ದೇಗುಲಕ್ಕೆ ಇಲಾಖೆಯು ಗಡಿ ಗುರುತು ಮಾಡಿದರೆ ಅಭಿವೃದ್ಧಿ ಕಾರ್ಯಗಳಿಗೆ ಅನುಕೂಲವಾಗಲಿದೆ ಎನ್ನುವುದು ಭಕ್ತರ ಆಶಯವಾಗಿದೆ.

-------------------

ಕೋಟ್

ತನ್ನದೇ ಆದ ಹಿನ್ನೆಲೆಯನ್ನು ಹೊಂದಿರುವ ಈ ದೇಗುಲದಲ್ಲಿ ನಮ್ಮ ವಂಶಸ್ಥರು ಹಲವು ತಲೆಮಾರಿನಿಂದ ಪೂಜೆ ಸಲ್ಲಿಸುತ್ತಾ ಬಂದಿದ್ದಾರೆ. ನಾನು ಕಳೆದ 20 ವರ್ಷದಿಂದಲೂ ಈ ಕಾಯಕದಲ್ಲಿ ತೊಡಗಿದ್ದೇನೆ. ಶ್ರಾವಣ ಮಾಸ ಹಾಗೂ ಸಂಕ್ರಾತಿ ವೇಳೆ ವಿಶೇಷ ಪೂಜೆ ನೆರವೇರುತ್ತದೆ. ಸನ್ನಿಧಿಗೆ ಆಗಮಿಸುವ ಭಕ್ತರ ಕಷ್ಟ ಕಾರ್ಪಣ್ಯಗಳು ನಿವಾರಣೆಯಾಗಿವೆ. ದೇವತಾರ್ಚನೆ ಕಾಯಕ ನೆಮ್ಮದಿ ತಂದಿದೆ.

ಕೃಷ್ಣಮೂರ್ತಿ

ಅರ್ಚಕ

*

ಗ್ರಾಮದ ಹೊರವಲಯದ ಅರಣ್ಯ ಪ್ರದೇಶದಿಂದ ಕೂಡಿರುವ ಈ ದೇಗುಲಕ್ಕೆ ಆಗಾಗ್ಗೆ ಭೇಟಿ ನೀಡಿ ಪೂಜೆ ಸಲ್ಲಿಸುತ್ತೇನೆ. ಇಲ್ಲಿಗೆ ಬೆಂಗಳೂರು, ಮೈಸೂರು ಹಾಗೂ ಇನ್ನಿತರೆ ಜಿಲ್ಲೆಯಿಂದಲೂ ಭಕ್ತರು ಆಗಮಿಸುತ್ತಿದ್ದು, ಧಾರ್ಮಿಕ ಕೇಂದ್ರವಾಗಿದೆ. ದೇಗುಲ ಇನ್ನಷ್ಟು ಅಭಿವೃದ್ಧಿಯಾಗಬೇಕಿದೆ. ಇದಕ್ಕೆ ಅರಣ್ಯ ಇಲಾಖೆಯು ಗಡಿಯನ್ನು

ಗುರುತಿಸಿದರೆ ಅನುಕೂಲವಾಗಲಿದೆ.

ಮುರುಡೇಶ್ವರಸ್ವಾಮಿ

ಭಕ್ತ, ಅಜ್ಜೀಪುರ